بقلم: روكسان رأفت
كل يوم بنقرا، بنسمع، بنتفرج على أفلام بتتكلم عن العلاقات. العلاقات بمختلف أنواعها، علاقة الأزواج ببعض، الأهالي بأبنائهم، الأصدقاء.. وهكذا. والحقيقة في الكام سنة اللي فاتوا ظهر الوعي بشكل كبير جدًا بين الناس، تجاه الإساءات في العلاقات، وإن معظمنا متسددلوش احتياجاته الأساسية، وده اللي خلانا كلنا عندنا احتياجات لعلاقات صحية، ربما تقدر تعوض جزء من اللي فاتنا.
ولما بفكر في الإساءات اللي بتحصل في حياتنا بمختلف علاقاتها، بتخيل إن أسباب الإساءات دي اتنين ملهمش تالت:
- إما الشخص ده سواء كان أب أو زوج أو أخ أو صديق عمل حاجة متتعملش، أو يعني بمعنى أصح المفروض إنها متتعملش.
- معملش حاجة المفروض كانت تتعمل، سواء عن قصد أو بدون قصد (جهل أو عدم دراية بالوسيلة).
والنقطة الأولى سهلة وبسيطة (مقصدش سهلة وبسيطة في تأثيرها لكن أقصد سهلة في تحديدها) بسهولة تقدر تميز إن الأب ده بيشتم ابنه أو بيضربه، أو الزوج ده بيهين مراته أو بيمد إيده عليها، سهل نقول إن الصديقة دي بتتكلم وحش من ورا صديقتها وبتخون ثقتها وحبها. سهل نحط إيدينا على السلبي اللي حصل وضرنا ووجعنا.
لكن الصعب واللي أعتقد ربما حصل مع ناس كتير مننا، هو السبب التاني، إن الناس المهمين اللي في حياتي بداية من أهلي أبويا وأمي مرورًا بأصدقائي وصولاً لشريك حياتي معملوش معايا اللي المفروض يتعمل. فتلاقي الزوجة بتشتكي وتقول أنا جوزي سلبي جدًا، مهما يشوف حواليه بيحصل ميتحركلوش ساكن، لو مجريتش عشان نتكلم ونتواصل ميفرقش معاه أي حاجة، عمره ما حاول يفهم أنا بحب إيه وعمله، كل اللي بيهتم بيه إنه ياكل ويشرب وينام ويرتاح وبس.
وتلاقي الابن أو الابنة بيتكلم ويقول أهلي ناس كويسين قوي، يمكن يكونوا بيحبوني لكن عمرهم ما قالولي كده، عمري ما حسيت إنهم بيهتموا بحاجة تاني غير الأكل والشرب والمذاكرة. مقدرش أتشارك معاهم في أحلامي وأمنياتي والحاجات اللي بفكر فيها. محدش فيهم فاهم شخصيتي، عمرهم ما شافوني صح وشجعوني وقالولي برافو، مكانوش بيحضنوني خالص مع إني بحب الأحضان جدًا منهم.
وتلاقي ناس كتير بتشتكي نفس الشكوى، طبعًا لو فاهمين ومدركين النوع ده من الإساءات اللي بنسميه الإساءات السلبية. لكن لو مش فاهمين أو مقرؤوش أو سمعوا قبل كده عن النوع ده من الإساءات هتلاقيهم حاسين بحاجة مش عارفين يوصفوها، عايزين يقولوا إن فيه حاجة ناقصاهم بس مش عارفين اسمها، موجوعين من حاجة لسه مش عارفين يعرفوها.
ولكل هؤلاء أريد أن أتحدث..
مقدرة جدًا ألمكم ده، يمكن لأني بشارككم في جزء كبير منه، ومدركة قسوة هذا الشعور، خصوصًا عندما لا يقبل من ناس كتير ولا يعترف به كواحد من الإساءات أو الاحتياجات. احتياج إنك من حقك تحتاج احتياجاتك الأساسية من حب، قبول، تقدير، اهتمام، احتفاء بك، فهمك على حقيقتك، إنك تتشاف وتتشجع ويبقوا حبايبك فرحانين بيك. أقدر جدًا فكرة إنك يمكن مش هتعرف تعوض المفقود ده بصورة كافية، وإن كل اللي ممكن يحصل بعد الاستنارة دي هو إنقاذ للي جاي، رؤية الحياة القادمة في ضوء المستجدات دي وتصرفك تجاهها بناء عليه.
أعلم عزيزتي الزوجة حيرتك حينما تفكرين أنك غير مفهومة من زوجك، وغير قادرة في بعض المرات على شرح نفسك، أعلم جيدًا إن في بعض المرات تصير فجوة بينك وبينه بسبب عدم فهمه إياكي، ولهذه الفئة الأخيرة (أي نحن الزوجات) أحب أقول شوية حاجات يمكن تساعدنا:
نصائح للزوجات
1. جوزك مش بيقصد يضايقك خالص أبدًا، هو مش بيكون حاطط خطة بيقول فيها لنفسه أنا عارف إنها بتضايق من دي فهعملها.. لأ. هو بيتعامل معاكي بشخصيته الحقيقية اللي نتجت عن تفاعله مع ظروفه وأسرته وطريقة تربيته، والأحداث اللي حصلت في حياته. وطبعًا ده مش معناه إننا نستسلم للفكرة دي ونوقف نشرح نفسنا. لأ.. مقصدتش كده، قصدت أقول إن معرفتك وإدراكك للنقطة دي بيخفف من تفكيرنا إحنا كستات في جملة “ده مش بيحبني ولا راضي يفهمني”. لا هو لسة مش عارف يفهمك.
2. مرات كتير إحنا كستات بنخطئ في توقعاتنا واللي منتظرينه، لما أفهم شخصية شريكي هعرف أتوقع لحد فين منه، عشان محملوش أكتر من طاقته ومن اللي ممكن يعمله.
3. محتاجة أفهم نفسي كويس وأركز على نقطة واحدة في كل مرة هلومه في حاجة، مش معقول مرة واحدة هروح أقوله حبني وخليك رومانسي وهاتلي هدايا واقعد بالعيال عشان أخرج مع صاحباتي. ده كده يخض خالص وميساعدش، لكن حددي إنتي عايزة إيه واحدة واحدة وبالتدريج وبالراحة.
4. شجعي الخطوات الصغيرة ودوري عليها إن شالله بميكروسكوب أرجوكي.. إحنا بنحاول نحسن الوضع.
5. نبص لنفسنا شوية بقي، خلي ليكي مجتمع برة الجواز، أصحاب، هوايات، حاجات بتحبيها. ده بيخلي حياتك مش متوقفة على شخص واحد محدود هو كمان، لكن عندك علاقات دافية تساعد وتعوض وتشجع.
يمكن نكون فقدنا الأمل في حاجات كتير، بس فيه جملة دايمًا بقولها لنفسي “كده كده الحياة صعبة.. يعني أنا لو بطلت أعافر هرتاح؟ يمكن المعافرة تجيب نتيجة ولو بسيطة”.
دمتم آملين.
كل الشكر والتقدير