بعض مواقع التعلم عن بُعد ونصائح لروتين يومي أفضل
فيه ناس كتير مش متعودة على روتين القعدة في البيت، بسبب إنها بتشتغل أو بتدرس، وبما أن أغلب مؤسسات القطاع العام والخاص بدأت تحول طريقة شغلها للعمل من المنزل، أو تقليل عدد أيام العمل بالمؤسسات للحد من انتشار الفيروس. ما تيجوا نستغل الفترة دي ونعمل روتين مختلف مفيد وممتع، ونبعد عن الأخبار السلبية والخوف المبالغ فيه. أنا شايفة إنها فرصة كويسة لإنجاز أشياء كتير مؤجلة، زي قراءة الكتب اللي اشتريناها وملحقناش نقرأها، بسبب إن مفيش وقت. الحفاظ على الصلاة في أوقاتها وأوراد القرآن والأذكار اللي كتير قوي بيتوهوا في زحمة الشغل، نفتح مواقع التعلم عن بُعد ونطور مهاراتنا.
لأن القعدة في البيت مش أسوأ حاجة حتى لو كنت شخص بيحب الخروج، وأغلب وقتك بتقضيه برة البيت، إحنا في محنة صعبة بسبب انتشار فيروس كورونا، وتصنيف منظمة الصحة العالمية له كوباء عالمي. إحنا بنحارب حاجة منعرفهاش، مفيش قدامنا غير إننا نحافظ على حياتنا وحياة اللي بنحبهم، بإننا نقلل خروجنا من البيت وميكونش غير للضرورة، لحد ما الأزمة دي تعدي، ونتمنى إنها تعدي بأقل خساير.
في التدوينة دي بعض مواقع التعلم عن بعد وتطبيقات الموبايل اللي ممكن تساعدنا نستغل أوقاتنا في حاجة مفيدة خلال الفترة دي، سواء طلبة أو موظفين.
Lose weight in 30 day
ده تطبيق على الموبايل، ومن ألطف الحاجات اللي ممكن تشجعك تلعب رياضة كل يوم لمدة ربع ساعة بس، من خلال تمارين سهلة وبسيطة. مزيكتك وتمارينك وافصل شوية من دوشة العالم.
Kitab sawty
اقرأ لي، دي تطبيقات كتب صوتية لو كنت من هواة القراءة بس معندكش وقت، أو نفسك تقرأ ومش متعود، ممكن تسمع الكتب اللي كنت عاوز تقرأها متسجلة.
– بعد إيقاف الفاعليات الثقافية بسبب كورونا قررت صفحة عصير الكتب تنزل كل كتبها بصيغة pdf بشكل مجاني يوميًا الساعة 9 مساءً، ودي مبادرة منها تساعد الناس تقرأ في فترة بالتأكيد مش هيعرفوا يشتروا كتب فيها.
– موقع bbclearning English وفيه منه تطبيق للموبايل، من أفضل المواقع اللي ممكن تساعدك تحسن الإنجليزي بتاعك من خلال دروس يومية مدتها قصيرة.
– موقع مؤسسة إدراك، ودي مؤسسة أردنية برعاية الملكة رانيا، الموقع بيقدم كورسات في كل المجالات تقريبًا العامة والمتخصصة، في التعليم المدرسي والتعليم المستمر، بطريقة مُبسطة ومنظمة ومن خلال فيديوهات قصيرة (لو عندك أولاد هاتيلهم المحتوى الخاص بموادهم الدراسية خلال فترة تعليق الدراسة)، كمان بيقدم شهادات مُعتمدة في حال إنك كملتي الكورس وامتحنتي عليه أونلاين.
– موقع كورسيرا فتح أكثر من 3800 كورس، لأكتر من 400 تخصص، مجانًا بسبب فيروس كورونا، كل اللي عليك إنك تفتح الموقع وتسجل بياناتك وتختار الكورس اللي إنت عاوزه.
لو إنت شخص مهتم بالديجيتال ماركتنج والكونتنت كريتور
Facebook blue print
دي أكاديمية تدريب مجانية من فيسبوك، بتقدم محتوى في شكل مقالات باللغة الإنجليزية، عن كل ما يخص الفيسبوك والتسويق الرقمي، من خلال الفيسبوك والإعلانات، وإزاي نقدر نستخدم السوشيال ميديا في التسويق لبيزنس خاص بينا أو لتطوير مهارتنا في العمل.
بتاع كوبيز
الصفحة دي بتقدم مقالات بشكل شبه يومي، تخص التسويق وكتابة المحتوى، وإزاي نكتب محتوى يكون إبداعي وجذاب ويحقق الهدف التسويقي للمنتج، أو البيزنس اللي بنعلن عنه.
وأخيرًا، في الوقت اللي الأزمة فيه بتكبر والشائعات بتنتشر فيه ناس قررت تضيع يومها كله في متابعة الأخبار السلبية وسكرول داون في فيسبوك وتويتر، من غير أي فايدة غير شعور بالخوف والإحباط، وقلة إنجاز في الشغل بسبب الحالة النفسية العامة، وناس تانية قررت تستغل الأزمة في إنها تساعد نفسها من خلال مواقع التعلم عن بُعد وإنجاز حاجات متأجلة، وتطوير مهاراتها، متفائلين إن الأزمة هتنتهي قريب وهنرجع لحياتنا الطبيعية، بس الوقت اللي هيروح مننا مش هيرجع.
اقرأ أيضًا: كورسات أون لاين: 5 طرق لبدء مشوار نجاحك من على الكنبة
