مهاويس الكتب.. مهما الدنيا اتطورت واتعملت عروض لاشتراك المكتبات للاستعارة، ومهما الكتب اتعملت بصيغة pdf، هيفضلوا دائمًا أبدًا يشتروا الكتب، هتلاقيهم بعد معرض الكتاب بيقولوا وعود زي “مش هشتري كتب تاني لحد ما أخلص من قراءة اللي عندي”، بس طبعًا لما بيعدّوا من عند أي مكتبة تلاقيهم دخلوا يشوفوا فيه إيه جديد محتاجين يشتروه (سامعيني يا اللي في بالي؟)، للي ممكن تلاقي في مكتبتهم أكتر من نسخة لنفس الكتاب، مش عشان دي طبعات مختلفة بمقدمات مختلفة، أو طبعة كاملة وطبعًا منقوصة، مش لأي سبب منطقي غير إنهم ناسيين إن الكتاب ده عندهم فاشتروه تاني. للناس دي تحديدًا، بوجّه كلامي والسطور الجاية ليهم.
إزاي تحصلوا على مكتبة مرتبة ومنظمة تسر الناظرين، وفي نفس الوقت تكون سهلة عليكم لما تحبوا ترجعوا لكتاب وتعرفوا تطلعوه بسهولة، وبرضو متشتروش أكتر من نسخة من كتاب ما عشان مش قادرين تفتكروا الكتاب ده عندكم منه نسخة ولا لأ؟ في السطور الجاية هحاول أساعدكم.
أولاً: عشان مينفعش تبنوا على حاجة فيها مشاكل، لازم تتخلصوا من مشاكل المكتبة الحالية، نزلوا كل الكتب اللي عندكم في المكتبة، شيلوا التراب من عليها، وبعدين ابدؤوا بعمل جدول على الوورد أو الإكسل، أو حتى اعملوا قائمة اسمها I own this book، أو ممكن كمان جدول على google sheets، وده كله لتسهيل عملية معرفة الكتب اللي عندك. وحاولوا تجددوا وتضيفوا الكتب الجديدة أول بأول للقائمة دي.
ثانيًا: تخلصوا من الكتب اللي ليها أكتر من نسخة واحدة بدون مبرر، أو الكتب اللي اشتريتوها لغرض ما وانتهى الغرض اللي جايبينها عشانه، طبعًا إحنا مش بنرمي الكتب، فممكن تتباع أو يتم التبرع بيها أو تهادوا بيها أصحابكم.
تعرفي على: 4 خطوات لدهان الشقة بنفسك
ثالثًا: ترتيب الكتب لازم يكون بنظام معين، عشان لما تحبوا ترجعوا لكتاب تعرفوا ترجعوله بسهولة، في النقطة دي فيه أكتر من أسلوب تقدروا على أساسه ترتبوا الكتب، اختاروا منه اللي يعجبكم:
1- ترتيب الكتب على أساس المؤلف.
2- ترتيب الكتب على أساس الموضوع والمحتوى والتصنيف.
3- ترتيب الكتب على أساس اللون. (وده بيبقى أكتر للناس اللي عندها ذاكرة بصرية كويسة).
طبعًا مع الأخد في الاعتبار إن:
1- السلاسل الكاملة بتكون جنب بعضها.
2- يبقى فيه رف للكتب المفضلة.
3- الكتب اللي من الحجم الواحد في نفس التقسيم تكون جنب بعضها.
4- الكتب المترجمة في صف غير صف الكتب المكتوبة بالعربية، وطبعًا الكتب المكتوبة بلغة غير العربية في قسم لوحدها.
رابعًا: فن تنظيم المكتبات بيقول إن لازم تلت المكتبة يكون كتب، وتلتها للديكور، وتلت فراغ عشان يبقى مريح للعين. بس الكلام ده مش مفيد بالنسبالنا والمساحات عندنا يا دوب قادرين إننا نزنق فيها الكتب، ومش بنقدر دايمًا نحافظ على الشروط الجمالية للمكتبات، لكننا برضو نقدر نفضل محافظين على الشكل الجمالي للمكتبة بطريقة تانية.
مثلاً ممكن ننظم شوية من الكتب في الرف بطريقة أفقية جنب بعضها، ونرتب شوية بطريقة رأسية فوق بعضها، مع الاحتفاظ طبعًا بكعوب كل الكتب لبرة، عشان يبقى سهل قراءة أسماء الكتب، وكمان عشان ميبقاش سهل إنها تتبهدل. لو فيه رف كتب مش كامل ومايل بطريقة بتهدد وقوعه، بيتم سند الكتاب بقطعة ديكور تقيلة، أو برطمان تقيل الوزن وشكله شيك، ممكن حتى البرطمانات العادية بتاعتنا تتزين بشكل لطيف من برة ويتم ملوها بالرمل عشان تكون تقيلة.
كمان من المفضل إننا نزين المكتبة بحاجة غير الكتب، سواء كان برواز صورة فوتوغرافية أو صورة عادية، ممكن تماثيل صغيرة أو لعب أطفال، وممكن أي قطعة ديكور، المهم في القطعة اللي هيتم إضافتها هو إنها تكون لايقة على تصميم المكتبة. برضو يُفضّل لو يبقى فيه مكان دائم فاضي على طرف الرف، وده يكون مخصص للكتب اللي بتُقرأ في الوقت الحالي.
خامسًا: لو لسه هتصمموا مكتبة:
1- حاولوا تراعوا إن يبقى فيه تنوع في أحجام الأرفف، وكمان حاولوا تبعدوا عن المكتبات الكورنر أو الزاوية، بس لو لا مفر من كده، يبقى المكتبة تكون على شكل منحني بدل زاوية 90 درجة، ده هيكون أحسن كتير في ترتيب الكتب.
2- عمق الأرفف يكون مناسب، مش عميق جدًا لأن ساعتها هياخد مساحة كبيرة ملهاش لازمة، وبرضو ميكونش صغير أوي، لازم يبقى فيه مساحة بين الكتاب وطرف الرف.
3- ارتفاع الأرفف لازم يكون مناسب لأغلب مقاسات الكتب، وممكن يتم عمل رف واحد ارتفاعه كبير، عشان يستوعب الكتب الطويلة.
4- لو أثاث البيت مودرن، جربوا إن كل رف من رفوف المكتبة يكون بلون مختلف، كنوع من التغيير.
5- في حالة إنكم محتاجين المكتبة تبقى مقفولة، لكن الظروف مسمحتش بده لأي سبب، ممكن تبدلوا الضُلف بستارة صغيرة، الفكرة دي موجودة بالفعل عند ناس كتير، عشان تحمي الكتب من التراب والبهدلة السريعة.
امتلاك مكتبة مليانة بالكتب من أسباب الفخر لأي حد من محبي الكتب، بس الغرض من اقتناء الكتب مش بيكون بس تخزينها، لأن بيوتنا مش مخزن كتب، لكن عرضها بشكل جميل ومنظم ومرتب، بيفتح النفس على القراءة وبيحافظ على الكتب من البهدلة، وبيخلي أي حد يشوف مكتبتك يبقى نفسه فعلاً يكون فيه منظر زي ده في بيته.
