محدش بيغلبنا في اختيار هدايا أكتر من الرجالة خصوصًا لو فيه أكتر من مُناسبة خلال السنة الواحدة حابين نهاديهم فيها بحاجة لطيفة، وفي نفس الوقت يحبوها ويستخدموها فعلاً.

من كام سنة كتبت مقال عن نفس الموضوع، وبما إن الأفكار اللي فيه دي من سنين، توقعت إنها أكيد اتغيرت كتير، وكمان احتياجاتنا وميزانيتنا اتغيرت معاها. كان لازم أفكر في حاجات جديدة تنقذني، وخصوصًا إني حاليًا بعد ما بقيت أم، بقيت بشتري كل حاجة على آخر لحظة (محدش يسألني ليه بس هي بتيجي كده). فمن غير ما أغلبكم معايا دي عشر أفكار لهدايا مُختلفة وغير تقليدية، ممكن تشتريها للراجل في آخر لحظة، والأهم إني جربت منها كتير ونجحت فعلاً.

1. كوفية وآيس كاب

الكوفيات والآيس كابات حاجات مبتخيبش، وأغلب الرجالة بيحبوها، ولو محتارة في الألوان يبقى أزرق. صحيح موسم الشتا على وشك إنه يخلص، لكن دي حاجات بتعيش لأكتر من موسم، وبالتالي قيمتها فيها.

2. أدوات السفر

لو بيحب السفر كتير برة أو جوة مصر، يبقى عليكي وعلى تلات حاجات. الشطافة المُتنقلة، مخدة الرقبة، الـBackpack. دي حاجات في الغالب عمره ما هيفكر يشتريها، لكن لما يبدأ يستعملها مش هيصدق إزاي كان عايش من غيرها.

مؤخرًا أصريت إني أشتري لجوزي Backpack قيمة، وهو كان مُعترض وبيقول إنه بيحب يمشي خفيف (حجة هتسمعيها كتير من أغلب الرجالة)، بس مع أول سفرية جاية لينا أنا متأكدة إنه هيشكرني عليها.

تعرفي على: 15 هدية تناسب صاحبتك لو جابت عربية جديدة

3. الشرابات

طبعًا بتقولي دلوقتي إن الشرابات مش حاجة مستاهلة نتكلم عنها، بس فكري كده، هتلاقي إنك مستبعداها تمامًا من خططك، لأنك حاسة إنها مش حاجة قيمة، بس الحقيقة هي حاجة قيمة ومُهمة وكتير بلجألها لما بكون مش لاقية هدية كويسة أو ميزانيتي محدودة، وأنا اخترت أحطها في الليستة دي عشان أشجعك تاخديها بجدية أكبر في موضوع الهدايا.

4. تيشيرت

صدقي أو لا تُصدقي.. كل الرجالة بتحب التيشيرتات. والحقيقة الأكبر هي إنهم مبيحبوش التيشيرتات اللي يبان عليها شيك وعليها patern حلو من وجهة نظرنا، لكن أغلبهم بيحب جدًا تيشيرتات مطبوع عليها رسومات funny وكرتونية أو شعارات مشهورة زي كوكاكولا وسبرايت وغيرها. لو عارفة مقاسه هاتيله تيشيرت من دول. لو محتارة في اللون يبقى أزرق أو أبيض في أزرق. عارفة ليه بتكلم بثقة في النقطة دي؟ لأن جوزي مبيقفش غير قدام التيشيرتات دي في المحلات، وبعد فترة، لقيت إن أغلب الرجالة في المحل بيكونوا ماسكين برضو نفس النوعية دي إما بيقيسوها أو بيحاسبوا عليها.

5. تيشيرت الفريق اللي بيشجعه

لو عارفة إيه الفريق اللي بيشجعه (فريق مش مصري) ممكن تشتريله التيشيرت بتاعه. حتى لو مش أصلي بس خامة كويسة هيحبه جدًا. جربي كده تسأليه مين هيكسب “البريميم ليج” السنة دي؟ مانشستر ولا ليفربول؟ ومتنسيش تدعيلي على كمية المعلومات اللي هتاخديها من إجابته، وهتفيدك بعدين.

