عارفة يا “فريدة” يعني إيه أنثى؟ يعني الراعي الرسمي للحياة. من يوم ما عرفت إني حامل في بنوتة وأنا مبسوطة ومشتاقة نتقابل عشان أحكيلك عن روعة كونك أنثى، يمكن تكوني النهارده لسة صغيرة، لكن في يوم مش بعيد هتتنقلي لمرحلة جديدة بيقولوا عليها البلوغ.. مرحلة بتتغير فيها حاجات كتيرة، كتبتلك منهم كام حاجة:
1- جسمك: شكله هيبتدي يتغير وتبان فيه تفاصيل أكتر، تفاصيل تستاهل الفخر مش الخجل زي ما ناس بيقولوا، لأن جسمك هو إعلان عن جمال ومهارة اللي خلقك، والتغيير ده هو بداية استعداده لخلق حياة جواكي.
2- الدورة الشهرية أو “البيريود“: ودي هنتكلم عنها بالتفصيل لما تقرب، بس عايزاكي تعرفي إن هي دي سر الوجود البشري، فبرغم ألمها لكنها إعلان عن قدرة الرحم على حمل حياة جوة حياة. هتلاقي ناس بتقرف منها وناس تانية بتتجاهلها، وبنات بتتكسف منها، بس أنا بقولك استمتعي وزقططي بيها، لأن ظهورها هو عيد ميلاد أنوثتك، اللي بوعدك هنحتفل بيه سوا.
3- اللبس وشوية تفاصيل كده: هننزل سوا نختار حاجات جديدة تناسب احتياجات جسمك بعد التغيير، زي مثلاً البرا والفوط الصحية، وممكن نجرب نعمل سويت، ممكن نروح للكوافير تظبطي حواجبك. مفيش في الوقت ده لازم ومفروض، لكن سوا هنشوف اللي يناسبك ومريح ليكي، وهناخد الموضوع خطوة خطوة.
تعرفي على: ما هي مقاسات البرا؟
4- المزاج: فيه أوقات في الشهر هتلاقي مزاجك بيتلخبط، وده مش إحساس لطيف، لكنه مش بيقول إنك بقيتي كئيبة ولا حاجة، لكنه ببساطة انعكاس لتغيير هرمونات في جسمك، ودي حاجة بيولوجية بحتة مش في إيدك تغيريها. اللي في إيدك هو طريقة تعاملك مع لخبطة المزاج في الوقت ده، وإزاي تفهمي نفسك أكتر وتدربيها تكون أهدا، وده هتتعلميه مع الوقت، لأنه بيحتاج تدريب وممارسة.
5- أفكار المجتمع: ممكن تبقى عايزة تخبيكي وتفرمل استمتاعك بالحياة، وكأن بلوغك ده إعلان نهاية الطفولة واللعب وبداية للحياة الجد بتاعة الكبار. بس أنا بقولك طفولتك دي أحلى ما فيكي، اوعي تتخلي عنها أبدًا، بالعكس، كملي وانطلقي وافرحي بالحياة، واتأكدي إن الطفلة اللي جواكي هتفضل هي اللي بتسعدك طول ما إنتي شايفاها وبتسمعيها وبتقدريها.
يا “فريدة” حياتنا في كل مرحلة بتدينا هدية، لو ركزنا هنشوفها وندوقها ونستطعمها. دوقي طعامة حياتك واحضني أنوثتك، لأن زي ما إنتي “فريدة” هي كمان فريدة.
