بقلم/ نورين محمد
بعيد عن إنها كلمة بتتقال كهزار ما بين الصحاب، إلا إن الكلمة دي موجعة قوي لو ركزت فيها.. اهتمامك بيَّ مبيطلبش، أصله لو اتطلب طعمه هيبقى وحش قوي.
أنا موجودة، موجودة ومحتاجالك، أنا ضعيفة من غيرك ومش لاقياك جنبي، أنا من غيرك ولا حاجة، بس مينفعش أقولك كده عشان هتبقى جنبي شفقة، عشان أنا طلبت، مش عشان إنت عايز تبقى.
أنا محتاجاك قوي، محتاجة كل لحظة في حياتي تبقى إنت فيها، محتاجة لما أتكلم معاك ألاقيك موجود، محتاجة إني أفضفض معاك أول بأول.
الاهتمام من طرف واحد واثره على النفس
مش هنسى الست اللي شفتها في المستشفى النهارده وهي لوحدها من غير حد معاها، شكلها كان حزين قوي، كانت نظراتها مش مفارقة اتنين قاعدين قصادها، راجل في الأربعين وزوجته، كان عمال يتوجع وهي تطبطب عليه، كنت حاسة إنها عايزة تصرخ وتقول أنا لوحدي أنا بتوجع ومش لاقية حد جنبي يطبطب عليَّ، أنا محتاجة حد معايا ومش عارفه أطلب.
اقرئي أيضًا: هل الحب من طرف واحد يستمر؟
هل الاهتمام هو الحب؟
“لقد كنت أحتاج إليك، لقد انتظرتك وأعطيتك فرصة، بل عشرات الفرص، لكنك لم تستغلها، لم يكن بإمكاني المجيء إليك وقول أحتاجك، لكني وجدت الاهتمام دون طلب في مكان آخر”، دي كانت كلمة اتقالت في فيلم قبل كده، لما بيوصل بينا الأمر إننا مش لاقيين اهتمام ومش عارفين نطلبه وبنلاقيه في شخص تاني، بعيد عن إنه بيبقى قاسي شوية إن اللي عايزه جه من حد تاني غير اللي كنت مستنيه ييجي منه، إلا إننا للأسف بنستسلم، ما هو إنت مش عايز تهتم ومش عايز غيرك يهتم كمان!
قصص عن فقدان الاهتمام
“في نتيجة الثانوية كنت خايفة قوي من بابا وماما، كنت عارفة إنهم هيبهدلوني مع إنهم المفروض أكتر ناس تقف جنبي وتصبرني، وخوفي طلع في محله فعلاً”، ده كلام واحدة صاحبتي لجئتلي بعد ما نتيجتها طلعت، لقت الاهتمام في حد تاني. لما تكون متوقع حاجة المفروض تتعمل أصلاً من غير ما تطلبها من الشخص ده وواجبة عليه، بتبقى أقسى بكتير قوي، لما الواحد بيحس إنه مش أهم من المظاهر بيتكسر.
“كانت يوم خطوبتها وكنت فرحانة ليها قوي، وأنا صاحبتها الأنتيم، بس هي كانت سايباني ومركزة مع أصحابها، أصحابها اللي بقت شبههم، شبههم في الشكل، ومعادتش صاحبتي البريئة بتاعة زمان، بقت حد قاسي عليَّ قوي، حد بخاف منه، مكانش ينفع أقولها إني جنبها ومحتاجة إنها تبادلني الشعور، عشان عارفة ردها كويس.
اقرئي أيضًا: ما معني السذاجة في الحب؟ قصص عن الحب من طرف واحد وعذابه
الحب والاهتمام من طرف واحد
ساعات كتير بيبقى في حياتنا الشخص ده، الشخص اللي بيحبنا ومستعد يعمل عشانا كل حاجة، بس إحنا اللي مش مديينله “ريق حلو” زي ما بيقولوا، بتبقى عايزة تديك نور عينها والله بس في المقابل عارفة إن ردك هيبقى “شكرًا” أو “إنتي عمرك في حياتك ما عملتي حاجة عشاني”، عشان كده بتريح نفسها من الكسرة اللي هتحصلها بسببك وبتكسر نفسها بنفسها، الناس دي وجودها في حياة أي حد نعمة، بس للي يقدر، للي يديها “ريق حلو”.
لما تلاقوا اللي يهتم بيكم امسكوا فيه بإيدكم وسنانكم، عافروا عشان يفضل معاكم، عشان لو راح مش هيرجع تاني، ولو جه غيره مش هيبقى زيه برضو، وهتبقى إنت الخسران.
لما تلاقوا اللي يهتم بيكم امسكوا فيه بإيدكم وسنانكم
