رضوى الصحن
ليه كل علاقاتي بتبقى مع ناس عندهم مشاكل أو مش مستعدين يكونوا في علاقة طبيعية أو مؤذيين؟!
هو أنا مغناطيس بيجذب الناس الضايعة بس؟!
طب ليه لما بتأذي في علاقة مبقدرش أبعد؟!
هل ممكن أفضل في علاقة مؤذية مع حد عشان بحبه؟
إيه هو الحب أصلاً؟
هل الحب فعلاً يستحق إني أحارب وأفضل متمسكة بيه؟
بيقولوا “Like attracts like” يعني كل واحد بيجذب اللي شبهه، عشان كده من الأفضل إنك تكوني الشخص اللي إنتي بتحاولي تجذبيه. لأن عقلك بيجذبك بشكل غير واعي للأشخاص اللي بيشبهوكي، أو بيكملوا النقص اللي في صورتك غير الواعية عن نفسك، عشان كده لو حاسة إنك محتاجة حد ينقذك من مشاكلك، أو مش قادرة تحلي الخناقات اللي بتحصل جواكي، أو حاسة إنك مش كويسة كفاية، هتجذبي الناس اللي هيكونوا شايفينك كده فعلاً، أو اللي شايفين نفسهم زيك.
لما تحسي بكده، خليكي مع نفسك لحد ما العاصفة تهدا وتعدي، بعدها هتقابلي ناس برضو شبهك، لسة معديين من العاصفة بتاعتهم، وهتقدروا تكملوا الحياة مع بعض وإنتم عارفين إنكم هتقدروا تواجهوا صعوبات الحياة زي ما قدرتوا تواجهوا اللي فات. وهتبقوا مستعدين تبنوا علاقة حب حقيقية مش علاقة مبنية على التعلق وسد احتياجاتكم بس.
تعرفي على: هل الحب من طرف واحد يستمر؟
طيب إيه الفرق بين الحب والتعلق؟
1- الحب بيبقى للشخص.. التعلق بالصورة اللي في خيالك
في الحب.. إنتي بتحبي الشخص اللي قدامك زي ما هو، بعيوبه ومميزاته، بتبقي عارفة إنه بني آدم مُعرَّض إنه يتغير وظروفه تتغير زي أي حاجة في الدنيا. الحب معناه إنك تقبلي تمشي معاه خلال كل التغيرات والمراحل اللي هيمر بيها من غير شروط.
في التعلق.. بتحبي الشخص بشرط إنه يقدر يحقق الصورة المثالية اللي رسمتيهاله في خيالك، مبتبقيش شايفة الشخص أصلاً، إنتي بتبقي شايفة احتياجك عايزه يكون إزاي، وبتفضلي متمسكة بالصورة دي وبتجبريه إنه يكون عليها. ولو مقدرش يكون زي ما إنتي عايزة أو اتغير، الحب بيزول.
2- الحب بيكبّر.. التعلق بيمنعك تكبري
في الحب.. إنتي وشريكك هتكبروا مع بعض، إنتم الاتنين هتحاولوا بكل طاقتكم تكونوا أحسن نسخة من نفسكم، هتلاقي نفسك بقيتي وإنتي معاه أحسن من أفضل حالة كنتي فيها. الحب مش احتياج، الحب مش تسديد نقص، الحب عطاء بدون انتظار لمقابل.
في التعلق. انتظارك إن الآخر يحل مشاكلك، بيقيد نموك، لأنه بيخليكي تعتمدي بشكل مرضي عليه. في التعلق بتكوني محتاجاله مش بتحبيه، ممكن تلاقي الحاجة الوحيدة المشتركة بينكم هي الوحدة والاحتياج للاهتمام، لوجود حد في حياتكم، لملء الفراغ اللي جواكم، أو إنك تحسي إنك مرغوبة ومحبوبة ومتقَدرة.