6. لوازم الجيم

اشتراك لمدة شهر في الجيم. كل الرجالة بيحبوا فكرة الجيم جدًا، بس ممكن يفضل يأجل في الخطوة سنين. اشتركيله إنتي الشهر الأول، واتفقي مع الجيم إن العضوية متتفعلش إلا لما ييجي يحضر أول مرة. والأضمن تاخديه من إيده وتوديه إنتي يفعلها. ولو هو مُشترك في الجيم أصلاً، يبقى أكيد هيحتاج حاجات كتير: طقم صيفي أو شتوي من لبس الجيم هيكون إضافة عظيمة. شنطة الجيم كمان فكرة كويسة (دي مثلاً جربتها وكانت مُفيدة جدًا). أكسسوارات الجيم للإيد والراس وغيرها. ولو هو دايس في الموضوع قوي ممكن تشتريله مجموعة dumbbells مثلاً، أو الفيتامينات اللي بيحتاجها لو بيعمل body building.

7. وجبة غدا

أحيانًا بنفكر إننا ندفع مبلغ كبير مرة واحدة وخلاص. لو إنتي مخططة إنك تشتري هدية غالية قوي، ممكن تكون الهدية دي هي وجبة غدا كل يوم توصله سخنة من مطعمه المُفضل على الشغل لمدة أسبوع. صدقيني هياكل ويدعيلك، وكلنا عارفين المثل الشهير.

8. Beard Kit

لو هو مربي دقنه أو بيفكر ياخد الخطوة دي يبقى لازم تشتريله عدة العناية بالدقن من عند Kit it. هما المكان الوحيد تقريبًا اللي لقيتها عنده، وفكرتها ومُكوناتها ممتازة جدًا. بيني وبينكم الهدية دي هي هدية الفلانتاين السنة دي لجوزي، وأنا مُتحمسة جدًا ليها، يا رب هو يتحمسلها بقى.

9. حاجة بسيطة

فكري إيه الحاجة البسيطة اللي بيحبها وابعتيله منها كرتونة على الشغل. لو بيحب البيبسي (كل الرجالة بيحبوه) أو نوع معين من العصير أو الشوكولاتة (نادرًا لما بلاقي راجل بيحبها بس يمكن)، أو أي حاجة من الحاجات البسيطة دي، لو جبتيها بكمية تكفيه لوقت طويل هتكون هدية لطيفة ودمها خفيف كمان.

10. هدية معنوية

الفكرة دي بقى استوحيتها من فيديو كنت بشوفه وقت الكريسماس على يوتيوب، وفيه اثنين كانوا بيتكلموا عن أفكار لهدايا غير مُكلِّفة لكن بتفرق معانا، ومن وقتها وأنا مُعجبة جدًا بيها ومستنية الفرصة اللي أقدر أنفذها فيها مع جوزي، وأعتقد إنها من الأفكار المُناسبة لعلاقات قوية وعدى عليها وقت.

الفكرة بتقول إن كل طرف في العلاقة يختار حاجة مش عاجباه في الطرف التاني ويطلب منه إنه يقللها أو يغيرها. مش لازم طبعًا يركز على السلبيات أو تكون فرصة إننا ننتقد بعض، لكن بشكل لطيف ممكن نقول للطرف التاني: “أنا هديتي هي إنك تحاول تقلل من عصبيتك شوية السنة دي وتشتغل على الحتة دي”، أو “إنك تحاول تصحى بدري شوية نفطر سوا”، أو “أنا هديتي إنك توطي صوت التليفزيون 5 درجات عن العادي وإنت بتتفرج على الماتش”، أو “إنك تفتكر تعلق هدومك لما ترجع من الشغل”… إلخ. حاجات بسيطة من النوعية دي اللي ممكن نعتقد إننا بنفوتها، لكننا مركزين فيها وبنسيبها تتراكم جوانا وبعدين هوووب.. ننفجر.

لو عندكم أفكار تانية مختلفة ودمها خفيف قولولي عليها عشان محتارش في الهدية الجاية.

اقرأ أيضًا: هدايا متفكريش تشتريها لراجل