بقلم: شيري حنا

مشكلة الارتباط اليومين دول بقت عويصة شويتين، والاختيار ف حد ذاته قصته بقت أصعب، لآننا متربيناش إزاي نختار صح، متربيناش على إننا نأهل نفسنا لخطوة الارتباط والاندماج فى كيان شخص تاني، متعلمناش إننا قبل ما ندور على الشخص المناسب نجهز نفسنا ونشتغل على نفسنا عشان نكون إحنا كمان مناسبين.

إزاي نفهم مشاعرنا

متعلمناش إزاي نفهم مشاعرنا ونعبر عنها صح، ونعترف بوجودها، مكانش عندنا الوعى الكافى لفهم نفسنا واللى بيدور جوانا من مشاعر وأفكار، عشان كده لما كبرنا واجهنا أزمة كبيرة في الارتباط بالشريك المناسب، وأزمة أكبر في الاختيار. عندنا عمى مشاعر، لآننا متعلمناش نفهم نفسنا صح ونعبر عنها صح، بقينا نتصرف عكس اللي جوانا وفاكرينها شطارة. فلما بنحب بنعك الدنيا، ونوصل رسايل غلط لحبابينا ونرمي كام دبشة ف وشهم، تقفلهم مننا خالص وتدمر العلاقة. يعني بدل ما نهتم بالشخص اللى بنحبه بنهمله، بدل ما نقرب منه ونفهمه، بنهرب ونبعد ونخاف.

علمونا التقل صنعة

التقل خرب علاقات كتير، كان ممكن تكون من أنجح وأجمل العلاقات والجوازات. نفضل نتقل ع الطرف التاني لحد ما يزهق ويمل، ومشاعره تبرد، ونرجع بعد فترة طويلة نجري وراه من تانى. بس مع الأسف بعد فوات الأوان، بعد ما يكون يئس ودخل في علاقة تانية مش عاجباه ولا باسطاه، عشان فقد إيمانه بالحب.

قيمنا مغلوطة

1. خد اللي يحبك ومتخدش اللي تحبه: طيب ليه؟ ما آخد اللي بيحبني وأحبه عادي، ما هي لازم المشاعر تبقى متبادلة، عشان تعيش وتكمل.

2- الجواز فرصة: مين قال إنه فرصة؟ هو مش وظيفة ولا منصب، دي حياة كاملة، لازم تقوم على أسس من التوافق والحب والقبول والاحترام.

3- ضل راجل ولا ضل حيطة: لأ ضل الحيطة أرحم ميت مرة من حضن راجل مش بتحبيه، عشان هتكرهي نفسك بجد وإنتي معاه، هتحسي إنك مسجونة في علاقة مش عارفة تخرجي منها، وهييجي عليكي وقت تتمني ضل الحيطة، اللي هتكون أحن كتير من حضن راجل مبتحبهوش.

4- لازم تاخد واحدة جميلة: مين قال إن المواصفات الشكلية أهم حاجة في الجواز؟ ومين قال إن الراجل مش بيهتم غير بالشكل والجسم؟ كل ده مش صح، مهما كانت الست جميلة هتتعود ع جمالها مع الوقت، هتبقى لوحة حلوة بتزين بيتك مش أكتر، ولو مش بتحبها ومش مرتاح معاها ومش متفاهمين، هيبقى الجواز تقيل على قلبك وخانقك، وعاوز معظم الوقت تفلت وتعيش حياتك مع نفسك وأصحابك. هتبقى منفصل نفسيًا عن مراتك، كل اللي بيجمعك بيها إشباع احتياجك مش أكتر، وكل دورك في الجواز هيكون بابا اللى بيصرف ع البيت والعيال. حتى جميلة الشكل ممكن الحياة معاها تبقى لا تحتمل، لو مفيش حب متبادل وتقدير واحترام.

مهم نراجع أفكارنا

محتاجين نراجع افكار وارثينها من سنين، أفكار مغلوطة جدًا عن الجواز، وطبيعة العلاقة بين الزوجين، أفكار مغلوطة اتبنى عليها جوازات فاشلة كتير، ونتج عنها أولاد وبنات بيعانوا من مشاكل نفسية كتير. البيت الخالى من الحب المتبادل والقبول والاحترام والتواصل الجيد، بيت غير ناجح أساسه غير سليم، وعمر أفراده ما هيبقوا سعدا وراضيين وفرحانين وأسوياء.