لو صاحبتك جابت عربية جديدة، دي الحيرة الحقيقية اللي بتبدأ جواكي كصديقة عاوزة تجيب هدية حلوة لصاحبتها، لكن مش عارفة إيه اللي ممكن تحتاجه عشان تجربتها في السواقة لأول مرة تكون سهلة ومريحة، وتكوني جزء من الشعور الطيب ده، كل لما تشوف هديتك تفتكرك.
شرا العربية في حياة أي بنت حدث استثنائي، إنها تدخل عالم السواقة، تطلَّع رخصة وتشتري شيء بيمشي على أربع عجلات، خوف على فرحة على قلق على ارتياح، مشاعر متضاربة بتخليها تفتكر كل تفاصيل اللحظات الأولى.
للأسف فيه مجموعة من الهدايا اللي بتخطر على البال كهدايا تلقائية لأي حد اشترى عربية، في مقدمتها الدلاية اللي بتتعلق في المراية، واللي للأسف ممكن تكون واحدة من أسوأ الهدايا، لأن من قواعد السلامة المرورية إن اللي بيسوق ميحصلش له تشتيت ولا حاجة تلفت نظره هن السواقة، فلكِ أن تتخيلي حجم الأذية اللي ممكن تحصل لبنت بتسوق لأول مرة، وتروحي تجيبيلها دلاية كلها تفاصيل وألوان تشتتها وتخليها مش مركزة في أوقات ممكن تكون حاسمة، وطبعًا مش محتاجة أتكلم عن الدباديب ومفارش التابلوه، اللي مش بتعمل حاجة غير إنها تلم تراب وتخلي عربيتها شبه عربيات السفر البيجو القديمة.
تعرفي أيضًا على: ماذا تشترين كهدية للرجل؟
طيب أجيب إيه؟
ده السؤال اللي هنجاوب عليه، بـ15 اقتراح لهدايا ممكن تجيبيها لصاحبتك لو جابت عربية جديدة، وبالأسعار كمان، مهما كانت إمكاناتك أو الفلوس اللي معاكي هتقدري تهاديها بهدية تساعدها وتريحها وتخليها تفتكرك مع كل استخدام، تقدري تجيبيها بزيارة خاطفة لسوق التوفيقية في وسط البلد، أو بياعين كماليات السيارات في منطقتك، أو حتى أونلاين من بياعين أفراد أو مواقع كبيرة زي سوق وجوميا.
1. غطا
في زحمة شرا العربية هي هتنسى أكيد تجيب غطا، أو هتنزل تغلط الغلطة الشهيرة وتجيب غطا قماش عادي يبهدلها، للأسف الأغطية القماش مش بتحمي العربية، هي بتغطيها بس، لكن بتنزل التراب عليها، ولو الدنيا مطرت العربية بتتكسي بطبقة من الطينة، طيب إيه الغطا اللي هيريحها؟
“الووتربروف”، أو غطاء مقاوم للمياه. بيتباع عند تجار كماليات السيارات، وكمان أون لاين. تمنه مش قاتل لكن كمان مش قليل، بيبدأ من 300 جنيه للأحجام الصغيرة للعربية وبيوصل لـ500 لو حجم العربية أكبر، وبرضو إنتي وشطارتك والمكان اللي بتشتري منه.
2. كارسيت
لو صاحبتك عندها أطفال، سواء رُضَّع أو كبار شوية، واحدة من الهدايا العبقرية اللي ممكن تشتريها وهتفضل تدعيلك مع كل استخدام، هو “الكارسيت” أو كرسي العربية، ده بيكون مخصص للأطفال، بيتثبت بطريقة معينة الطفل يقعد فيه والأم تقدر تسوق بدون ما تبقى خايفة طفلها يقف أو يتقلب أو تفضل تبص عليه كل شوية.
الكارسيت نوعين، نوع للعمر الصغير لحد سن سنتين تقريبًا، ونوع للعمر الكبير لحد 7 أو 8 سنين، وأحيانًا 9، بيكون مؤمَّن بقفل معين يحمي الطفل ومبطَّن بشكل يريحه في القعدة، ويخليها مش قلقانة عليه.
تعرفي أيضًا على: 10 هدايا ممكن تشتريها للراجل في آخر لحظة
طيب أسعارهم إيه؟
الكارسيت أنواع كتير جدًا وأشكال وألوان بلا حصر، عندك اختيارين: تجيبيه جديد، أو مستعمل بحالة كويسة. أرخص نوع بيكون موجود في محلات التوحيد والنور وعند بعض المحلات تمنه 320 تقريبًا، وده بيكون بسيط جدًا، درجة الأمان فيه مش عالية لو لا قدر الله حصل حادثة، لكن هو بيقضي الغرض وبيريح الطفل وأمه، وفي نفس المحلات هتلاقي أنواع تانية جديدة من نوع “جراكو” بالذات لأنه النوع الأكثر انتشارًا، تمنه مش بيزيد عن 550، وبرضو بيكون كويس ومقبول، وطبعًا إنتي ومقدرتك.
