من فترة صغيرة بنتي دخلت الحضانة، وحضانة يعني نزول كتير، يعني شنطة وهدوم كتير وجزم كتير، يعني فلوس كتيييير.. ولما جيت أستعد لدخول الشتا لقيت جواكيت الأطفال أسعارها في متناول المواطن الحرامي.
وبعد الكثير من ضرب الأخماس ف الأسداس وترتيب الميزانية وتحديد الأولويات افتكرت سوق الشنط اللي ف العتبة.
منطقة العتبة وما حولها اتولدت واتربيت ودخلت مدرستي فيها، ومن خبرتي أقدر أقول إن العتبة ممكن تستقل اقتصاديًا بكل الأسواق اللي فيها، هتغنيكي عن النزول لأي مكان تاني، كل حاجة تقريبًا البيت بيحتاجها موجودة بأسعار قريبة من سعر الجملة.
ولما لقيت المشكلة واصلة لمعظم الناس ومحدش بقى قادر ينكر الأزمة أكتر من كده، فكرت إن ممكن جولة داخل دهاليز العتبة نتعرف فيها على الأسواق.
لو ركبتي المترو ونزلتي محطة العتبة وتطلعي على جراج العتبة.
ابتدي بسوق الأحذية والملابس
جنب صيدناوي الخازندار فيه سوق البواقي، أحذية ماركات وبواقي محلات وسط البلد، بأقل من نص السعر. وشباشب البيت لسة بـ7 ونص هناك.
ده عن الأحذية والشباشب، لكن الشنط المميزة هناك مش كتيرة، فلو مشينا جوة الموسكي شوية هنلاقي سوق الشنط، فيه كل أنواع الشنط، من أول شنط المدارس لحد شنط السفر، بأسعار قريبة من سعر الجملة.
نصيحتي عن تجربة.. بلاش أحذية غالية إلا لو ماركات أو جلد طبيعي، غير كده هاتي أرخص حاجة.
وأما تخرجي م الحارة اللي فيها سوق الشنط، هتبقي ف شارع الموسكي نفسه، هتلاقي ملابس للبيت ولانجيري وملابس أطفال وطرح، وطبعًا اتعلمي الفصال قبل ما تنزلي ومتدفعيش قبل ما تسألي ع الأسعار عند أكتر من مكان.
تعرفي على: أساسيات لبس الجامعة واجمل تنسيق ملابس الجامعة
المفروشات
في الجهة المقابلة لسوق الشنط ادخلي من أي حارة وامشي ف اتجاه العتبة، هتلاقي سوق للمفروشات والستاير. لكن يُفضّل يكون عندك خلفية عن الأسعار قبل ما تنزلي، لأن البياعين هناك أساليبهم مقنعة.
اللعب والهدايا
بلاش ألعاب من الهايبرماركت أو الستورز العالمية، لأنك بتدفعي سعر الاسم، مش سعر الفايدة اللي هتعود على طفلك.
لعب الأطفال مش رفاهية، دي جزء من تعليمهم وتأهيلهم لمشوار المدارس، وعشان الأسعار المبالغة لألعاب تنمية المهارات ممكن نتوجه لحارة اليهود. اشتري الألعاب المناسبة لعمر طفلك في المرحلة الجاية، فيه سوق هناك اسمه سوق اللعب، هو أصلاً سوق جُملة لكن بنشتري منه قطاعي بسعر الجملة.
في حارة اليهود برضو فيه سوق الهدايا، ممكن تشتري من هناك أي هدايا للمناسبات اللي عندك، زي عيد الأم وأعياد الميلاد.
ادخلي أكتر من محل واعرفي الأسعار قبل ما تقرري تشتري.
تعرفي على: 15 هدية تناسب صاحبتك لو جابت عربية جديدة
تعرفي على: كيف تشتري المايوة المناسب؟
المكياج والأكسسوار
جمهورية العتبة الخضرا منستكيش، ووفرت سوق لمنتجات العناية الشخصية. عشان متنسيش نفسك وتدلعيها ممكن قبل ما ترجعي من مشوار حارة اليهود، عدِّي على شارع بور سعيد، هتلاقي كل المكياجات كوبي وهاي كوبي بأسعار كوميدية جدًا، هتعرفك قد إيه كان بينضحك علينا سنين كتير، وفيه هناك أكسسوارات مميزة جدًا بنص تمنها وأقل من النص كمان.
