عايزة فيلم دافي تشوفيه إنتي وجوزك في يوم أجازة عشان تغيّروا الروتين ويكون فيلم ملهم؟
فيه حاجة مفقودة ف جوازك مؤخرًا ومحتاجة أجازة تفكري فيها إزاي ممكن ترجّعي الشغف ف حياتك الزوجية؟
عندك مشكلة خرس زوجي وبتدوري على علاج، أو حتى تحبي تسمعي قصة عن زوجين كان عندهم نفس المشكلة وعرفوا يحلوها؟
هحكيلك عن فيلم حلو ربما يساعدك، وهكون سعيدة أوي لو الفيلم عجبك وعرفتي تستفيدي منه.
الفيلم بيحكي عن ميريل ستريب، الست الحلوة الوقورة المحترمة الزوجة الرائعة، واللي عايشة حياة مستقرة جدًا مع جوزها تومي لي جونز الوقور جدًا الروتيني جدًا.
فيلم Great Hope Springs اللي بحكي عنه النهارده، بيحكي عن الروتين لما يتسرب من تحت عقب الباب ويخلي الحياة عبارة عن فطار بارد والزوج بيقرا الجرايد، والزوجة واقفة ع الحوض، ثم بوسة روتينية ع الخد والزوج والزوجة خارجين كل واحد لشغله، ثم غداء صامت تمامًا، ثم الزوج والزوجة يناموا كل واحد في غرفة منفصلة.
كل ده من غير ما يكون حاصل بينهم أي مشاكل من أي نوع، بس الكلام خلص، الولاد كبروا واتجوزوا وسابوا البيت للزوج والزوجة والصمت.
كانوا بيحبوا بعض زمان، بس مع الوقت، كل حاجة بتبرد، الكلام والحب والتفاعل والحاجات المشتركة، مبيفضلش بينا غير الكلام عن الشغل في جمل مقتضبة، وممكن نتكلم عن أحوال الدنيا، وبعدين بنتعب من الجري ف الحياة فبنترمي ع السرير ونستنى بكرة ييجي عشان ندور في نفس الساقية، ونصحى ف يوم من الأيام نلاقي نفسنا زي ميريل ستريب ف الفيلم وهي بتسأل زميلتها في الشغل “هو ممكن نرجع الشغف تاني للجواز؟” ونتفاجئ لما زميلتها تقولها مينفعش.
بيدور الفيلم في كادرات حلوة، ملابس بسيطة لست تقول للقمر قوم وأنا أقعد مطرحك بس فاهمة كويس إنها مش مثيرة، رتم الفيلم هادي جدًا، ينفع أوي تشوفيه وإنتو قاعدين في كنبة مريحة قدام التليفزيون وكوبايات النسكافيه ع الترابيزة قدامكم، ولو مش بتحبوا النسكافيه ووراكوا شغل الصبح ممكن شاي بلبن عادي.
عايزاكي تركزي في كلام المعالج اللي قررت ميريل ستريب تروحله عشان يحاول معاهم في حل مشاكلهم الزوجية، وتفكري إزاي ممكن ترتبوا أجازة إنتي وجوزك بفلوس قليلة، وتقدروا بيها تروحوا مكان تاني وتنزلوا في أوتيل رخيص، مش لازم تسافروا بلد تانية، ممكن أوي محافظة تانية هادية، بس متسرحيش أوي وإنتي بترتبي الأجازة عشان ميفوتكيش الفيلم.
الأجازة ف الفيلم كانت لازمة علشان يقابلوا المعالج، إنما إنتي وجوزك مش لازم تروحوا لمعالج، بس ممكن أوي تاخدوا أجازة، كمان ممكن تركزوا في كلام المعالج وتنفّذوه، اتكلموا، قولوا نِفسكم ف إيه، الفيلم مفيد جدًا للأزواج اللي لسه بينهم حاجات متقالتش ورغبات متنفذتش وأحلام لسه بنحلم بيها ف سرّنا.
ركزي في إنك مش لازم تعيشي موقف ميريل ستريب وهي خارجة من السينما بتبكي وبتقول إنها مش مثيرة، وتفهمي موقف تومي لي جونز في الفيلم واستنتجي متطلبات الزوج اللي عاش طول حياته يأمن لعيلته حياة كويسة ونسي أو تناسى إن كان عنده أحلام بسيطة أوي، وإنتي كمان تجاهلتيها.
قرري إنك تعملي شوية تمرينات من اللي ميريل ستريب وتومي لي جونز كان المفروض يعملوها في الفيلم، اعملوها على سبيل التهريج أو التغيير، أو اعمليها عشان عجباكي.
الفيلم حلو، وملهم جدًا، ورغم إنك ممكن قلبك ينقبض لما تشوفي دموعها في الفيلم لما تكتشف إن جوزها مش بيبصلها كتير وبالتالي مبيحبهاش رغم إنها بتحاول، إلا إنك هتبتهجي جدًا لما تشوفيها بتضحك من قلبها وهي واقفة في حضنه لما نسي الشنطة وهو خارج الشغل في آخر لقطة في الفيلم.
عيشي وقت لطيف طول ما إنتي بتتفرجي ع الفيلم، خدي أجازة من رخامة الدنيا وعيشي ف كادرات المدينة الساحلية اللطيفة اللي الفيلم بيدور فيها، وجربي تعملي فراولة محشية شوكولاتة زي اللي كانت في الفيلم.
الفيلم حلو، ورغم إنه ممكن يكون موجع لبعض الناس اللي بيعانوا من نفس المشاكل، إلا إن الوجع أول سكة العلاج، ممكن أوي الفيلم ده هو اللي يخليكي تقرري تغيّري حياتك وتعيشي جواز سعيد.
ممكن أوي الفيلم ده هو اللي يخليكي تحسي إن لسه فيه أمل، وعلى فكرة الفيلم واخد تقييم عالي أوي على IMDB يعني في كل الأحوال مش هتندمي.
بس لو استفدتي، ابقي ادعيلي.
