اتربينا في مصر على تخزين برطمانات الصلصة والمربى في النملية، والأكياس البلاستيك تحت المرتبة، والأزايز الفاضية تحت الحوض، رغم إن لحد دلوقتي مظهرتش دلائل أو بشائر لجدوى الخزين ده. بس فيه حاجات تانية لها أهمية واضحة، وبيقتصر استخدامها على حاجة واحدة، مع إننا نقدر نعمل بيها حاجات كتير، نذكر من الحاجات دي على سبيل المثال.
- قوالب التلج:
قوالب التلج المكعبات أو الأشكال لها استخدامات أكتر بكتير من مجرد تجميد التلج، زي مثلاً تقدري تحفظي فيها مكعبات المرق منزلية الصنع، أو مكعبات زبدة الأعشاب اللي بتعمليها بنفسك، أو الصلصة الطازة اللي بتعمليها في البيت، وبالنسبة لمدمنين القهوة المستعجلين، تقدري تجمّدي النسكافيه سادة من غير سكر أو لبن، وابقي طلعيه وسيبيه يسيح مع اللبن الساخن والسكر. أما الأمهات فتقدروا تستخدموا القوالب كأنها قوالب آيس كريم صغيرة الحجم، وده يكون أحسن عشان تتحكموا في كمية السكريات اللي أطفالكم بياخدوها، وممكن كمان تحطي فيها ثمرة فراولة وتصبّي حواليها شيكولاتة سايحة وجمديها وكلي أحلى شيكولاتة بالفراولة، ولأمهات الأطفال اللي لسه بياكلوا الأكل مهروس، فممكن تعملي كمية تكفي كذا يوم، وتحفظيها في المكعبات دي، ومع كل وجبة تشدّي عدد المكعبات الكافي.
- غسالة الأطباق
من المعروف إن غسالة الأطباق بتغسل المواعين من حلل وصواني وأطباق وكوبايات، لكن الجديد واللي مش كتير بيفكروا فيه إنهم يقدروا يغسلوا فيها ألعاب الأطفال البلاستيك، واللي مش بينفع تتغسل في غسالة الهدوم.
- البطاطس
أكيد البطاطس مشهورة إنها بتتاكل أو بيتعمل بيها ماسكات، لكن الجديد إن لو عندك لمبة مكسورة جوة نجفة وعايزة تغيريها، خطر جدًا تمسكيها بإيدك مباشرة، والأسلم إنك تقطعي حبّة بطاطس وتغرسيها في اللمبة، وبكدة تقدري تغيّري اللمبة بدون ما إيدك تلمسها.
- التوست
استكمالاً للنقطة السابقة، فالبطاطس مش هينفع تجيب الإزاز اللي اتكسر على الأرض، بس التوست الطري أو قلب العيش الفينو يقدر يقوم بالمهمة دي.
- الخل
معروف عن الخل إنه ممكن تستخدميه لتنضيف المواعين، لكن وضع الخل في غسالة الهدوم في درج المسحوق، وغسالة الأطباق والميكروويف، طريقة أكيد ومضمونة لتنضيفها.
تعرفي على: استخدامات الميكرويف: 14 شيء لا توضع في الميكرويف
- المانيكير الشفاف
المانيكير الشفاف ساعات بنحطه على ضوافرنا بغرض حمايتها، لكنك كمان تقدري تحطيه على خيط الزراير ومسامير النضارات. عشان ميفكوش بسهولة.
- الشماعات أم مشابك
الشماعات أم مشابك اللي بتيجي مع الهدوم وغالبًا مش بنستخدمها وبنرميها، اطلبيها مخصوص من الراجل لو مجتلكيش، وافصليها واقفلي بيها أكياس الأكل المفتوحة ولسه مخلصتش. كمان ممكن تسخدميها كحامل لكتاب الطبخ في المطبخ عشان ميتبهدلش، بنفس حالتها من غير ما تفصليها.
- قطع القماش المتبقية
لو إنتي من النوع اللي بيسافر كتير بالطيارة أو بالقطر، ممكن بقطعة قماش كبيرة تعملي فيونكة في إيد شنطة السفر، عشان يبقى سهل تتعرفي عليها من وسط الشنط.
- علب بلاستيك
لعمل بان كيك أو كريب من غير بهدلة، حطيها في علبة بلاستيك زي بتاعة المسطردة أو الكاتشاب، وما تنسيش تغسليها بعد كل مرة تستخدميها فيها.
- بكر مناديل
الناس اللي عندها كابلات كتيرة، أو اللي عندهم باقي خيوط من التريكو والكروشيه، مترموش بكر المناديل الفاضي، تقدروا تعملوا بيه حاجات كتير، منها تنظيم الأسلاك والخيوط الكتيرة.
- شراب فوال
لو ضاع منك فردة حلق أو بنتك فكت حلقها وضاع، لفّي فتحة المكنسة بشراب فوال واكنسي بيها، ساعتها مفيش أي جماد هيعدّي من الشراب.
- صينية كب كيك
المرة دي مش هنستخدم صواني الكب كيك عشان نعمل كب كيك أو مافن، لكن استخدميها بالمقلوب، علشان تعملي أطباق تورتيلا صغيرة.
- مكواة الشعر
استخدمي مكواة الشعر عشان تكوي الجزء اللي بيبوظ من الإيشارب أو ياقة القميص، وإنتي لابساهم وبطريقة آمنة.
- الخلاط
الخلاط مش بس بيطحن الأكل وبيعمل عصير، ده كمان ممكن يغسل نفسه بنفسه. حطي فيه ماء وصابون وشغليه عادي وبعدين ابقي اشطفيه، اتغسل في 3 ثواني.
- أغطية الكانز
لتسهيل عملية تطقيم ملابسك وتوفير مساحة في الدولاب، استخدمي غطا الكان can في مسك شماعتين برؤوس معدنية ببعض.
- جراب نضارة
في حالة السفر، حطي شاحن الموبايل والكابلات المهمة في جراب نضارة مبقيتيش تستخدميه.
- مكرونة اسباجيتي
لو عندك شموع في وعاء زجاجي وبتلاقي صعوبة ف إنك توصليلهم وغالبًا بتحرقي صوابعك. احمي صوابعك عن طريق إشعال النار في عود مكرونة اسباجيتي وولعي بيه هو الشموع.
- مشابك الهدوم
امسكي المسمار بمشبك ملابس لو بتدقيه بالشاكوش في الحيطة، كفيل إنه يحمي صوابعك ويخليكي تركزي في الدق.
