بقلم/ سلمى شعبان
كل لحظة وكل ثانية كلنا بناخد قرارات كتير. هناكل إيه؟ هننزل إمتى؟ هنذاكر ولا هنطنش؟ وحاجات كتير، لكن فيه قرارات في حياة كل واحد فينا مينفعش أي حد ياخدها غيره هو بس. ولا حتى حد يساعدك تقرر فيها ويمكن كمان ولا ينصحك. بس خلينا نقول النصيحة شيء جميل ما دام مش هتأثر على قرارك اللي إنت عايز تاخده من جواك بجد.
1- أول قرار مصيري في حياة أي شاب مصري أصيل أو شابة هو قرار الثانوية العامة ويا ترى هل أدخل علمي ولا أدبي. ونصيحة من مجرب اختار اللي إنت عايزه أيًا كان هو إيه. أيًا كان هتنجح ولا هتفشل ولا خايف متدخلش كلية كويسة. لأن بكل بساطة ممكن تدخل وإنت مؤمن بنفسك جدًا وحابب قرارك فتتعب وتجتهد وتوصل للي إنت عايزه وتفرح بنفسك جدًا، وإنما لا قدر الله فشلت فبرضو إنت جربت مخسرتش كتير.
2- القرار التاني اللي بيعدي بعد الثانوية العامة هو قرار اختيار الكلية. وده بقي مشكلة المشاكل، لأن الأهل كلهم بلا استثناء عايزين ولادهم يا دكاترة يا مهندسين، وفيه بعض الناس معندهاش أي مشكلة تجبر ولادها على الكليات دي، حتى لو هي مش من ميلوهم أو قدراتهم حتى، لكن بياخدوا عنهم القرار ده بحجة إنهم صغيرين. ونصيحة مني برضو اختار الكلية اللي إنت عايزها مهما كانت قمة أو قاع، لأن في الآخر إنت اللي هتدرس وإنت اللي هتنجح أو تفشل.
3- أما تالت قرار فهو قرار الاستمرار في وظيفتك أو إنك بتسيبها. يمكن يكون أصعب قرار في حياة أي إنسان، خصوصًا لو مسؤول عن بيت وأسرة. لكن وقت ما تحس إنك عايز تسيب الشغل سيبه وأكيد هتلاقي المكان اللي هترتاح فيه.
4- يمكن يكون أهم قرار في حياتك كلها إنك تختار شريك حياتك. إياك ثم إياك تختاره على أساس رأي حد أو مواصفاتت حد كلمك عنها. لازم إنت اللي تختار بدون أي ضغوط من أي نوع.
5- قرار الانفصال عن شريك حياتك لازم تاخده بكامل إرادتك من غير أي ضغوط، ومن غير ما تحس إنك لازم تكمل معاه عشان أسباب كتير. لو إنت عايز تكمل كمل، ولو مش عايز أو مش قادر متكملش تحت أي اعتبار، لأن في الآخر اللي هيتعب هو إنت واللي هيرتاح هو إنت. وإنت برضو تقدر تبدأ من أول وجديد.
6- قرار الخلفة، قرار صعب صعب صعب. كله مسؤوليات، وأقل شيء وأجمل شيء هو ضحكة ابنك أو بنتك، والباقي كله صحيح مش سهل. متخلفش عشان لازم تخلف. خلف عشان إنت بجد عايز وحابب تاخد بالك من كيان تاني وتطلعه إنسان صالح للمجتمع.
7- قرار الخلفة لتاني مرة أصعب بكتير من أول مرة. لازم تفكر كتير وتكون مستوعب إنك بجد عايز تشيل نفس المسؤولية اللي شيلتها قبل كده وتخليها مضاعفة مدى الحياة. خلف عشان إنت عايز تخلف تاني مش عشان لازم تخاوي الواد أو البت.
8- قرار إنك تبقي ربة منزل عشان تربي العيال سهل أوي في الأول، بس بيكون صعب جدًا بعد كام شهر، خصوصًا لو الأم من النوع الطموح اللي تحب الشغل زي عينيها وليها كيان ومن زمان. فكري كويس وملكيش دعوة بنصيحة أي حد، لو هتقعدي في البيت عشان الولاد يبقي عشان إنتي عايزة كده، مش عشان لازم تعملي كده. فيه حلول كتير تقدري تفكري فيها وتعمليها وتوفقي بين شغلك وبيتك.
9- قرار السفر والغربة. مش هتكلم كتير، لكن الواقع غير الخيال خالص. والغربة مش بستان فلوس، دي كلها تعب في تعب. وافتكر إني قلتلك بلاش.
10- قرار العودة لأرض الوطن بعد الغربة أصعب وأصعب، لأنك هتلاقي نفسك بقيت متغرب جوة وبرة، وهتاخد وقت على بال ما تتأقلم، ويمكن متقدرش. فارجع لأنك عايز ترجع واستكفيت مش عشان الكل بيقولك ارجع.
11- قرار الزواج الثاني. إذا كنت عايز تتجوز تاني فكر كتير، وخصوصًا إذا كان الجواز ده هيدمر وراك أسرة ملهاش ذنب أو إذا كان بعد زواج فاشل.
12- قرار إنك تقطع علاقتك بحد متستمرش في علاقة مع أي إنسان مهما كانت درجة قرابتك بيه لمجرد إنك لازم تعرفه، مش عايز تعرفه متعرفهوش وتضغط على نفسك. وأنا هنا مش بتكلم عن قطع الأرحام طبعًا.
13- قرار إنك تجدد حياتك يعني متستناش إن حد يقولك جدد حياتك. جددها وغيّر في نفسك لما تحس إنك خلاص زهقت من نفسك ومن شكلك وعايز تتغير وتجدد.
14- قرار إنك تكون مبسوط مينفعش حد يكون في إيده مصير سعادتك وفرحك. إنت اللي لازم تقرر إزاي تكون مبسوط وإمتى، مش أي حد تاني.
15- قرار إنك تسامح حد غلط في حقك التسامح شيء جميل، لكن مينفعش حد يجبرك عليه ولا ينصحك بيه. عايز تسامح وتغفر هتعمل كده من نفسك، ولو مش قادر ومش عايز متغصبش على نفسك.
