أنا إنجي.. هتجوز قريب إن شاء الله.. وده طبعًا لو فضلت عايشة بعد المعارك الكتير اللي بخوضها اليومين دول في الجهاز والدهان والأجهزة والعفش والمفروشات والنيش.. والبوفتيييييك لازم البوفتييييييك عشان محدش يقول حااااااجة.
إحدى المعارك دي كانت دهان الشقة.. الصنايعية شيوخ منصر.. وأنا وخطيبي هنتجوز ف محافظة تالتة خالص بعيد عن أهالينا إحنا الاتنين.. وكل اللي حيلتنا في العاصمة دي شوية صحاب جدعان، فقررنا إننا ندهن شقتنا بنفسنا، وعشان أنا شخص كيوت جدًا حبيت أقولكم الخطوات يمكن حد يستفيد، ولو حد استفاد يا ريت يدعيلي.
أول خطوة: متدهنيش شقتك بنفسك
أيوه متدهنيش شقتك بنفسك، لو معندكيش شريك حياة متفاهم وبيتناقش ومقتنع بوجهة نظرك في توفير حق الصنايعية، وحقك في اختيار الألوان، وفي إنك تعملي بيتك بنفسك، لأنه ممكن ييجي وقت ويحبطك ويبوظ كل ده، لما الموضوع يبقى مرهق وياخد من وقتكم ومجهودكم كتير، خاصة لو بتدهني الشقة كلها مرة واحدة وكمان لو فيها شغل كتير.
كمان متدهنيش شقتك بنفسك لو معندكيش صحاب تقدري تعتمدي عليهم، لأن همّ دول اللي هينفعوكي لما تحبي تتشعبطي ع السلم وإنتي عندك فوبيا فيتشعبطوا بدالك، أو يشتغلوا همّ وإنتي قاعدة عندك صداع ورابطة دماغك وشكلك صعب، أو حتى هيوثّقوا اللحظة بصورة حلوة.
اقرئي أيضًا: إزاي تنظموا المكتبة في خطوات سهلة وممتعة
تاني خطوة: اشتري كل الأدوات مرة واحدة
متفضليش طالعة نازلة، اشتري كل الأدوات والمعدات في مرة واحدة، ومن خبرتي أقدر أقولك إنك هتحتاجي الآتي:
- معجون لاتكس.. وده بيتباع بالكيلو في برطمانات من عند بتاع البويات، وهتجيبي منه على أد الشروخ والثقوب والعيوب الموجودة في الحوائط من الدهان القديم.
- عدد 2 سكينة معجون.
- حوالي متر ونص صنفرة خشابي درجة خشونتها 120.
- سلم خشب أو معدن.
- رولة واحدة كبيرة وواحدة صغيرة، وفرشاة للدهان، هاتي لكل لون رولة وفرشاة مستقلين.
- عصاية مكنسة، عشان تركبيها في الرولة وتطولي بيها الأماكن العالية.
- شريط فواصل: هتستخدميه لو حبيتي تدهني حوائط بألوان مختلفة.
- الدهانات نفسها.
اقرئي أيضًا: نصائح لشراء الأدوات المستعملة بأمان
أنواع الدهانات
والدهانات في حد ذاتها بتتقسم لدهان زيت ودهان بلاستيك، أنا شخصيًا دهنت بلاستيك لأن الدهان القديم في الشقة كان بلاستيك، وبالتالي لوكنت حبيت أدهن زيت كان أخد مجهود مضاعف ومصاريف كتير، وبالتالي أنا دهنت بلاستيك مقاوم للغسيل واشتريت التالي:
- تلاتة جردل دهان بلاستيك أبيض3030 ، وده الأساس في كل الدهانات اللي استخدمتها، وكنت بزود عليه الألوان اللي أنا عايزاها.
- ألوان للخلط، ودي بتتباع في أزايز صغيرة، سعر الإزازة بيتراوح ما بين 3.50 جنيه و5 جنيه وبنستخدمها لتغيير اللون الأبيض للون اللي إحنا عايزينه.
ثالث خطوة: الأهم من الشغل تظبيط الشغل
هتمعجني كل الشروخ والثقوب الموجودة في الحوائط عندك باستخدام معجون اللاتكس وسكاكين المعجون، بتحطي شوية معجون على السكينة وتستخدمي السكينة التانية في إنك تملّسي ع الشرخ أو الثقب بالمعجون، بحيث إنك تغطيه وميبقاش باين.
ممكن تقولي وأنا ليه أمعجن طالما كده كده الدهان هيغطي شكل الشرخ! هقولك إن لو الدهان غطى شكل الشرخ بدون معجون الشرخ هيرجع تاني يظهر بعد ما تدهني بوقت قصير، ولو فيه ثقوب في الحوائط مكان مسامير عمر الدهان ما هيعرف يخبيها.
بعد ما المعجون ينشف في الأماكن اللي معجنتيها، هتستخدمي الصنفرة في إنك تصنفري الأماكن دي بحيث إنها تكون ناعمة زيها زي باقي الحيطة.
