في طريقتين للحياة، إما إنك تعيشيها أو إنك متعيشيهاش، مفيش طرق تانية.
أنا معنديش فكرة إيه الحاجات الصح اللي ممكن نعملها عشان نعيش واحنا مستمتعين، معنديش روشتة للراحة، لكن عندي حاجات أنا عارفة كويس إننا لازم منعملهاش عشان حياتنا تبقى سعيدة.
في حاجات كتير لازم نتجنبها عشان نقدر نعيش، أحد أهم الحاجات دي هو الانتظار. صدقيني مفيش وقت للانتظار، ماينفعش تضيعي حياتك في انتظار الحاجات اللي مستنياها في الأفق، ممكن أوي الحاجات دي متحصلش، وممكن لما تحصل متبقاش بالمستوى المطلوب، وممكن كمان الحاجات دي تحصل وتلاقيكي مش مستعدة.
الانتظار بيضيع وقتك وطاقتك وبيفتح عنيكي ع الإحباطات، تخيلي واحد قاعد على محطة أتوبيس ومستني مش بيعمل أي حاجة، الراجل دة هيزهق أوي وجسمه هيوجعه من قلة الحركة وفي ساعات من يومه هتضيع في الانتظار وهيعرق وهدومه هتتبهدل.
طيب تعالي نتخيل إن نفس الشخص دة قرر إن وهو منتظر الأتوبيس هيعمل كام مكالمة تليفون يكلم فيها ناس ماكلمهومش من فترة ويفتح النت من على الموبايل يبص على الإيميل بتاع الشغل وكمان هيفتح فيس بوك ويشوف الدنيا فيها إيه، ويلف على كام موقع إخباري.
الفرق بين الاتنين، إن لو الأتوبيس مجاش في الآخر، الشخص الأول مستفادش من يومه بأي حاجة، بل كمان اتعكنن ع الآخر، في حين إن الشخص التاني عمل شوية حاجات هتوفر من وقته لو قرر يروح ياخد مواصلة تانية.
منتظرة الراجل المناسب؟؟؟ عيشي حياتك وكوني قوية وكاملة وسعيدة، إخرجي مع صحابك واشتغلي واتصوري وغني واكتئبي وافرحي وروحي الجيم واطبخي واعملي ريجيم، عشان لما الراجل المناسب ييجي تكوني انتي كمان شخص مناسب، مش هتضغطي عليه عشان يوريكي الدنيا ويعيشهالك، إنتي هتشاركيه ف العيشة فهتكوني أسعد. مضيعتيش وقتك ف انتظار بائس شخبط على روحك وسرق من عمرك وقت.
منتظرة تشتغلي شغلانة أحسن؟؟؟ إستغلي النت وإعملي حسابات على كل مواقع التوظيف، حدثي سيرتك المهنية وخدي كورسات، متستنيش وانتي مكتئبة وزهقانة من الشغل، طوري نفسك عشان لما الفرصة الأحسن تيجي تكوني انتي الشخص المناسب بالنسبة لها.
منتظرة تخلصي دراسة؟؟؟ إشتركي في فريق جوالة الكلية واطلعي رحلات واحضري المحاضرات أو متحضريهاش واخرجي اتغدي مع صحابك في أقرب مطعم بيعمل أكل رخيص على قد مصروفكم الشخصي. متضيعيش فترة الكلية في انتظار التخرج، عشان لما تتخرجي وميبقاش عندك وقت كتير تعملي فيه كل حاجة، متتحسريش على أيام الكلية اللي ضاعت ف الانتظار.
خلاصة كلامي واللي بحاول أقوله لنفسي قبل ما أقوله للقراء، لو ضيعنا مراحل عمرنا في الانتظار، هنقف في مرة ونبص للعمر ونكتشف إننا معشناش، إحنا كنا مستنيين كل فترة تخلص على أمل إننا نعيش الفترة اللي بعدها.
عيشي، مفيش وقت، كلنا نستحق السعادة، على أقل تقدير نستحق الراحة، ومينفعش ننتظرها، إحنا لازم نقتنصها.
صدقيني، مفيش وقت.
