أنواع المايوهات واشكالها: ازاي تشتري المايوه المناسب ليكي؟

نصف متعة البحر والمصيف، في اختيار مايوه مناسب وعملي ومريح، ميكدركيش على الشاطئ أو حمام السباحة. زمان كانت رحلة البنات لشراء المايوهات صعبة، كأنك بتدوري على إبرة  في كوم قش، خصوصًا لو عايزة مايوه خامته كويسة، ومناسب لشكل جسمك أيًا كان، ومش بآلافات الجنيهات، ويا سلام لو كنتي محجبة، يبقى كدة صعوبة الرحلة كملت.

مؤخرًا حصلت طفرة في صناعة المايوهات، لما الماركات العالمية الشهيرة للملابس الرياضية اهتمت بتصنيع مايوهات “البوركيني”، أو مايوه المحجبات المحتشم، وموديلات مناسبة أكتر لأجسام الستات العادية

وده لأن الاختيارات كانت محدودة جدًا، يا إما الشراء من محلات الماركات الرياضية الشهيرة، أو محلات بتصنع مايوهات بخامات رديئة جدًا، وبدون مراعاة لأشكال أجسامنا. فالنتيجة تكون إننا قاعدين على البحر شبه سلاحف النينچا حرفيًا، وقد التصق المايوه بجلدنا للأبد، وهو شايل رملة ومية تكفي للصيف الجاي.

مؤخرًا حصلت طفرة في صناعة المايوهات، لما الماركات العالمية الشهيرة للملابس الرياضية اهتمت بتصنيع مايوهات “البوركيني”، أو مايوه المحجبات المحتشم، وموديلات مناسبة أكتر لأجسام الستات العادية، اللي مش لازم يبقوا موديل عشان يلبسوها. والطفرة انتقلت لظهور ماركة عالمية بتصنع النوع ده تحديدًا من ملابس البحر، زي Lyraswim، وهكذا بدأت تظهر ماركات مصرية كويسة جدًا، مخصصة لكل نوع من أنواع المايوهات أو بدل السباحة.. ومن هنا ظهر التنوع، والدنيا احلوت وبقى من حق الجميع الحصول على مايوه مناسب في الشكل والسعر، ويستمتع بمصيفه على طريقته.

ومع ذلك لسّة بتواجهنا الحيرة مع بداية كل صيف: إزاي نشتري المايوه المناسب؟ ومنين؟ وبكام؟

كيف تشتري المايوه المناسب (أهم 8 نصائح)

نبدأ بـ8 نصايح مهمة وإنتي بتشتري المايوه، سواء كان بوركيني أو بيكيني أو مايوه القطعة الواحدة one piece:

أول وأهم نصيحة: الغالي تمنه فيه

تعاملي مع المايوه إنه قطعة من قطع الملابس اللي بتعيش عُمر، صحيح ممكن تستخدميها أسبوع بس في السنة، لكن ممكن تعيش معاكي سنين لو كانت خامتها كويسة ومناسبة لمقاسك، خاصّة إن أسعارهم بتزيد كل سنة.

استثمري في شرا مايوه خامته جيدة، ومريح ويناسب كل وقت، وصدقيني مش هتندمي على فلوسك أبدًا.

المايوهات رخيصة الثمن على آخر أجازة المصيف بتكون خياطتها اتقطعت وفكت، أو على أقل تقدير بتكدرك على الشاطئ وجوة البحر.

اقرئي أيضًا: أفضل أماكن للمصيف في مصر

اشتري المناسب مش الموضة

بناء على النصيحة الأولى اشتري المناسب ليكي. السنة دي الجليتر والنيون والألوان الجريئة موضة في المايوهات،

لكن ده مش معناه إنها هتستمر، أو إنها هتبقى مناسبة ليكي، افتكري إنك بتدفعي مبلغ مش قليل في قطعة المفروض تعيش معاكي.

وممكن تخليها مواكبة للموضة بشوية أكسسوريز، من ضمنها الـCover-up أو الكاش مايوه.

