“لما أكبر بابا هيكون عجز ومش هيقدر يضربني تاني، وساعتها أنا هاضربه” (!)
دي جملة قالها ولد عنده 12 سنة. إيه اللي وصله لكده يا ترى؟ المشكلة تكمن في اختلاف الزوجين في تربية الأبناء. باباه يقول يمين، مامته تقول شمال.. مامته تقول شمال باباه يقول يمين. ولو الأب مثلاً طلب حاجة من الابن ورفضها، تتدخل الأم لصالح الابن. والنتيجة أن الأب بقى يتلكك للولد على كل كبيرة وصغيرة. من الناحية التانية، الأم كرد فعل بقت تدلعه على الآخر.
مشكلة اختلاف الزوجين في تربية الأبناء منتشرة في بيوت كتيرة: واحد من الأبوين بيحاول يغرس مبادئ والتاني يغرس عكسها، أو يكونوا مختلفين في الأسلوب العام للتربية فحد مؤمن بالصرامة والتاني مؤمن بالتدليل، وهكذا.
عاوزين نتناول المشكلة دي من 3 زوايا: آثارها على الأبناء، أسبابها، حلها.
أثر اختلاف الزوجين في تربية الأبناء على نفسية الطفل
- زي ما شفتم في القصة اللي حكيتها في المقدمة، ممكن الابن يكره حد من الأبوين.
- وممكن يرتبط بالطرف التاني جداً لدرجة إنه يتقمص صفاته، وتبقى مشكلة طبعا لو مخالف له في الجنس (يعني مثلا الابن يتقمص صفات الأم كأنثى أو العكس بالنسبة للبنت).
- كمان الطفل هيرتبك وهيصعب عليه التمييز بين الصح والغلط. وده عكس ما رغبة أي أب وأم في تربية الأبناء على الأخلاق.
وده الكلام اللي قاله د. عبد الرحمن العيسوي في كتابه “مشكلات الطفولة والمراهقة”.
- مش بس كده، ممكن الابن أو البنت يكره الجنس التاني بشكل عام وتيجي له منه عقدة وده هيؤثر على علاقته الزوجية في المستقبل.
- إلى جانب إن الطفل هيسمع الكلام اللي على هواه وبالتالي مش هيتعلم حاجة من اللي الأب والأم عاوزين يعلموها له، وعلى العكس هيكتسب صفات سلبية زي النفاق والانتهازية. وزي ما شفتم الولد قال ايه في المقدمة. هو مابيضربش باباه دلوقت مش احتراماً ولكن خوفاً. فأين تربية الأبناء على الأخلاق؟
أسباب اختلاف الزوجين في تربية الأبناء:
- إن الأب والأم يكونوا بيصفوا خلافاتهم من خلال الأبناء بدل ما يصارحوا بعض بمشكلاتهم.
- أن يكون كل واحد من الأبوين شايف أسلوب التاني غلط في التربية.
- الاختلاف الكبير بين الزوجين في البيئات اللي هم جايين منها.
- مفيش اتفاق بين الزوجين على كيفية تربية الأبناء بطريقة صحيحة. ومفيش حوار بينهم بخصوص الموضوع ده.
- عدم إدراك الوالدين لأضرار اختلاف الزوجين في تربية الأبناء على أطفالهم.
حلول اختلاف الزوجين في تربية الأبناء:
- الحوار حول كيفية تربية الأبناء بطريقة صحيحة، حتى قبل ما ييجوا الدنيا أصلاً.
- من أهم نصائح في تربية الأبناء اللي أساتذتي علموها لي أن الأب والأم مايختلفوش قصاد الولاد أبداً. ولو حد فيهم مش موافق على موقف للتاني مع الولاد يستنوا لما يتقفل عليهم باب أوضتهم ويتكلموا. وبعدين يخرجوا على الولاد بموقف موحد.
- اتفاق الزوجين على مرجعية بخصوص كيفية تربية الأبناء بطريقة صحيحة. ولما يختلفوا يرجعوا للمرجعية دي (مبادئ الدين، القراءة وسؤال المتخصصين،..الخ)
- ومن أهم مهارات في تربية الأبناء إنك تصفي خلافاتك مع جوزك أول بأول وماتدخلوش الأبناء طرف، هم مالهمش ذنب.
- ولو جوزك مش مستعد للحوار دي تبقى مشكلة تانية. وأنصحك إنك تلجئي لمتخصص في العلاقات الزوجية.
- اختلاف الزوجين في تربية الأبناء هو أحد أخطاء التربية الكتيرة اللي لازم نعرفها ونتجنبها. ولادنا أمانة في إيدينا وهم أغلى حاجة في حياتنا.
وعاوزين في السبوع نقول للطفل: اسمع كلام أمك اسمع كلام أبوك
