كل سنة و انتِ طيبة يا ام الفصاد …. قصدي يا نون 🙂
للأسف انا مش من سعداء الحظ اللي ابتدوا معاكي من لحظة الميلاد ، انا عرفتك مؤخراً ، من شهرين أو تلاتة بالكتير .. كان عمرك كام شهر وقتها ، يعني بتناغي و تضحكي و تحبي و يمكن يتقولي ماما و بابا كمان !
في الكام شهر دول قدرتي تحجزي مكانك في قائمة أولوياتي ، مش بس كده انتِ كمان بقيتي من اهم الحاجات اللي بتصالحني ع الدنيا لما نتخاصم !! و احنا بنتخاصم كتير على فكرة بس معاكي بنتصالح على طول 🙂
كتير من موضوعاتك _ إن مكانش كلها يعني _ بتعبر عني و بحس اني انا اللي كاتباها كمان !
من أول مقال قريته هنا و انا حطاكي في دماغي ، و مصّرة اني أكتب في قلبك بمشاعري كل اللي ربنا يقدرني عليه ، أصل مفيش مكان تاني هايقدر يحتوي كلماتي !
مش قادرة احكيلك عن فرحتي بأول مقال ليّ هنا في كلامنا الوان ، بالمناسبة كلامنا الوان اسم حلو اوي اوي بيحسسني ان الدنيا ربيع و كلها الوانات و بهجة و فرحة
أنا ماشية بقى عشان طولت عليكِ شوية و الكلام معاكي حلو و مش عايز ، فاضل بس حاجة واحدة عايزة اقولها لك .. يا رب عقبال سنين كتير و انتِ متألقة و ناجحة و بتعبري عني و عن كل البنات …… و أنا و معاكي طبعا 🙂
