بقلم/ مارسيل إبراهيم
2015 بالنسبة لي كانت سنة العملي، سنه التخرج والشغل. أول سنة بتعامل مع الواقع بصفته واقع مش بصفته محاضرات وامتحانات مرتين ف السنة.
كنت بقول إني اتعلمت فيها دروس، ومكنتش فاكرة انهم ممكن يوصلوا لـ15 درس.
مش كلهم كانوا سهلين وأنا بتعلمهم، ولا كلهم نجحت فيهم، بس الجميل إن نظام التحسين لسه متلغاش م الحياة.
1- ونس إني أكون وحدي
إني أكون قاعدة وحدي ومعايا كتاب أو بتفرج على فيلم.. ونس الدنيا.
2- وحدة إني أكون وحدي برضو
فيه أوقات غريبة وأيام أغرب كده، لا تلاقي حد تكلمه ولا حد أصلاً ينفع أقوله على اللي جوايا، الأوقات اللي لازم يكون فيها حد زي “بينج بونج” صديق البنت في فيلم “”inside out.
3- مفيش حاجة بتفضل على حالها
طبعًا دي زي اللي قبلها مش حاجة جديدة، بس بالنسبة لي ده كان درس العملي اللي بجد فاجئني، أصحابي اللي يوميًا كنت معاهم، دلوقتي يعدي الشهر أو أكتر عشان نتكلم مكالمة واحدة، حتى فاتورة تليفوني اللي بتخلص قبلها بيومين بقيت أسيب فيها بالـ100 دقيقة وأكتر.
4- أنا عاوزة إيه؟
الحقيقة ما زلت بسأل، واللي علمتهولي 2015 إن فيه سؤال ف الحياة اسمه “أنا هنا ليه؟ هعمل إيه ف حياتي؟ بحلم بإيه؟”.
5- القراية حلوة مفيش كلام
ده بقى الدرس اللي أثبت ثباته على مر سنين النظري والعملي، الدرس اللي ياخدك رحلة وإنت ف مكانك، الدرس اللي يكبّر دماغك واحدة واحدة، الدرس اللي يعلّمك ويعلم معاك.
6- أصحابك ف شغلك أحلى من المرتب
وزي ما فيه أصحاب شبهي ونفس ظروفي وظروف دراستي ويومي وبعدت عنهم شوية.. فيه بقى ناس مش شبهي ومش سني ومختلفين عني، ينفع يكونوا أصحابي وأصحابي جدًا كمان، وينفع يفرقوا في حياتي جدًا كأني أعرفهم من زمان.
7- ركز في المشهد مش الصورة
الضحكة تطلّع الصورة حلوة.. وضحكة القلب تطلّع الحياة أحلى.
8- الحاجات البسيطة بتفرّح أوي
يوم أجازة، معرض كتاب، سفرية مع ناس بحبهم.
9- الورقة والقلم اختراع مدهش
ده بقى اللي لازم أشتغل أكتر عليه الوقت الجاي.
10- أغلى هدية هديتي
الخاتم اللي بجيبه لما أقبض جمعية من مرتبي، الشوكولاتة أو شويه التوك الملونين وأنا راجعة من الشغل.
11- الوقت وما أدراك!
إحم.. ما هو مش كل امتحانات العملي هنجح فيها من أول مرة.
12- العيلة
اللمة يوم العيد.. القريب اللي جاي انهارده من بلاد برة وآديلنا سنين مشوفناهوش.. الفيلم والمسرحية ولمة الكوتشينه.. اللمة والدفا اللي فيها.
13- الإنجاز طعمه حلو
الأوضة اللي بتتوضب، الدرس اللي بشرحه حلو، الجدول اللي بكتبة وأمشى عليه، الروشتة اللي بعرف أقراها لوحدي.
14- علاقتي بربنا
من أكتر الدروس اللي مش قادرة أواجه نفسي بيها.
15- وما خفي كان أعظم
وده بقى اللي هتقولي عليه 2016.
شكرًا للحملة اللي خلتني أفكر ف دروس 2015، وخلتني أكتشف إنها كانت سنة غنية وقوية ف دروسها.
