بقلم: مريم ليوان

مش ممكن أشبع منك

الدنيا غريبة وصعبة ومملة لما تكون لوحدك، ويوم ما تفكر تعدي تجيب كوز ذرة أو واحد آيس كريم وتمشي لوحدك، بتحس إن المسافة كبيرة والحاجة دي قد ما بتحبها قد ما هي ملهاش طعم. ممكن يكون معاك فلوس كتير قوي، تقدر تجيب حاجات غالية جدًا وجميلة قوي، بس هتفضل جواك حاجة ناقصة. سعادتك وفرحتك مش هتكون كاملة، ولو حسيت النهارده إنك فرحان، بكرة هتقل الفرحة دي، لغاية ما تتلاشى وتتقدم حبة بحبة. كتير نقول أنا عاوز أكون لوحدي، مش عاوز حد معايا، عاوز أفصل من كل الناس والدنيا، ويوم ما تدخل الأوضة ساعة لوحدك تحس إنك عاوز تكلم الناس أو حد يكلمك.

بتونِّس بيك

فكرة الونس مع صاحب أو حبيب أو أخ أو أب أو أم أو أخت أو إنسان بترتحاله، فكرة غريبة، محدش لغاية دلوقت قدر يقول سرها إيه، لكن الأهم هو إن الأيام بتكون غير محتملة من غير الونس ده. هو مش الإنسان وقصة الخلق قد ما هي في طبيعتها مثيرة وعجيبة قد ما هو احتياجاتنا إحنا بسيطة جدًا.

الونس في كلمة أو حضن دافي لما تكون تعبان، تخيل إن بلمسة إيد أو صباع من الأم لطفلها ممكن تحسسه بالونس، ومش بس كده، ممكن كمان تقومه من التعب لو هو مريض وتعبان، اللي ساعات الطب بيحتار يعالج إزاي وإيه الدوا.

الونس في وجودك وريحتك وأشياء صغيرة جدًا ممكن أشوفها وأفضل أبصلها اليوم كله وتكون هي ونسي. الونس يمكن يكون في ضحكة وابتسامة أغلى الناس عليك في إنك تشوفهم حتى لو من بعيد لبعيد، وكل سنة مرة. الونس ممكن يكون في كلمة “صباح الخير” اللي جارك أو اللي بتشوفه الصبح بيقولهالك، الونس ممكن يكون في رسالة جات فيها كلمة زي “خلي بالك من نفسك” أو “وحشتني” أو “طمني عليك”.

الونس ممكن يكون في صورة قديمة بتجمعني مع أصحابي اللي اتفرقوا وكل واحد بقى في بلد، لما أطلعها من ألبوم صوري وأبص عليها أفتكر أجمل أيام وأضحك كده وتعدي قدامي كل دقيقة وقتها عملنا إيه، وهنا كنا ينتكلم في إيه، وهنا كنا بنعمل إيه.

الونس في إنك تشوف حد بقالك كتير مسلمتش عليه، ويبفضل يحكيلك وإنت تبص عليه، ولما تيجي تقوم تقوله “هنمشي؟ أنا لسة مشبعتش منك”. الونس في الإيد اللي بتجي وتطبطب عليك وقت تعبك، ووقت بكائك وإنت حزين من غير كلام. الونس هو كتير من مشاعرنا وأحاسيسنا اللي بندور عليها في أيامنا ودنيتنا. الونس في صوت ممكن تسمعه من غير ما تشوفه، لكن تبقى في قمة سعادتك ومبسوط جدًا.

مش هنقدر نقول كل حاجة بنحسها وبتخلينا نحس بالونس، لكن تقدر مش تسيبني أحس محتاج للونس والسند وتسيب إيدي بعيد. مش عارفة مين قال بالتحديد كلمة زي “بتونس بيك” غير وردة لما غنتها. لكن اختصر كتير من المشاعر والأحساسيس في كلمة من خمس حروف متمشيش الدنيا من غيرها، ولا يكون ليها طعم ومعنى، ولا تحس إنك قادر تكمل بعد كل الصدمات اللي بناخدها في الطريق.

ربنا يصبر كل اللي اتحرم من ونس له في الدنيا دي. ويخلي كل واحد بيحس إنه ونسه ودنيته وسعادته في نظرته وضحكته وابتسامته وريحة هدومه.

اقرأ أيضًا: وحدي لكن ونسان