وأنا صغيرة كنت بستغرب أوي لما حد من صحابي يتريق على اهتمامي بالقراية ويقول كفاية علينا كتب المدرسة، كنت بستغرب لأني متعودة إن القراءة دي بديهيات، لدرجة إني بتكسف أعددها ضمن هواياتي، لأنها ببساطة مش هواية دي بديهيات زي الأكل والشرب، لكن اكتشفت إن ده مش حال الكل.
إزاي تخلي ولادك يهتموا بالقراية ويتعلقوا بيها؟ وإزاي تساعديهم على اختيار الكتب المناسبة لكل مرحلة عمرية؟
دي الأسئلة اللي هنحاول نجاوب عليها هنا:
– الرحلة بتبتدي من وقت مبكر أوي، من وقت الحمل تقدري تقرأي للطفل بصوت عالي، ولما يتولد، ومن عمر ست شهور ممكن تجيبيله أول كتاب.
– عودوا أطفالكم إن الكتب تكون في متناول إيديهم، خلوا دايمًا مكان مخصص للكتب في أوضتهم رف أو صندوق، في مكان ظاهر يقدروا يوصلوله بسهولة.
– ممارسة الأب والأم للقراءة قدام الطفل من المحفزات الأساسية لتشجيعه وتعويده على ممارسة القراءة.
– خصصوا وقت للقراءة، في الأول ممكن مثلاً يكون وقت قبل النوم.
– خدوا الطفل للمكتبة وإنتم بتشتروا كتب، حتى لو كتب خاصة بيكم.
– وقت القراءة مش وقت إجباري، ده وقت المفرروض يكون ممتع للطفل، لو الطفل مش حابب يكمل قراية أو مش قاعد مكانه وبيتحرك كتير متحاولوش تجبروه، ﻷن ده ممكن يؤدي لنتائج عكسية.
إزاي نختار الكتاب المناسب لكل مرحلة عمرية؟
فيه ملحوظة مهمة في البداية، الخطوط الفاصلة بين كل مرحلة والتانية مش حادة، كمان لازم نراعي الفروق الفردية من طفل للتاني.
1- مرحلة الطفولة المبكرة ولغاية عمر سنة:
اختاروا كتب فيها صور واضحة وكبيرة، صورة واحدة في كل صفحة ألوانها متباينة ومفيهاش تفاصيل كتير، صور حيوانات أو صور لحاجات من بيئة الطفل، ألعاب مثلاً، أو قطع أثاث.
الطفل في المرحلة دي بيعتمد بشكل كبير على حاسة اللمس في التعرف على العالم اللي بيكتشفه من خلال إيديه وبقه، عشان كده بنختار كتب مناسبة خفيفة الوزن، يفضل الكتب المصنوعة من القماش أو الجوخ، لو مقدرتيش تشتريهم ممكن تصنعيهم بنفسك من قماش الجوخ الملون، وفيه كتب بلاستيك ممكن ياخدها معاه في وقت الاستحمام، أو مصنوعة من الورق المقوى عشان تقاوم رغبة الطفل في تقطيعها، ودي لازم نختارها كتب حوافها دائرية عشان متؤذيش الطفل، فيه كمان كتب فيها ملامس مختلفة، ناعم، خشن، أملس. وفيه كتب بتصدر أصوات.
2- من عمر سنة لسنتين:
برضو بنختار كتب قادرة على التحمل، الكتب اللي فيها أجزاء متحركة بتكون ممتعة للأطفال في السن ده وبتنمي المهارات الحركية الدقيقة.
اختاروا كتب فيها نصوص قصيرة من كلمة أو اتنين، أو أناشيد قصيرة، وده هيساعد على تنمية مهاراتهم اللغوية، اختاروا كتب بتحكي عن أنشطة بيقوم بيها الأطفال في يومهم زي اللعب والأكل مثلاً، أو كتب عن حاجات بيحبها الطفل ومهتم بيها زي السيارات أو الحيوانات والطيور أو شخصية كارتونية مفضلة.
3- مرحلة ما قبل المدرسة من 2 لـ5 سنوات:
اختاروا كتب فيها حكايات عن مغامرات وأنشطة لشخصيات عالمها شبيه بعالم الطفل، مثلاً حكاية عن زيارة لحديقة الحيوان، أو عن يوم في روضة الأطفال، أو عن حفل عيد ميلاد، كمان حكايات المغامرات الخيالية زي الحكايات اللي بتكون أبطالها من الحيوانات والطيور بتجذب الأطفال جدًا في السن ده، لازم نراعي إن الطفل بيبقى لسه مش قادر على التفرقة بين الحقيقة والخيال في المرحلة دي، عشان كده تجنبوا القصص اللي فيها أشياء مخيفة. وممكن نقدم الكتب اللي فيها حكايات عن القيم الأخلاقية من غير تلقين مباشر.
ممكن كمان في السن ده تقدموا للطفل كتب عن الأرقام والحروف الهجائية.
4- من عمر 5 لـ8 سنوات:
الطفل في المرحلة دي قدرته على التركيز بتزيد، ومدى انتباهه بيطول، كمان بيكتسب مهارة القراءة لوحده، يفضل اختيار كتب مفرداتها سهلة بتتكون من جمل قصيرة بخط واضح، الأطفال بتحب قصص الألغاز والفوازير وقصص المغامرات والبطولات، حكايات عن قيم زي البطولة والشجاعة، وحكايات بسيطة أبطالها شخصيات تاريخية أو دينية أو أبطال شعبيين، والمجلات المصورة. لسه الرسومات مهمة لكن في المرحلة دي الطفل بيقدر يستوعب الرسومات اللي حجمها أصغر وفيها تفاصيل أكتر، الملونة أو الأبيض وأسود.
للرجوع إلى المصدر: اضغط هنا
