ـــــــــــــــــــــــــــــــــــــــــ
رغدة أبو زيد
إحساس ابن لذين.. لما كل اللي حواليكي يحسسوكي إنك شوية وهتبقي منتهية الصلاحية.. غير صالحة للاستخدام الآدمي! وكل ده ليه؟ كمان بتسألي ليه؟! مش عارفة المصيبة اللي إنتي عاملاها؟
إنتي يا هانم داخلة، ع الـ25 سنة.. ربع قرن.. ولسة متجوزتيش!
طبعًا لو إنتي دخلتيهم بالفعل أو عدتيهم فمصيبك أعظم.. بيعتبروكي في الحالة دي مش بس تاريخك عدا، لا ده إنتي كمان لازم يتخلصوا منك أحسن تعديهم، لأنك بقيتي عنصر مشع للعنوسة.
لما يكون كل إنجازاتك في الحياة لا تساوي أي شيء، لأنك محققتيش الإنجاز الأعظم.. معرفتيش توقعي راجل وتتجوزيه.. يا خايبة!
غير إن النظريات أثبتت إن كل ما الراجل بيكبر -سبحان الله- بيدوّر على عروسة أصغر، يعني بعد كده لو بنتك متخطبتش أول ما تبدأ تعتمد على نفسها في الحمام ابدئي اقلقي.
وطبعًا لما يبقى عندك 23 سنة فإنتي كده ف مرحلة الخطر؛ لازم تخافي على نفسك يعني أحسن تعنسي، وتحاولي تنجزي وتتعلمي كيف تصطادين عريسًا بقى! وطبعًا مش هتتأمري، احمدي ربنا إن فيه حد بيعبرك.. دي فلانة بنت فلان قعدت تتأمر لحد ما فضلت جنب أمها!
مش مهم يكون اللي في خيالك أوي.. ولا يكون عنده نفس أفكارك.. أفكار إيه يا ماما؟ بقولك هتعنسي! مشي حالك مفيش جواز.
وممكن تفتحي رينج السن بعد ما كنتي شايفة إنه من 3-5 سنين فرق كويس أوي، خليهم من 5-10.. مشي حالك مفيش جواز.
ومش لازم تتجوزي واحد مرتاحاله من أول مرة، بكرة تتعودي عليه، الحب بييجي بعدين.. مشي حالك مفيش جواز.
ومفيهاش حاجة لما أمه تيجي تعاينك الأول من غير ما هو يكون معاها، وتشوفك بيضة وحلوة الأول ولا لأ، مش لازم تشوفيه، ابقي شوفيه براحتك بعدين، بعد الفرح، المهم مرتاحة لأمه؟ مشي حالك مفيش جواز.
نفسي أقابل الشخص اللي ابتدع إن السن له علاقة بالجواز، وحدد المعايير إن دي صغيرة ودي هتعنس خلاص ودي مفيش منها رجا خلاص.
وأقابل معاه الشخص اللي بيتعامل مع البنت كأنها علبة زبادي هتحمض لو متاكلتش بدري.
ومعاهم الست اللي بتلف ع البيوت تشوف عرايس لابنها، ولا هو عمره شافهم ولا عمرهن شافوه!
وأقابل البنت اللي بتقبل تتعامل المعاملة دي.
ومعاهم الست اللي قررت إن الإنجاز الوحيد للبنت هو الجواز، بصرف النظر عن أي إنجاز ممكن تحققه في أي حاجة تانية، فهي تعتبر فاشلة طالما لسه متجوزتش.
ونيابة عن كل بنت نامت متنكدة بسبب واحدة رخمة قالتلها “مش هنفرح بيكي بقى؟”، أو “اللي قدك متجوزة ومعاها عيلين”، أو اللي قالتلها “اتجدعني”، أو “العريس اللي شافها ومعجبتهوش عشان درجة لونها مش اللي هو عايزها”.. نيابة عن البنات أنا هقابل كل الناس دي في عزومة عشاء في القلعة.. وباب زويلة هيشهد بعدها باللي هيحصلهم.