تعرفي على: دليل سوق العتبة للتوفير

ألوان المايوه المفضلة

الألوان السادة الغامقة هي الأنسب لمختلف الأجسام، وهي كمان الأشيك والأرقى والأكتر سهولة في تنسيق أكسسورات لطيفة معاها ع البحر، الأسود ملك الموضة كمان في المايوهات بلا منافس.

اختاري المايوه المريح والعملي

لو بكيني فاختاري شكل البكيني اللي تحسي بالثقة وإنتي لابساه، ولو قطعة واحدة اختاري الشكل اللي يناسب شكل جسمك

ولو بوركيني فالقطعتين أنسب اختيار، مثلاً السالوبيت الكامل وعليه قطعة من فوق، سواء تونيك أو كاش اختيار عملي وأنيق. ومتنسيش تختاري بونيه البحر المناسب للمايوه، من حيث اللون والشكل.

اقرئي أيضًا: لكل مُدمن على الشراء: 10 أسئلة و5 قواعد

اشتري مايوه البوركيني

يُفضل إنك تشتري مايوه مخصوص للمحجبات، مش تجمعي قطع منفردة مختلفة، وده لأن خامة وتفصيلة مايوهات المحجبات بتختلف عن التفصيلة العادية، في شكل البنطلون والقطعة العلوية، بحيث متكونش ضيقة جدًا أو بتلزق على الجسم بشكل ملفت للنظر.

زي الملابس العادية

نفس قواعد إخفاء عيوب الجسم في الملابس العادية، يسري على المايوهات: المنقوش لو رفيعة، والسادة أو المخطط بالطول لو فيه أماكن ممتلئة شوية، والسادة بخطوط بسيطة لمختلف الأجسام.

خلي بالك من الخامة

وإنتي بتشتري المايوه، خلي بالك كويس من خامته، تقيلة؟ بتشف؟ التقفيل بتاعه كويس ولا أي كلام؟ وكذلك مقاسه مناسب ليكي ولا ضيق ولا واسع بزيادة؟

وجربي مقاس أكبر وأصغر درجة، لحد ما ترتاحي، لأن قياسات المايوهات بتختلف تمامًا عن القياسات المعتادة لهدومنا العادية. عمومًا المايوه المناسب هو اللي لما تقيسيه تحسي إنك مرتاحة تمامًا.

وجربي بإيدك حركة السباحة (متخافيش مش هيقولوا اتجننت) لو حسيتي إنك متكتفة أو بتعومي جواه الأول، يبقى مقاسه مش مناسب.

اقرئي أيضًا: كيف اشتري بنطلون جينز؟ 7 نصائح لاختيار بنطلون جينز

متشتريش مايوه أونلاين

متشتريش مايوه أونلاين إلا في حالتين، كانت ماركة معروفة ومجربة مقاساتها في الملابس الرياضية، وفي size chart موضح الطول والعرض، والوزن المناسب لكل مقاس.

أو لو فيه إمكانية تجربة المنتج قبل الدفع، يعني إنك تفتحيه وتقيسي أو تشوفي مقاسه مرأى النظر. عشان زي ما اتفقنا مقاساتنا في المايوهات مختلفة عن الملابس العادية.

ودلوقتي الخطوة التانية: نشتري المايوهات منين؟

البكيني والـOne piece

لو بتدوري على مايوه بكيني أو قطعة واحدة، فالاختيارات لا حصر لها، من أول ماركات الملابس الرياضية المشهورة زي Nike, Addidas, Active, Speedo, مرورًا بماركات الملابس النسائية،

زي فيكتوريا سيكريت، لا في إن روز، دبنهامز، وومنز سيكريت، أوشيو، بالإضافة لمحلات الملابس العادية، زي إتش آند إم، وLCWikiki ومحلات أوتليت الملابس الرياضية، وأغلب ماركات الملابس المعروفة، واللي ممكن تكوني بتشتري منها هدومك بشكل دوري.

