أهلك وأصحابك والناس اللي حواليك مش دايمًا بيبقوا فاهمين اللي بتمر بيه، ومش دايمًا بيبقى عندهم المهارات اللي تخليك تقدر تتكلم معاهم براحتك من غير ما يزودوا وجعك وضغوطك، ولأن الناس بتحتاج إنها تتكلم وتتسمع وتحكي كل اللي جواها وتتقبل، ابتدت الناس تدور على أماكن تانية تلاقي فيها ده.
بالرغم من إن الفيسبوك مش دايرة آمنة والخصوصية في الجروبات بتاعته مش مضمونة طول الوقت، لكنه كان من أهم الأماكن اللي سمحت وشجعت الناس إنها تعبر عن اللي جواها بصوت عالي وتقول مخاوفها. “ماذا يدور ببالك الآن؟”، و”بماذا تشعر الآن؟” كانوا بيشجعوا الناس تعبر عن مشاعرهم وأفكارهم ويلاقوا التأييد والدعم اللي محتاجينه. وكمان انتشار الجروبات اللي بتضم مجموعة من الناس اللي عندهم نفس التحديات، بقت بتساعدهم إنهم يقبلوا ظروفهم ف يقدرو يتعاملوا مع تحدياتهم أو يتجاوزوها.
مجموعات الدعم النفسي بتُمارس بشكل متخصص ومحترف في أماكن كتيرة، سواء مجموعات في الواقع أو مجموعات أونلاين، وده مش بس للمرضى النفسيين أو المدمنين، وكمان للي بيعانوا من الضغوط النفسية أو تحديات أو مشاكل في الأكل أو مشاكل سلوكية أو اللي حابين يعيشوا حياة صحية، أو للأمهات أو حاجات تانية كتير.
طيب إيه المزايا اللي هتستفاد بيها لما تحضر مجموعة دعم نفسي؟
1- هتعرف إنك مش لوحدك
ناس كتير بعد ما بيحضروا أول مجموعة دعم نفسي بيقولوا “أنا كنت فاكر إن أنا الوحيد اللي عندي المشكلة دي، أنا استغربت جدًا إن فيه ناس تانية زيي!” “أنا حسيت إني مش لوحدي” مجرد ما هتعرف ده، هتحس بالارتياح وهيبقى عندك أمل.
2- هتقدر تعبر عن مشاعرك
بعد ما بتعرف إنك مش لوحدك، في البيئة الآمنة الداعمة، هتبتدي تعبر عن مشاعرك وتشارك بيها المجموعة، وتشارك بقصتك وتحدياتك ومخاوفك ونجاحاتك. وده بيساعدك على الشفاء، لأنك بتلاقي باقي المجموعة بتسمعك من غير ما تحكم عليك وبتقبلك، وكمان هيمدحوك على شجاعتك وانفتاحك معاهم.
3- هتعرف معلومات تساعدك
مجموعات الدعم بتوفر نصايح ومعلومات مهمة تساعدك على التعامل مع تحدياتك، وكمان هتوفرلك توصيات لكتب أو مراجع مهم إنك تقراها أو تعرفها.
4- هتحسن مهاراتك الاجتماعية
لما تقابل وتتكلم مع باقي أعضاء المجموعة، ده بيساعدك إنك تتعلم وتمارس بعض المهارات الاجتماعية ومهارات التكيف، وإنك تتفاعل بشكل مؤثر مع الناس، خصوصًا لو عندك اضطراب نفسي أو أحد أنواع الإدمان، لأن ده بيخلي المريض ينسحب من العالم، فالمجموعة بتساعده يرتاح مع الناس ويقدر يرجع تاني يتعامل مع العالم.
5- هتديك أمل
من أكتر الحاجات اللي بتأثر في مجموعات الدعم النفسي هي إنك تشوف حد عنده نفس مشكلتك وبدأ في طريق الشفاء، أو بقى بيعرف يتعامل مع مشكلته بشكل أحسن، حتى لو كان أخد بعض الخطوات البسيطة اللي تخليه يقدر يعيش حياة أسعد، النموذج الإيجابي ده هيخليك حاسس إن فيه أمل وإن التحسن ممكن.
6- هتساعدك على تقليل المعاناة
وإنت في المجموعة هتبدأ تلاحظ إن مستوى شعورك بالضيق وعدم الراحة بيقل، وده عشان مشاركاتك في المجموعة وقبولهم ليك، واستماعك وقبولك لمشاركات غيرك بتساعد على تحسن مزاجك وعلى تقليل شعورك بالمعاناة.
7- هتساعدك على فهمك لنفسك
المجموعة هتعلمك طرق جديدة وفعَّالة عشان تتعامل مع المواقف الصعبة، هتفهمك أكتر عن نفسك واحتياجاتك وشخصيتك الفريدة، هتعرف كمان إيه الحاجات اللي ساهمت في تكوين شخصيتك وانفعالاتك وأفكارك ومشاعرك. وده هيساعدك جدًا إنك تقدر تدير مشاعرك وتتعامل مع تحدياتك وتواجه صعوبات الحياة، وتتغير لو كان التغيير ممكن أو تتقبل ظروفك لو مش هتقدر تغيرها.
8- هتخليك تساعد غيرك
زي ما بتستفيد من المجموعة بتقدر كمان تساعد أعضاء المجموعة التانيين، وإنت بتكبر وتنضج نفسيًا وتحقق تقدم ناحية أهدافك، هيتأثروا بتحسنك، وده هيخليك برضو تحس بتحسن لما تلاقي إنك قدرت تساعد شخص تاني، مساعدة الغير تعتبر هدف أساسي غير مباشر ولا مقصود من أهداف مجموعات الدعم.
9- هتقدر تتحمل تكاليفها
من أهم مزايا مجموعات الدعم إنها متوفرة وكتيرة، ومنها مجاني، ولو مش مجانية بتكون أرخص من جلسات العلاج الفردي. متحكمش من أول مرة على مجموعة، احضر كذا مرة مع نفس المجموعة لأنك بتحتاج وقت عشان تحس بالاسترخاء والراحة مع المجموعة.
من أكتر الأمثلة اللي بتوضح نجاح فكرة مجموعات الدعم، مجموعات الشعر الكيرلي اللي على الفيسبوك، اللي ساعدت البنات إنها تتقبل شعرها الكيرلي وتحبه وتخرج بيه وتحضر بيه المناسبات وهي متقبلة نفسها وشكلها، بعد ما كانوا بيعملوا كل حاجة عشان يفردوه لأنهم كانوا حاسين بالرفض. ساعدوا بعض يقبلوه، ووفروا المعلومات اللي تخلي شكله أحلى. مش بس أثروا على بعض، لأ قوة المجموعة قدرت تأثر على المجتمع كله، وخلته يغير نظرته للشعر الكيرلي ويحبه بعد رفضه له سنين طويلة. لو جروب دعم أونلاين قدر يعمل كل التغيير ده، ما بالك بمجموعات الدعم النفسي في الواقع!
مجموعات الدعم النفسي هي دواير أمان وثقة وبصيرة وانفتاح على نفسك وعلى الناس. إيدين ماسكة في بعضها، بيسندوا بعض ويشدوا بعض عشان يوصلوا لبر الأمان. لو محتاج سند ودعم وقبول وراحة، جرب تحضر مجموعة دعم.
المصدر:
http://davidsusman.com/2015/04/23/9-benefits-of-support-groups/
