قولي لا للعنف

أوقات بنقدر فعلاً ناخد خطوة ونقف في وش العنف ونقول لأ للمعنف، وأحيانًا بيغلبنا الاستسلام، وبنحس إن الموقف أكبر مننا، وساعتها بنقع تحت تأثير الصدمة، ومبنبقاش عارفين ناخد خطوات للتغيير، لكن بيفضل جوانا إيمان داخلي بإن في يوم كل ده هيتغير.

العنف له أشكال كتيرة، نقدر نقول إن مفيش حد فينا متعرضتش لشكل من أشكاله، سواء في البيت أو الشارع أو حتى في مجال العمل.

لكن الأكيد، إن العنف له آثار نفسية كبيرة علينا، وبيكون السبب في قرارات كتيرة بناخدها في حياتنا وتشكيل شخصيتنا، سواء بشكل واعي أو لا، وأحيانًا العنف ضد المرأة بيحول بعض السيدات نفسهم لمُعنفات وبيمارسوا العنف على أولادهم من غير ما يدركوا آثاره السلبية، بيفكروا “ما كلنا اتضربنا وطلعنا كويسين”، لكن اللي بيحصل إن دايرة العنف بتكبر، وبتزيد توابعه النفسية جوانا.

خلال شهر ديسمبر رفعنا شعار “لا للعنف”، ومن خلال حملتنا اتكلمنا عن أنواع العنف وإزاي تقدري توقفيه أو على الأقل تخرجي منه سليمة جسديًا ونفسيًا.