المهم إن الاختيارات واسعة ومش محدودة أبدًا، والأسعار كمان متفاوتة من أول 250 جنيه لحد ما شاء الله بقى، وحسب ذوقك واللي تحبيه.

البوركيني

أما لو بتدوري على بوركيني، ف دي خلاصة تدويري، أنا وبنات كتير، على أماكن وصفحات أونلاين، بتقدم مايوهات محجبات خامتها رائعة وأسعارها مقبولة بالنسبة للجودة.

Lyraswim

ودي ماركة عالمية متخصصة في النوع ده من المايوهات، ليها أماكن بتبيعها في مصر، وصفحات أونلاين، لكن برضو التقليد منها كتير. لو ليكي حد مسافر خارج مصر هيجيبهالك بسعر كويس، تقريبًا ما يعادل 1500 جنيه أو أكتر حاجة بسيطة، وده سعر معقول قوي بالنسبة للخامة والشكل اللي هتاخديه. ممكن ميكونش مناسب للبعض لكنه أكيد يستاهل تمنه.

Dandona

ودي سلسلة محلات، بتبيع مختلف قطع وأنواع المايوهات والكاش مايوه، لها فروع في مصر الجديدة ومدينة نصر. الأشهر على الإطلاق في مايوهات البوركيني، كلها صنع في مصر، خامتها جميلة. بشكل شخصي عندي مايوه من 5 سنين ولسة بنفس جودته، رغم الاستهلاك. أسعارهم بتكون بالقطعة، المايوه كامل متوسط 350 :600 جنيه، حسب المقاس والشكل وعدد القطع.

مودانيسا

ودي ماركة ملابس تركية، تقدري تطلبي منها أونلاين، لكن لازم تكوني متأكدة من مقاسك بالظبط، وكمان احسبي الجمارك والشحن كويس. وSpeedo: ماركة الملابس الرياضية المعروفة، نزِّلت مؤخرًا أشكال رائعة لمايوهات البوركيني، بسيطة وشيك وأسعارها بتبدأ من 800 ج.

محلات النصر للرياضة

عندهم تشكيلة ظريفة جدًا لمايوهات البوركيني وخامتها حلوة، خصوصًا للمقاسات الكبيرة، أسعارهم بتبدأ من 400: 850 جنيه. وintersport محلات إنترسبورت الرياضية وعندهم جميع أنواع المايوهات. وديكاثلون: ماركة معروفة في الملابس الرياضية لكن تعُد من الماركات الغالية في السعر. بالإضافة لوجود بعض أشكال البوركيني في الماركات الرياضية المشهورة، زي نايك وأكتيف، تقدري تشتريها من على مواقع سوق وجوميا، أو الوكيل المباشر للماركة في مصر.

بالنسبة للأونلاين فدي مجموعة صفحات، مُجربة في تصنيع البوركيني بخامات ممتازة، وأشكال عصرية وأسعار المايوهات بتتراوح من ٧٠٠ ل ٩٠٠ جنيه، مكونة من قطعتين بدون بونيه: LakunaSwim على الفيسبوك، Sea Blush على إنستاجرام، Glo على الفيسبوك، Rakmaga ركمجة، Hydro. أما بونيهات البحر سواء التيربون أو العادي أسعارها بتبدأ من ٥٠ جنيه وصولاً ل ٧٥ جنيه في محلات الإيشاربات والملابس الرياضية والنسائية، وتبدأ من ٣٠٠ جنيه في محلات الملابس الرياضية الماركات الشهيرة.

تشتري إمتى المايوه؟

دايمًا التوقيت الأمثل هو وقت التخفيضات، في نهاية موسم الصيف. يعني من دلوقتي ولنهاية سبتمبر، تبدئي تشتري للصيف الجاي. ابعدي عن بداية الموسم، لأنك هتلاقي الأسعار عالية والمقاسات خلصانة. وافتكري دايمًا.. البحر يحب الصور والذكريات، والصور الحلوة يلزمها مايوه حلو ومريح، حتى لو هنلعب بيه ع الرملة.