بالنسبة للمستعمل فهو مش أرخص ولا حاجة، لأن أسعاره أحيانًا بتوصل لألف وأكتر، لكن الفكرة إنه بيكون مفيد في الماركات المشهورة اللي تمنها الأصلي مثلاً 3 آلاف فأكتر، في الحالة دي تقدري تجيبيها بأقل من نص التمن، لو بتدوري على الاسم بصرف النظر جديد أو قديم، ومتقلقيش مهما بدا الكارسيت متبهدل، الكسوة الخارجية ممكن تتخلع بسهولة وتتغسل ترجع جديدة.
3. مج حراري
عارفة اللحظة اللي بتصحي فيها وتبقي نفسك تشربي حاجة، بس مش هتلحقي لأنك لازم تنزلي فورًا تروحي شغلك؟ دي لحظة استثنائية في اليوم وبترسمه، فيكون حلو أو كله توتر. تقدري تكوني جزء من اللحظة دي، بإنك تختاري نوع مج حراري كويس، أو تُرمُس صغنن تقدر صديقتك تحط فيه مشروبها المفضل وتشربه وهي ماشية في الطريق، اللي عادة بيكون واقف الصبح. هتدعيلك.
أسعار المجات والترامس مختلفة، مثلاً مج ستارباكس الأصلي بيقارب الـ600 جنيه، لكن مش بنرشحه لأنه بيتكسر بسرعة، فيه مجات تانية أسعارها بتبدأ من 25 جنيه. الترامس بتؤدي نفس الغرض وأرخص كتير. الحجم اللي بنتكلم عنه مش هيزيد عن 150 جنيه على أقصى تقدير.
4. حامل مج حراري
لأن الشيء لزوم الشيء، ورغم إن المج أو التُرمس هيكون ليهم غطا محكم، لكن حامل المشروبات في العربية من الرفاهيات المبهجة اللي بتخلي الشخص حاسس بسعادة. أسعارها مش بتكون عالية قوي، من 25 لـ50 على أقصى تقدير. فيه نوعيات أغلى، بس بنتكلم في الممكن والمتاح.
5. سبراي تنظيف تابلوه
ده نوع من الاسبريهات مخصوص لتلميع التابلوه والأجزاء البلاستيك جوة العربية، تمنه بيتراوح بين 50 لـ100 جنيه حسب النوع، وصدقيني صديقتك هتستغرب إزاي خطرت على بالك وجبتي لها هدية تريح أعصابها وتخليها تتخلص من منظر التراب السخيف على التابلوه!
6. معطر بأنواعه
الريحة الحلوة في العربية بتريح الأعصاب، وفي البند ده عندك مليون اختيار تقدري تهادي بيهم صديقتك، لأن أشكال التعطير مختلفة، منها اللي بيتعلق في المراية (مش بنفضله) ومنها اللي بيترش. أشكال وأنواع مختلفة ومتفاوتة جدًا في الأسعار، من أول اتنين جنيه ونص لحد ما إنتي عاوزة، إنتي وذوقك وإنتي وإمكاناتك، وكفاية إنك بتفتكري في صديقتك.
7. وايبس ومناديل
أكتر حاجة بتتنسي، وأكتر حاجة هتحتاجها صديقتك جوة العربية، لو اضطرت تتعامل مع أي حاجة في العربية، أو حتى تلمع القزاز قبل ما تطلع، إيديها هتتوسخ وهتحتاج وايبس (مناديل مبللة) ومناديل عادية، وبرضو هتدعيلك. المناديل المبللة الحجم الكبير اللي بنتكلم عنه له غطا، بيبدأ من 13 جنيه وبيوصل لـ30 أحيانًا، والمناديل مش هتزيد عن 15 جنيه لو قررتي تجيبيلها نوع نضيف ريحته حلوة.
8. ميدالية لمفتاح العربية
فيه حيرة مخفية بتبدأ لما صديقتك تشتري عربية، أعلق المفتاح في سلسلة المفاتيح العادية ولا أخليه لوحده؟!
كأي بنت في الدنيا هتحس إنه لازم يكون لوحده، عشان كمية المفاتيح اللي في سلسلة المفاتيح الأساسية الخاصة بيها ممكن تكون تقيلة على الكونتاكت وتعمل مشكلة، لذلك الأفضل والأصح مفتاح العربية يكون لوحده، وطبعًا في الحالة دي هيحتاج ميدالية لطيفة وحلوة تساعدها تميزه وتلاقيه بسهولة في الشنطة الزحمة.
