بقلم: ندى أمير
الحياة فيها قدر كبير من الإنهاك والمعاناة، إنهاك المسؤوليات والأحلام والتوقعات.. إنهاك إننا بنزايد على بعض حتى في التعب والإرهاق، رغم إن كلنا بنعاني بس إلى جانب ده إحنا بنزود معاناة بعض بإننا بنزايد مين فينا تعبان أكتر، مين تعبان حقيقي ومين بيدّعي.. كل ده بياخد مننا ومن طاقتنا، بس للأسف قصاد اللي بيتاخد مننا ده مفيش شيء بيرجع لنا من الطاقة دي.. أو من أرواحنا، عشان كده النفسية دايما محتاجة زقّة.
لكل واحد تكنيك خاص به، إزاي يعرف يزق نفسه ويجدد طاقته ويزودها، بس أنا هقول شوية اقتراحات ممكن تساعد اللي مش عارف إزاي يزق نفسه:
حب نفسك
أغلب الطاقة اللي بتروح والإنهاك بيكون لأننا مش قادرين نحب نفسنا ونقدرها، نحب نفسنا فنسامحها لما تقصر، نحب نفسنا فنتخلى عن الإحساس بالذنب وتأنيب الضمير اللي في غير مكانه، نحب نفسنا فنحدد مسؤوليتنا، ونتوقف عن أي استنزاف لنفسنا وطاقتنا، لإننا عايزين نبقى مسؤولين عن كل شيء في الكون.
الحياة فيها مسؤوليات كتير بس جنب المسؤوليات في أولويات، عشان نقدر نتحمل مسؤولياتنا ونقوم بها بالشكل المظبوط، لازم نحددها ومننساش نفسنا، ونُستنزف في كل حاجة فنوصل في الآخر لإننا مش عارفين نقوم بأي حاجة، مش عيب أبدا إني أقول تعبت ومش لاعب، أو إني أتوقف عن مساعدة حد لأن اللي جوايا من طاقة وقدرة خلص، بس العيب إني آجي على نفسي لحد ما أستنزفها وميبقاش عندي قدرة لا لنفسي ولا لغيري.. ولازم جنب ده أول ما ينط شبح الإحساس بالذنب أوقفه وأتفهم إني مش مذنب.. ولازم لو حتى أذنبت أو قصرت أسامح نفسي عشان أعرف أكمل.
دوّر على نفسك
تعريفنا لنفسنا دايما فيه التباس، يمكن تربيتنا مش دايما بتساعدنا نعرف إحنا مين بشكل صحيح، يمكن كمان تعريفنا لنفسنا بيتأثر جدا بتوجيهات اللي حوالينا وبتأثُرنا نفسنا بهم، بس في لحظة معينة كده، الواحد فيها بيحس إنه في غير مكانه، وإنه مش مقتنع باللي بيعمله في الحياة، وإنه محتاج يكتشف نفسه أكتر، ويعرف هو مين وبيعمل إيه.. في اللحظة دي لازم نبتدي ندور على نفسنا ونصدق اللي هنلاقيه.
ندوّر على نفسنا بإننا نتبع شغفنا، نفكر أكتر إيه بنحب نعمله وإيه لأ، نجرّب حاجات جديدة ونكتشف ناس وأماكن ودواير معارف جديدة، وبمجرد ما نمسك بأول الخيط نحاول نقرّب من نفسنا ومن شغفنا أكتر، ومنتخلاش عن أحلامنا.
يمكن في شوية حاجات بسيطة ممكن تتجرب عشان نعرف نفسنا أكتر زي مثلا..
السفر: السفر لوحدك من أكتر الحاجات اللي بتقرب الإنسان لنفسه، وبتخليه يكتشفها أكتر ويتصالح معاها أكتر.
التأمل: التأمل مش لازم يكون يوجا وجلسات استرخاء طويلة، ولو إن دول مهمين جدا، بس التأمل ممكن يكون بإنك تبص على حياتك من أولها لآخرها، وتفكر فيها بتأني وصبر وتحاول تتفهم إيه منها كنت عايزه وهتكمل عليه، وإيه منها ماكانش بتاعك وهتتخلى عنه.
تجربة حاجات جديدة: نسأل نفسنا إيه هي الحاجات الجديدة اللي عايزين نجربها، ومهما كانت منتكسفش منها، ممكن تجرب ترسم، ممكن تجرب تلون، جرب تتعلم مزيكا، تتعلم لغة، تتعلم رياضة.. جرب تحضر دروس رقص.
احمي نفسك
كلنا لينا دايرة طاقة لما بتختل بنتعب، لازم نعرف إزاي نحمي نفسنا من الاستنزاف أو من أي خلل في دايرة الطاقة بتاعتنا، في حاجات تبقى واضحة لينا إنها بتبعت لنا طاقة سلبية وبتنهكنا، لازم نعلّم على الحاجات دي أو الأشخاص دول، ونحاول نحمي نفسنا منهم، ونبعد عن المؤثرات السلبية، ولو مفيش فرصة نبعد نحاول طول الوقت ننبه نفسنا وتفكيرنا إنه في هنا طاقة سلبية، وأنا عليا إنها لما تتبعت لي مستقبلهاش.