3- الحب مش أناني.. التعلق أناني
في الحب.. بتفكري إزاي تبسطي شريكك، بتفكري دايمًا في أفكار تخليه يحس إنه محبوب ومبسوط وإنه كفاية. مبتعديش اللي بتعمليه عشانه ولا بتفكري مين اللي بيعمل للتاني أكتر ولا بتبتزيه باللي بتقدميهوله. مبتبقاش حياتك متمركزة حوالين نفسك واحتياجاتك.
في التعلق.. بتركزي على الطريقة اللي هيقدر يبسطك بيها ويسد احتياجاتك، وبتعتمدي بشكل كبير عليه. بتستخدميه عشان يحل مشاكلك أو على لأقل يساعدك إنك تنسيهم . بتتوقعي إنه يزود ثقتك في نفسك ويملا الحفرة الفاضية اللي جواكي. بتصدقي إنه مسؤول عن سعادتك وبتُحبطي جدًا وتغضبي لو هو مقدرش يخليكي راضية أو مبسوطة.
4- الحب حرية.. التعلق تحكم
في الحب.. شريكك بيقدر يقبلك زي ما إنتي، بيسمحلك وبيشجعك إنك تكوني نفسك وإنك متخافيش تبيني ضعفك وعدم مثاليتك قدامه. بيشجعك إنك تجري ورا أحلامك وبيساعدك تكوني حرة، وبتلاقي إن احتياجاتكم مش هي العامل اللي بيسوق حياتكم.
في التعلق.. بتميلي فيه للتحكم، ممكن تحاولي تبعدي شريكك عن حاجات هو عايزها، تزرعي أفكارك في دماغه أو تتلاعبي بيه بس عشان يفضل موجود معاكي بغض النظر عن مشاعره ورغباته هو. لما بتديله حاجة، بتديها -بشكل غير واعي- يا إما عشان تاخدي حاجة في المقابل أو عشان متخسريهوش. بتديله عشان تسيطر/ تسيطري عليه بطريقة ناعمة.
5- الحب أبدي.. التعلق عابر
الحب.. بيعيش رغم الوقت والمسافات، ممكن إنتي وشريكك تنفصلوا بشكل مؤقت أو دائم، لو كان اللي بينكم حب صادق، هيفضل للشخص ده مكان في قلبك، وهتفضلي تتمنيله الخير لباقي حياتك. حتى لو الظروف اتغيرت أو مبقيتوش مع بعض، حتى لو بتعاني من انتهاء العلاقة. في الآخر بتلاقي إنك بتقدري لسة تحسي بمشاعر طيبة له، وبتقدري تتعلمي تتقبلي عدم وجوده في حياتك.
في التعلق.. هتعيشي معظم الوقت في خوف من خسارة الطرف الآخر، هتحسي كأنك أدمنتي الشخص ده، فلما المخدر هيكون موجود هتكوني كويسة، لما مش هيكون موجود، هتنهاري. لو انفصلتوا هتحسي بالغدر والغضب واللوم والكره، لأنك مفترِضة إن شريكك هو المسؤول عن سعادتك.
لو اللي بتمري بيه دلوقتي مش حب، بتمنالك إنك تلاقي توأم روحك اللي تقدري تبني معاه علاقة حب حقيقية. ولحد ده ما يحصل، ليه متشتغليش على إنك تحبي نفسك وتحلي مشاكلك؟ عمرك ما هتعرفي تحبي وتقبلي وتسعدي حد إلا لو بتعرفي تحبي وتقبلي وتسعدي نفسك الأول. ساعتها بس هتقدري تختاري وتجذبي الشخص المناسب، بدل ما تحتاجي أي شخص يسد احتياجاتك. وافتكري إن كل حاجة بتتعلقي بيها هي حاجة ناقصة جواكي.
إيه هو الحب أصلاً؟ وهل يستحق أحارب وأتمسك بيه؟