9. حامل موبايل
في بداية السواقة، التوهان بيكون سيد الموقف، ناهيك إن الرد على التليفون بيكون ضرب من الخيال، لأنها بتكون متوترة وخايفة جدًا. هتعملي فيها معروف لو قدرتي تجيبي لها حامل موبايل يخليها تشوف الخريطة بدون ما تتلبخ وتمسك الموبايل في إيدها، وترد على المكالمات المهمة من خلال السماعة الخارجية بدون ما تحتاج تحطه على ودنها.
10. فوطة مشحَّمة
طبعًا دي هتكون أغرب وأصعب وأجمل هدية في نفس الوقت، يعني إيه فوطة مشحمة؟ يعني فوطة مليانة شحم وزيوت وحاجات كتير من اللي بيستخدمها الميكانيكي. فايدتها إنها بتلمع العربية أفضل من أي فوطة تانية بسهولة شديدة، وكام مسحة منها بتخلي العربية تبرق.
بتتعمل إزاي؟ بتودي تي شيرت أو قطعة قماش كبيرة للميكانيكي، وبتطلبي منه يشحمها، ودي غالبًا هتكون ببلاش. صديقتك هتقدر تمسح عربيتها أو تديها للبواب أو عامل الجراج، يخلي عربيتها زي الفل بالفوطة السحرية الخاصة بيها هي بس دونًا عن غيرها.
11. قفل أمان للعربية
أكتر حاجة هتشغل بال صديقتك لما تشتري عربية هو الأمان، وإنها لا قدر الله متتسرقش. في الحالات اللي زي دي بيكون الحل هو قفل أمان للدركسيون أو العجل. قفل الدركسيون بيبدأ من 90 جنيه وصولاً لـ300 جنيه، أما قفل العجل بيكون أغلى، ممكن يوصل لـ 500 جنيه أو أكتر، لو اخترتي النوع ده من الهدايا فإنتي بتختاري راحة البال لصديقتك قبل أي شيء.
12. ملمع زجاج وفوطة تلميع
أرخص هدية وأفضل هدية في نفس الوقت، برقم ميزيدش عن 20 جنيه، حسب نوع الملمع. تقدري تشتري لصديقتك ملمع زجاج، وده هيساعدها تخلي قزاز العربية يبرق ويخليها ماشية نفسيتها مرتاحة.
ولأن الشيء لزوم الشيء، هتحتاجي فوطة تلميع، عشان تقدر تلمع الزجاج بالملمع اللي جبتيه، ودي تمنها بيتراوح من 10 لـ20 جنيه، حسب النوع والحجم.
13. بوكس بلاستيك
ده بقى أغرب حاجة ممكن تخطر على بال حد يجيبها، وأكتر حاجة هتريح نفسية صديقتك. مستلزمات تنضيف العربية كتير جدًا، أكتر من فوطة وأكتر من سائل، وكل ده هيحتاج يتحط في مكان واحد بشكل مرتب ميعملش دوشة في عربية، باختصار البوكس ده بوكس أدوات، تقدر تحط فيه كل المستلزمات اللي هتستخدمها جوة العربية بسهولة، ويوفر لها مساحة ويخلي الدنيا نضيفة ومرتبة ومش دوشة جوة شنطة عربيتها.
البوكس البلاستيك اللي نقصده هو نفسه اللي بيتجاب عشان يتحط فيه مستلزمات المدارس “السابلايز”، المتوسط منه بـ45 جنيه والكبير بـ65 جنيه.
14. نوتة وقلم
التواريخ الخاصة بالعربية كتير: تاريخ تزويد الزيت، تاريخ التفويل، تاريخ تجديد الرخصة، آخر مرة حطت مية… وغيره من الأرقام والتواريخ اللي صديقتك هتحتاج تحتفظ بيها عشان تقدر تتعامل مع عربيتها بطريقة مش عشوائية، وعلى أساسها تكون مرتبة وتحافظ عليها بشكل أفضل.
نوتة وقلم جوة درج التابلوه هيعمل فرق كبير بالنسبة لها، وهيساعدها وهيكون هدية كويسة وفي الصميم منك، وهتكلفك في حدود 20 جنيه.
15. ممسحة تنضيف
في بند التنظيف الخارجي للعربية إنك تجيبي لها ممسحة، بدراع طويل تنزل بيها التراب من العربية، ده اختيار عبقري، الممسحة الكويسة سعرها بيبدأ من 50 جنيه وبيوصل لـ100 جنيه، حسب النوع والمكان اللي بتشتري منه، وغالبًا بيكون لها جراب كويس تتحط فيه.
