بقلم: روكسان رأفت
من كام سنة فاتوا حسيت إني محتاجة أعرف وأتعلم عن حاجات كتير، حاجات عن نفسي وحاجات عن الجواز وحاجات عن التربية والعلاقات، حاجات كتير في أكتر من مجال. ولأني طول عمري بحب القراءة وبقرأ تقريبًا من وأنا 10 سنين، فكانت هي الملجأ الوحيد ليَّ في وضع زي ده.
القراءة ليها دور؟
طبعا ليها دور.. ودور كبير كمان:
- القراءة علم، يعني إيه؟ يعني زيها زي كل العلوم المختلفة اللي اتعلمناها ودرسناها.
- القراءة بتفتح عينك على حاجات جديدة، وده بيوسع مداركك ومعرفتك وبيحرك جمود ذهنك.
- القراءة بتحطك قدام نفسك، فبتخليك تعرف نفسك أكتر كأنك بتشوف نفسك في مراية مع كل كتاب أو قصة بتقراها.
- القراءة بتضيف لك خبرات جديدة، فبتاخد من كل كاتب حتة من روحه وفكره وطريقة حياته.
- القراءة بتخليك تقبل الاختلاف بينك وبين باقي البشر، لما بتشوف قصص كتير كأنك بتشوف ناس كتير.
- القراءة بتغير نظرتك للأمور والأشخاص، فبالتالي بتحسن علاقاتك باللي حواليك.
الحقيقة يمكن عشان أنا بحب القراءة فده مخليني قادرة أتكلم عنها كتير بصورة إيجابية. لكن…
لأن القراءة دلوقتي بقت منتشرة جدًا، في ظل الثورة المعلوماتية ومبقتش مقتصرة على مجموعة معينة من الناس (كانوا بيسموهم المثقفين) فأنا لاحظت حاجة. لاحظت كذا حد بيخاف يقول مبحبش أقرأ، أو بزهق من القراءة، تلاقيه يقولك أصلي معنديش وقت، أو كنت بقرأ زمان وأنا صغير، أو أصلي بطيء في القراءة فبزهق، خصوصًا لو الشخص ده اتحط قدام شخص تاني بيحب القراءة جدًا.
لو مبتحبش القراءة تتعلم منين؟
والحقيقة عادي إنك تكون مبتحبش القراءة، لأنها هواية زيها زي هوايات كتير مختلفة. ولو مش بتحب القراءة بس نفسك تتعلم وتعرف أكتر متقلقش، فيه حاجات كتير ممكن تعملها، ممكن الحاجات دي تكون أسهل وأسرع وأقل التزامًا من القراءة.
1. ممكن تتفرج على فيديوهات قصيرة على اليوتيوب
فيه حاجات كتيرة جدًا عن موضوعات مختلفة ولمتخصصين، زي مثلاً قناة HAIDY El Masry/Parenting، ودي فيها موضوعات مختلفة عن تربية الأطفال.
- فيه حلقات لبرنامج اسمه أمومة سكول، هايل بتقدمه د. مارلين متخصصة طب نفسي اطفال.
- فيه قناة اسمها مريلة كحلي بتتكلم فيها سارة حلمي عن الأزياء والموضة وإزاي ننسق لبسنا.
- beltafseeel قناة بتتكلم برضو عن حاجات كتير تخص اللبس والهدوم وأنواع القماش والخياطة وإعادة التدوير بالتفصيل.
- فيه قنوات بتقدم محتوى علمي بشكل سهل وبسيط، زي الدحيح.
- فيه قناة د. أوسم وصفي اللي ممكن تلاقي فيها حاجات كتير قوي عن العلاقات والارتباط.
- فيه قنوات بتنزل تلخيص لكتب مشهورة عربية وأجنبية، زي مثلا قناة اسمها الزتونة.
2. الكتب الصوتية
فيه دلوقتي اختراع جميل، هو الكتب المسموعة. تقدر تسمع الكتب بتتقري بصوت واضح وجميل وبلغة مظبوطة، وإنت سايق أو قاعد في البيت على الكنبة.
3. السوشيال ميديا
– فيه صفحات على السوشيال ميديا بتقدم تلخيص لكتب كتير، بس صوت وصورة، وده ممكن يخليك تركز أكتر، زي مثلاً starbooks.
– ممكن تعمل متابعة لحسابات ناس كتير ومختلقة على السوشيال ميديا، ده بينمي تفكيرك ومعرفتك، وهتلاقي صفحات لأشخاص بعينهم أو صفحات بأسماء معينة زي مثلاً:
- مما قرأت
- جرعة أمل
- لخبطة صحية
- نون nooun
- Mamaland
- Dr.nancy maher counseling
- Nour.academy
- راديو مظبوط
- Reeham Alfred-ريهام الفريد
- Dr.Mohamed Taha
- Alhayat Organization
كل اللي أنا قلته ده علي سبيل المثال لا الحصر!
5. الاستشارة
ممكن تستشير حد سابقك بخطوة كل ما تحتار أو تحتاج مساعدة.
6. أصحابك القُرَّاء
غالبا معظمنا عندنا أصحاب بيحبوا القراءة، دول اعتبرهم كنز ليك، خليه يحكيلك يمكن تتحمس وتقرأ، ولو متحمستش فإنت برضو استفدت كتير.
أخيرًا لو إنت مش بتحب تقرأ أرجوك متقولش على اللي عايز يقرأ ويتعلم إنه متفلسف أو عميق بزيادة، أو ما تعيش عيشة أهلك وسيبك من الأفكار الغريبة والجديدة، لأن حقيقي الأفكار الجديدة والغريبة دي أوقات بتغير حاجات كتير، إنت شخصيًا نِفسك تغيرها.
اقرأ أيضًا: ولنا في القراءة حياة
