عزيزتي الأم.. ربنا يكون فى عونك.
نقطة ومن أول السطر.
اتكلمنا المرة اللي فاتت عن التدخل فى حياة الحامل، المرة دي هنتكلم عن التدخل فى حياة الأم، لأن بصراحة عالم الأمهات فيه ناس كتير بتستعبط. تلاقي أي أم خلفت قبلك إن شالله بخمس دقايق بتديكي خلاصة تجربتها العميقة وتفضل تتحشر في الصغيرة قبل الكبيرة في كل قراراتك تجاه طفلك، وكأن حضرتك مش مسموحلك باتخاذ قراراتك غير في تاني طفل أو مع أي واحدة حظها السيء خلاها تولد بعدك فتروحي تكملي معاها المشوار، وتبقى كل أم بتربي عيال غيرها وهَلُم جَرِّ.
مقال النهاردة بداية سلسلة عن نوعيات التدخل اللي بيحصل في حياة كل أم حديثة العهد بالأمومة، إيه مسموح بيه وإيه لازمله وقفة، والأهم إزاي نعرف نقف في وش العدوان الغاشم من الأمهات السابقات اللي خلاص ربوا عيالهم وبقوا فاضيين لعيالنا من غير ما نخسر حد.
لكن الأول لازم نحط قاعدة عريضة قدام عينينا طول الوقت تَنُص على أن: الأمومة ممكن تكون غريزة فِطرية، بس حُب الطفل والاهتمام بيه وبتفاصيله والتضحية عشانه حاجه وأنك تخرجي من أوضة العمليات عارفة اللي هتعمليه بالحرف حاجة تانية خااااااالص.
الأمومة فِعل ممارسة، مع الوقت هتقدري تفَرَّقى الطفل بيعيط عشان عنده مغص وللا جعان وللا عايز يغير وللا عايز ينام، فمتحسيش فى أى مرحلة أنك أم فاشلة، ولا تسيبي حد يقنعك بده، ولا تفتكري أن كل الأمهات عارفين هم بيعملوا إيه ومبيغلطوش. مش مهم أنك متغلطيش المهم أنك تتعلمي من غلطك، ومتصدقيش كل واحدة هتحرقلك دمك وتفهمك أنها المرأة الحديدية فى بيتها وأنها أول ما فاقت من البنج أدولها جايزة نوبل في الأمومة.
نرجع لموضوعنا.. التدخل في حياة الأم بيبدأ من قبل حتى ما المسكينة تولد. أصل قرار أنك تولدي طبيعي وللا قيصري مش قرارك لوحدك!
عايزة تولدى قيصرى! إيه الدلع ده!؟
تاخدى بنج ومتحسيش بالوجع إزااااااااااي!؟
ما كل الستات زمان كانت بتولد طبيعي ومبتشتكيش. تلاقي الواحدة من دول تقولك ده أنا جالي الطلق ف الواد الصغير قبل العيال ما يروحوا المدرسة فصحيتهم لبستهم وعملتلهم الفطار ووصلتهم المدرسة بعدين روحت أولد عشان ألحق أرجع أحضر الغدا قبل ما ييجوا هم وسي البيه جوزي.
ثم تولدي قيصري دى يعنى بتستسهلي وعايزة ترمي فلوس جوزك فى الأرض. وكأن الولادة القيصري مش ممكن يحصل قبلها طَلق وانقباضات وتعب، ولا كأن أصلًا وجع الولادة ف الساعة بتاعة العملية مش فى اللى بيحصل بعد كده والجرح اللى طوله وعمقه يخوفوا أتخن راجل إنه يعمل فى نفسه حاجه زي كده.
وللا الحركة اللي بعد الولادة لازم تقومي وتتمشي عشان الجرح يلم بسرعة، لأ وكمان بقى فيه طفل مسئوليتك هترضعيه وتغيريله وتنيميه وتتعاملي مع كل ردود أفعاله اللى متعرفيش عنها حاجة من أول لحظة هتفتحي فيها عينيكى بعد الولادة.
بس السؤال اللي بيطرح نفسه: فلنفرض أن الولادة القيصري فعلًا أريح عن الطبيعي -بغض النظر عن أن تعبها بييجي بعد كده مش هتهربي يعني- الواحدة متريحش نفسها لييييييييييييييييييييه!؟ هو إحنا لازم نروح للتعب ما هو جاي جاي!
خلاص ولدتي طبيعي واتبهدلتي وصوتتي ولطشتي جوزك بالقلم وقت العملية عشان هو اللى عمل فيكى كده؟ أو ولدتي قيصرى وخرجتي اتبهدلتي بعدها!؟ خلاص يا حبيبتي اللي حصل حصل والحقيقة أن الولادة أسهل حاجه فى كل اللي هيجرالك ياست الكل.
نييجى بقى لأول نقطة صراع حقيقية هتقابلك هترضعي طبيعي وللا صناعي تاااا تاااا تاااااا
لمعرفة التفاصيل الرهيبة لازم تستنونا المقال الجاي.
