صندوق الحواديت 2: تاج جميلة

بسنت

يُحكى أن كل البنات أول ما بيتولدوا الملايكة بتزورهم وتلبسهم تاج مسحور من اللؤلؤ، وتغسل وشهم بمية الورد، ويهادوهم بموهبة تكبر
معاهم كل يوم يكبروا فيه، فتصبح كل بنت أميرة مميزة.
ده بالظبط اللي حصل يوم ما اتولدت "جميلة".. بنت زيّ البدر.. شعرها مموج لون الشوكولاتة وعيونها زي حبات البندق وبشرتها
متزينة بالنمش.
كانت موهبتها بتنور وهي بترقص زي الفراشات بخفة وتطير تلون كل مكان بضحكتها.

لكن كل يوم كانت بتكبر "جميلة" وتكبر معاها حبات النمش، كانت بتتكسف من تعليقات أصحابها في المدرسة ومُدرسات فصلها وقرايبها
الكبار.. رغم إن مامتها كانت دايمًا تحكيلها عن التاج المسحور وجمالها اللي مفيش زيه، وإن النمش ده لأن الشمس اديتها بوسة يوم ما
اتولدت، فشوية نور ودفا من الشمس انطبعوا على خدودها في شكل نمش.

وفي يوم أعلنت المدرسة عن حفلة الأميرات، فرحت "جميلة" واتمرنت ع الرقص والطيران بكل طاقتها، لكن قبل الحفلة بيومين
استبعدتها مُدرِّسة الفنون من الحفلة، وقالتلها بعلو صوتها "مفيش أميرة عندها نمش برتقالي!"، ضحك الفصل كله، ما عدا "جميلة" اللي
روحت ودخلت أوضتها وعيطت لحد ما الدموع خلصت، وراحت تقول لمامتها بمنتهى الزعل: ليه اتولدت بحبات النمش دي ف وشي؟
ليه أنا مش جميلة ووشي صافي زي بقية البنات؟ ليه؟!

ابتسمت مامة "جميلة" وحضنتها جدًا، وقالتلها: عارفة يا جميلة! كان ممكن تتولدي ببشرة صافية بس معندكيش موهبة ولا خفة الفراشات،
أو حتى صحتك تعبانة وشعرك باهت، أو قلبك مش أبيض وميعرفش يحب أو يفرح.. تختاري إيه؟ وليه مش شايفة كل الحاجات الحلوة
فيكي؟ إنتي نسيتي إن كل البنات أميرات على راسهم تاج مسحور؟
سكتت "جميلة" وقعدت تفكر.. وقالت: بس.. بس أنا مش شايفة ولا حاسة بالتاج ده!

فردت مامتها: لأنك مش واثقة إنك حلوة ومميزة، مش شايفة موهبتك وضحكتك وقلبك الحنين وحبنا ليكي، زعلك وكسوفك من النمش
غطى على التاج المسحور وخلّى اللي حواليكي ميحسوش بجمال قلبك قبل وشك.. بس ده كله ممكن يتغير.
ردت "جميلة" بلهفة: إزاي؟!
فقالتلها مامتها: بكرة هتروحي للمديرة تحكيلها اللي حصل، وتوريها شطارتك في التمارين وإنتي واثقة في نفسك وإنك أميرة على راسها
تاج مسحور، حتى لو مشتركتيش في حفلة الأميرات.. توعديني؟

وفعلاً وعدت "جميلة" مامتها إنها هتبطل عياط وكسوف من شكلها، ولأول مرة تشوف حبات النمش في وشها منورة زي الشمس ومزودة
ضحكتها جمال، أول مرة تحس من قلبها إنها جميلة فعلاً.
وراحت للمديرة اللي انبهرت بموهبتها، وفهِّمت المُدرِّسة اللي اتريقت عليها إن اللى عملته مع "جميلة" مكانش صح.

ويوم الحفلة.. وكل الناس بتصقف لـ"جميلة" على أدائها الرائع، كان التاج المسحور بيلمع وينور على راسها، وعلى راس كل البنات
الموجودين، اللي ثقتهم بنفسهم خلتهم أميرات جميلات، اللي عارفين إنهم حلوين مهما كان لون بشرتهم وملمس شعرهم وشكل أسنانهم
وطريقة كلامهم.. كلهم كلهم على راسهم تيجان لؤلؤ مسحورة.