منار
كنت بتفرج على فيلم “أكل.. حب.. صلاة”، بتاع جوليا روبرتس، اللي بتسافر فيه إيطاليا عشان تجرب تتفسح وتجرب أكلات جديدة بعد ما اتطلقت من جوزها اللي مش متفاهمة معاه.. في الفيلم ده مشهد بحبه قوي، كانت جوليا فيه قاعدة مع واحدة صاحبتها وبياكلوا بيتزا، وصاحبتها كانت خايفة تاكل عشان بنطلوناتها كلها ضاقت عليها من كتر الأكل. جوليا قعدت تقنعها إن البيتزا أهم بكتير من شكلها، ولما اقتنعت قالتلها: “إذًا فلننهِ هذه البيتزا ونذهب لشراء جينز جديد”. آه والله زي ما بقولك كده، من غير خطط مسبقة ولا تفكير كتير، ببساطة جدًا هيخلصوا البيتزا ويروحوا يجيبوا بنطلون جينز جديد، وكأن شراء البنطلون الجينز ده حاجة سهلة.
عزيزتي جوليا.. مكانش حد غُلُب!
إنتي عارفة أنا كام مرة جبت جينز جديد وطلع شكله مش حلو عليّ؟ كام مرة البنطلون بقى شكله واسع وأهبل بعد أول لبسة مع إنه كان مظبوط أول ما اشتريته؟ كام مرة لون الجينز طلع مش لايق على أي حاجة في هدومي؟ كام مرة مكانش معايا فلوس كفاية أشتري بنطلون جديد؟ الموضوع مش بسيط كده يا ست جوليا! أنا قعدت سنين أعاني من الموضوع ده. أنا وصل بيّ الحال إني بتفرج على بنطلونات البنات اللي ماشية في الشارع عشان أعرف دي مشكلتي لوحدي ولا فيه حد غيري كده.. والحقيقة إني اكتشفت إن مش أنا بس اللي كده، للأسف إحنا كتير. بس أنا قررت مستسلمش وقعدت أفكر المشكلة فين، وجبت البنطلونات اللي عندي كلها وقعدت أقيسها وأكتب هي ليه مش حلوة عليّ، لحد ما طلعت بسبع حاجات لازم آخد بالي منها وأنا بشتري بنطلون جينز.
تعرفي على: دليل سوق العتبة للملابس
أول حاجة لازم تخلي بالك منها -عزيزتي جوليا- لا للوسط الساقط
اللي اخترع الوسط الساقط أكيد قصده يفكرنا إننا عندنا كرش، حيث إن الوسط الساقط ده بيلم الجناب اللي بتعملنا وسط وبيرفع البطن فبتعمل كرش حلو كده حتى لو معندناش كرش، ده غير إن الوسط الساقط ده اتعمل عشان يتلبس على بلوزة قصيرة عشان البطن تبان، وأكيد يا جوليا لو كنتي خلصتي البيتزاية مش هتبقي عاوزة بطنك تبان.
تاني حاجة.. خلي بالك.. بلاش بنطلونات فاتحة قوي
البنطلون الفاتح ده زي الروج الغامق بالظبط، بيبين الديفوهات، الديفيوهات اللي في الجسم والديفوهات اللي في اللبس كمان، فلو إنتي لابسة بلوزة خامتها مش حلوة البنطلون الفاتح هيبيّن ديفوهاتها وهتبان رخيصة، البنطلون الغامق بيرفَّع وبيليق على كل حاجة، ودايمًا شكله قيم حتى لو خامته مش قد كده.
تالت حاجة شجّعي المصري
آه والله زي ما بقولك كده، شجعي المصري.. لسببين: الأولاني إن مقاسات البنطلونات المستوردة التركي والصيني تعقد، لأنها صغيرة جدًا وبجد هتحسي بإحباط فظيع كل ما تطلعي بنطلون وتلاقي البنت اللي في المحل (اللي هي مش أرفع منك خالص على فكرة) بتبصلك من فوق لتحت وتقولك مقاسك مش موجود.
الحاجة التانية بقى اللي بتميز الجينز المصري هي السعر. بجد سعر البنطلون الجينز المصري أقل من نص سعر المستورد، وعلى فكرة الخامة ممتازة. هو الجينز إيه غير قطن معالج؟ وأحسن قطن بيستوردوه من عندنا على فكرة.
طيب البنطلون الجينز ده ألاقيه فين؟
في القاهرة موجود في شارع الشواربي في وسط البلد، وشارع ضياء في الهرم، وطبعًا كلنا عارفين الوكالة كويس، ومحلات من اللي بتبيع بواقي التصدير، ومحلات لبس المحجبات، وأي محلات بتبيع لبس صنع في مصر.
الرابعة بقى في رأيي من أهم الأسباب اللي بتخلي البنطلون شكله وحش.. الإضافات
الفصوص.. الجيوب الكتير.. الكَمَرين اللي فوق بعض.. العروسة والدبدوب ونانسي عجرم الملزوقين على رجل البنطلون.. كل الحاجات دي بترخّص البنطلون قوي، سيبك منها وخليكي في البنطلون التقليدي.
وخللي بالك.. الرجل الواسعة طلعت موضة تاني.
الخامسة بقى حاجة تقريبا كلنا بنقع فيها.. متجبيش البنطلون المظبوط عليكي
هاتي البنطلون اللي دخل فيكي بطلوع الروح، أي بنطلون جينز بيوسع نمرتين على الأقل بعد أول لبسة، فالبنطلون اللي ضيق عليكي انهارده هيبقى مظبوط عليكي بكرة، والمظبوط هيبقى واسع وشكله وحش عليكي، حتى لو هتجيبي موديل “البوي فريند” جينز، هاتي الوسط اللي قفل بالعافية.
السادسة بقى.. هاتي البنطلون اللي فيه استرتش شوية
عشان لو تقلتي على العشا البنطلون ميضايقكيش، ولو قدامك بنطلونين زي بعض واحد بزرار وسوستة وواحد بأستك هاتي اللي بأستك، بيلم البطن أحسن وعمره أطول. الزراير بتتخلع بسرعة وكمان بيبقى شكله أظبط.
سابع وآخر حاجة.. لو البنطلون طويل متروحيش تقصريه عند الترزي
أشيك كتير إنك تتني رجل البنطلون لبرة، اتنيه تانيتين صغيرين، وكمان طالعة موضة جدًا، ده غير إن الخياطة بيبان قوي الفرق بينها وبين خياطة البنطلون الأصلية.
عزيزتي جوليا روبرتس.. خلّي بالك من السبع حاجات دي وإنتي بتشتري الجينز.. وهيا بنا ننهي هذه البيتزا.