اقرئي أيضًا: 10 طرق لتحويل مشاكل الديكور للوحة فنية
هتركبي شريط الفواصل ده على جوانب الحوائط اللي هتدهنيها بألوان مختلفة عشان طرطشة الدهان متبوظلكيش الألوان. شريط الفواصل ده عامل زي السوليتب بتلزقيه في زاوية الحيطة المختلفة اللون عشان تفصلي بين اللونين.
هتستخدمي ألوان الخلط على البوية الأساسية البيضاء، بس حاسبي وإنتي بتزوّدي اللون حطي نقطة نقطة وقلّبي البوية كويس بعصاية مكنسة، مع إضافة قطرات مية بسيطة، حوالي نص لتر على جردل البوية الكبير، ولما تلاقي اللون قرب يبقى اللون اللي إنتي عايزاه جربيه بفرشاة على الحيطة وخففي وتقلي زي ما إنتي عايزة.
ملحوظة: فيه بوية بتتباع ملونة جاهزة في مراكز الدهانات الكبيرة، زي باكين وسايبس، وأنا اشتريت منها بالفعل وندمت بعد كده، الجالون الواحد (تلاتة لتر) كان بحوالي 120 جنيه ، في حين إني عملت باقي الشقة بطريقة خلط الألوان ومكلفتنيش أكتر من 90 جنيه للجردل الكبير حوالي 20 لتر، والألوان متوفر منها كتير جدًا وهتخففي وتتقلي زي ما إنتي عايزة، وتغيري في الألوان براحتك.
الخطوة الرابعة: ساعة الامتحان يكرم المرء وإن شاء الله لا يهان
بعد تجهيز الألوان هتبتدي الدهان بقى، هتستعملي الفرشاة للزوايا والأماكن المنخفضة جدًا والمرتفعة جدًا، عشان الرولة مش هتسعفك فيهم، لأنك مش متخصصة، وهتساعدك كمان الرولة الصغيرة في نفس الأماكن دي، لأنها رفيعة وهتعرفي تدخليها جوة الزوايا وتحت منحنيات الأسقف بسهولة.
هتستخدمي الرولة الكبيرة في الدهان، بإنك تغمسيها في اللون وتصفيها كويس.. اخبطي حرفها على حرف الجردل كام مرة عشان منهدرش بوية كتير ع الأرض.
هتبتدي فرد اللون ع الحوائط الوش الأولاني، واللي مش لازم يكون متقن أوي، إنتي يا دوب بتغيري لون الحيطة وبتجهزيها للوش التاني، واللي هيكون متقن أكتر.
بعد الوش الأولاني واللي هتدهني بيه الحيطة كلها هتسيبيه ينشف، (الأفضل انك تسيبي الدهان عالحيطة يوم كامل لإنك حتى لوحسيتي انه نشف إلاإنه بيكون لسة طري شوية والأفضل انه ينشف على راحته خالص)
هتبتدي تدي الحيطة الوش التاني، واللي لازم يكون متقن جدًا، وتهتمي بإنك تغطي الحيطة كلها باللون نفسه، وتفرديه كويس عشان لما ينشف ميكونش فيه مكان أغمق أو أفتح من مكان تاني، وتستخدمي للأماكن العالية عصاية المكنسة المتركبة في الرولة عشان متضطريش تستخدمي السلم العالي جدًا.
بعد الوش التاني ما ينشف هتشيلي شريط الفواصل، وبالفرشاة هتبتدي تصلحي أي ديفوهات في الحيطة، حوالين مفاتيح النور أو في الزوايا. ومتقلقيش أي عيوب ممكن جدًا نداريها بسهولة.
طبعًا مش مطلوب منك إنك تعملي كل الخطوات دي لوحدك، أنا مثلاً كنت سايبة لخطيبي مهمة المعجنة والصنفرة، وكنت سايبة لصاحبتي مهمة دهان الأجزاء المرتفعة باستخدام السلم، يعني كل واحد من المشتركين في العملية البطولية دي هيبقاله شغلانة محددة هيعرف يعملها أحسن من الباقيين، فمتضغطيش على نفسك.
أهم نصائح لدهانات الشقة
وفي الآخر عايزة أقولك شوية نصايح كده تنفذيهم وإنتي بتدهني الشقة:
أولاً: في نهاية كل يوم شغل حطّي الرولات والفرش في مية وسيبيهم لتاني يوم، لأنك لو سبتيهم برة هينشفوا ومش هتعرفي تطريهم تاني بسهولة، وهتضطري تشتري غيرهم.
ثانيًا: لازم تاخدي دش دافي كل يوم بعد الشغل، لأن جسمك هيوجعك أوي لو معملتيش كده وريّحتي عضلاتك بعد المجهود العنيف.
ثالثًا: مش معنى إنك أخدتي دش دافي بعد الشغل إنك مش هتتعبني، لا هتتعبي، خاصة لو بتدهني شقة كاملة، اعملي حسابك على كده وحاولي تستمتعي بالتعب.
رابعًا: استخدمي إيشارب على شعرك لأن البوية هتطول كل حتة في جسمك.
خامسًا: مبروك البوية الجديدة.
زواج موفق ان شاء الله طالما بدايته قصة كفاح وروح تعاون وتواصل
زواج موفق ان شاء الله طالما بدأ بروح تفاؤل وتعاون ومشاركة