تعرفي على: 8 خطوات لتحصلي على قطعة القماش المثالية لتفصيل الملابس
لوازم المطبخ
لو محتاجة لوازم للمطبخ والسفرة، طبعًا وجهة مصر كلها حمام التلات، ده عند جامع البنات ف شارع بور سعيد برضو، اشتري لوازم جديدة لمطبخك ودلَّعي سُفرتك
لكن أهم حاجة ابعدي عن مواسم جهاز العرايس، وهي دخول الأعياد ودخول الصيف.
وكالعادة اسألي في أكتر من محل على الأسعار قبل ما تشتري حاجة. وبلاش تشتري من المحلات القريبة من الشارع العمومي.
ولو محتاجة رفايع بسيطة للمطبخ هتلاقي بياعين جائلين بسعر موحد، بينادوا “أي حاجة ب7 ونص، أي حاجة ب3ونص”، تقدري تلمي من عندهم كنوز.
البقالة
لما ترجعي من حمام التلات للعتبة تاني، هتمشي من شارع الأزهر، على إيدك الشمال فيه شارع جانبي بيخرّجك على شارع محمد علي، أهو الشارع الجانبي ده سوق للبقالة والأجبان والمخللات واللحوم المصنعة، وكل خزين المطبخ بسعر أرخص هايبر ماركت ف مصر
مش محتاجة تسافري لمدينة أكتوبر أو طريق الإسماعيلية عشان تشتري خزين البيت وهو هنا جنبك ف العتبة.
وعلى الهامش ف نفس الشارع ده فيه محلات لأكسسوارات الموبايل أرخص من عبد العزيز وأضمن.
تعرفي على: دليلك الكامل للتسوق لاحتياجات المنزل
الديكورات
في طريق عودتك للمترو هتمري بتقاطع هيبقى على يمينك مدخل شارع الجيش، وعلى شمالك بوستة العتبة، لو بصيتي ناحية شارع الجيش على درب البرابرة عند محلات لوازم السبوع وسوق النجف
ممكن تاخدي فكرة عن الديكورات واللمسات المميزة للبيت زي الأباجورات والتابلوهات الكلاسيكية والمودرن. وكل ما تدخلي في الحواري الضيقة أكتر هتلاقي محلات أرخص، والفصال هناك عالي جدًا.
أما لو بصيتي ع الشمال عند البوستة وبالنسبة للبياعين اللي على عربيات، موديلاتهم مميزة لكن جودتها قليلة، ممكن لو هتشتري نجف مثلاً غيَّري دايرة السلوك قبل الاستخدام بسلوك ودواية أقوى.
العطور
بعد ما تخرجي على ميدان العتبة تاني وراجعة للمترو بالغنائم، هتقابلي محلات تركيب العطور والفوَّاحات ومعطرات الجو، والبخور الهندي هناك مميز جدًا.
فيه عدد محلات على الشارع العمومي وفيه محلات متواضعة أكتر جوة منطقة الرويعي، لكن خلي بالك هي مش قريبة قوي.
الكتب والأدوات المكتبية
آخر حاجة قبل ما تنزلي سلم المترو، هتعدي على سور الأزبكية، سوق الكتب والأدوات المكتبية، وعن الكتب القديمة والطبعات المميزة حدِّث ولا حرج طبعًا.
تقدري تقومي بالجولة دي كل فترة تشتري فيها لوازم المرحلة الجاية. ولو محتاجة تشتري منتجات كتيرة فالزيارة دي هتوفر معاكي كتير. أهم حاجة حاولي تبعدي عن أوقات المواسم (دخول المدارس، بداية الصيف، بداية الشتا، الأعياد)، لأن الأسعار بتكون أعلى والفصال صعب والشوارع زحمة، ده غير إن المنتجات اللي جودتها أقل بتنزل ف أوقات الزحمة عشان الباعة يتخلصوا منها. أفضل وقت للشوبينج هناك -عن تجربة- بعد نهاية أي موسم بفترة صغيرة.
