موسم الكريسماس بأعياده ببهجته من المواسم اللي بنستناها من السنة للتانية وبنجهز للاحتفال بيه من أول ديسمبر وأحيانًا من أول نوفمبر كمان.
لكن لظروف العيد اللي بيكون آخر الشهر، أحيانًا مش بنقدر نعمل احتفالية كبيرة. والنهارده هنقدملك على “نون” طريقة ترتيب حفلة كريسماس وفقًا لكل ميزانية.
أولاً: حفلة بتكلفة 100 جنيه
مش صعب خالص نعمل حفلة تكلفتها منخفضة بالشكل ده، لكنها هتكون مقتصرة على أفراد الأسرة دون مدعوين، وكمان هتكون معتمدة على الأساسيات وعلى رغبة أفراد الأسرة في قضاء وقت هادي وسعيد.
مستلزمات الاحتفال
ـ زينة عادية ويفضل أن يغلب عليها ألوان الكريسماس كالأحمر والأزرق والأبيض والأخضر في حدود مبلغ 20 جنيه.
ـ مشروبات غازية أو مشروبات ساخنة كالسحلب أو الكاكاو باللبن في حدود 20 جنيه.
ـ فاكهة الشتاء كالبرتقال والتفاح في حدود 30 جنيه.
ـ تسالي كاللب والسوداني والمقرمشات الملونة في حدود 30 جنيه.
اقرئي ايضًا: قصة فيلم كلاوس وأساطير بابا نويل ؟
ثانيًا: حفلة بتكلفة 300 جنيه
المبلغ ده ممكن يسمحلنا بتجهيز حفلة فوق المتوسطة لأسرة مكونة من 4 أفراد، بس لازم يكون عندنا القدرة على ترتيب الأولويات الخاصة بمستلزمات الاحتفال.
مستلزمات الاحتفال
بالإضافة للمستلزمات اللي اتفقنا عليها في ترتيب الاحتفال اللي بيتكلف 100 جنيه ممكن نضيف مجموعة من الاختيارات، زي مثلاً:
ـ عمل كوكيز ملونة تكلفتها في حدود 30 جنيه.
وهنلاقي طريقة عملها بالتفصيل هنا: الكوكيز الملونة للحفلات
ـ شواء بطة وإضافتها لأطباق العشاء وتكلفتها في حدود 70 جنيه (تباع طازجة ومنظّفة في أي سوبر ماركت بهذا المبلغ).
ـ تورتة أو دستة جاتوه وتكلفتها في حدود 100 جنيه.
ثالثًا: حفلة بتكلفة 600 جنيه
تجهيز حفلة بالمبلغ ده يسمحلنا ببعض الترف، فعلى سبيل المثال ممكن نزيّن شجرة الكريسماس ونجيب أضواء ملونة نوزعها في البيت ونغير في قايمة العشاء.
مستلزمات الاحتفال
ـ شجرة كريسماس صغيرة والزينة بتاعتها سعرها في حدود 200 جنيه.
ـ فاكهة وتسالي ومشروبات وحلويات في حدود 150 جنيه.
ـ قائمة عشاء تحتوي على مشويات مشكلة ومقبلات زي الميني بيتزا أو كرات الماك أند تشيز والميني تارت في حدود 250 جنيه.
رابعًا: حفلة بتكلفة 1500 جنيه
نقدر نعمل حاجات كتير أوي بالمبلغ ده، ونقدر نعزم مجموعة كبيرة من الأقارب والأصدقاء ونستمع كلنا بليلة مش بتتكرر غير مرة في السنة بشكل مرضي للجميع.
مستلزمات الاحتفال
ـ شجرة كريسماس كبيرة والزينة الخاص بها في حدود مبلغ 350 جنيه.
ـ بعض التسالي الفاخرة كالبندق المكرمل والفستق المملح مثلاً بالإضافة للتسالي العادية في حدود مبلغ 150 جنيه.
ـ فاكهة وحلويات ومشروبات في حدود مبلغ 350 جنيه.
ـ ديك رومي للعشاء في حدود مبلغ 300 جنيه.
ـ مقبلات وأطباق جانية مثل كوكتيل الجمبري، وكورات الموتزاريلا المقلية والخضراوات المشوية والطواجن المتغطية بعجينة البف بيستري مخبوزة في الفرن في حدود مبلغ 350 جنيه.
وممكن نحضر تورتة الكريسماس المزينة بعجينة اللوز في البيت بدلاً من حلويات جاهزة
في النهاية نحب نقول إن دي أرقام إرشادية، وكل ربة منزل عندها الخبرة الكافية لأنها تختار ترتيبات الحفلة اللي تناسب ميزانية أسرتها.
ونحب كمان نأكد إن مش مهم مستلزمات الاحتفال كلفت أد إيه، وإنما المهم رغبتنا في قضاء ليلة سعيدة نستقبل بيها السنة الجديدة وإحنا مبسوطين ومتفائلين.
وطبعًا مش لازم ننسى إرشادات “نون” لتحضير حفل كريسماس ناجح: طريقك إلى حفلة كريسماس ناجحة
وكل سنة وإنتم طيبين وبخير وسنة جديدة سعيدة علينا كلنا.
