بقلم/ منى حراجي
أبنائي الأعزاء ذو سن الآشر.. كبرتوا صلاة النبي وبقيتوا رجالة وعندكم شيء غريب غير واضح الملامح أعلى شفاتيركم الكبيرة وأسفل مناخيركم المفلطحة، وأعتقد إنه قد جاء الوقت وحان لإيضاح بعض النقاط الهامة في حياتكم، حتى لا تصبحون نكبة من العينات التي نراها أمام أعيينا يوميًا.
1- حبيبي يا ابني منك له.. لا بد أن تدرك تمامًا معاني الأشياء في هذه السن.. الجزامة ما هي إلا مكان لوضع الجزم، واضح من الاسم، إيه بقى لزمه العناد؟! يعني الجزم اللي بقت مقاس العلب دي تتحط جوة الجزامة يا بابا منك له مش في الأنتريه أبدًا.
2- الدولاب عشان نحط فيه الهدوم، وأخصّ بالذكر النضيف منها.. وحصان المكواه عشان يركب عليه الهدوم ونكويها.. السرير ده للنوم.. أظن واضح جدًا الكلام.. مش لازم عرض الأزياء بقى اللي معمول في الأوضة أو المستنقع اللي ورا الباب.
3- في كل أوضة باسكت مش عشان تتمرن ترمي المناديل فيه ولو نشّنت غلط منتظر لمّامة المناديل الفضائية تنزل تشيله.. أبسلوتلي نوت.. وبلاش قشر الموز وورق الشوكولاتة السايحة في باسكت أوضة النوم.. لأن وارد تيجي حيوانات قارضة تعضّك في حتة وحشة بالليل، آديني حذرت أهو.
4- على بعد خمس خطوات من المكان اللي بترمي فيه هدومك وشرباتك (أوووووف) يوجد ما يسمى بباسكت الغسيل.. ده مش مجرد تشابه أسماء.. ده مخصص للهدوم اللي ريحتها فاحت مسك وعنبر يا حبيبي.
5- مفيش حد بيخرج وبياخد غسالة الهدوم معاه، عاوز تلبس هدوم معينة فيه ماكينة تعمل بالكهرباء ممكن تحدف هدومك حدفتك المعتادة وتكلف خاطرك وتدوس بصباعك الشريف على زر التشغيل.. آه وربنا!
6- أنا اقتنعت تمام الاقتناع إنك هتنام على السرير كل يوم، وإنك لو عدلته هيرجع يبوظ تاني، عشان كده قررت أؤكلك في نفس الطبق كل يوم من غير غسيل.
7- ماما تُصنَّف من البشر، يعني بمعنى أدق بني آدم، ممكن تكون تحت ضغط متنرفزة.. متخانقة.. متنكد عليهاAs usual .. مستحملة حياتها كلها عشان خاطرك، يبقى تخلي عند أهلك دم وتراعي ده ومتبقاش حمل تاني عليها.. خليك حسيس يا بني آدم وبلاش حاضر اللي بتريح.
8- لو ربنا قدّرك وغرفت أكل لنفسك حاول تختار طبق ذو حجم وعمق مناسب، وحاول تنشن إنك تحط الأكل في الطبق مش على البوتجاز أو تمسح بيه أرضية المطبخ، كَذِبَ مَنْ ادَّعَى إن دلق الأكل خير.
9- رائع إنك تكون نضيف وتستحمى، لكن مش غريبة إنك ولا مرة قادر تفهم إنك لازم تاخد معاك غيار وإنت داخل تستحمى بدل الصياح ده؟! خلاص سيرتك بقت على لسان الجيران.
10- لو ليك أخت بنت دي مش حاجة غلسة زي ما إنت متخيل، بكرة تشوف دي هتعمل معاك إيه.. خليك إنت أخوها وصاحبها، دلّعها على قد ما تقدر عشان يبقى عندها ثقة في نفسها.. جيبلها حاجة حلوة واعتبرها مسؤوليتك وقولها يا موززززة.. وقول لأمك كمان.
11- إنت بتذاكر لنفسك وبتنجح لنفسك وبتتفوق لنفسك، فبلاش صيغة التهديد والوعيد بتاعة طب مش هذاكر.
12- مواعيدك انطباع عن شخصيتك.. لازم تصدق إن عقارب الساعة ماشية ماشية ولا هتعبّرك.
13- عرفنا خلاص إن صوتك بقى غريب وإن “في بيتنا بقرة”، ممكن بقى دلوقتي تستخدم لغة الإشارة من باب المحافظة على البيئة؟
14- المفروض إن الأكل وظيفة بيقوم بيها الكائن الحي، لكن في نفس الوقت حاول تراعي إن فيه ناس في الأحياء المجاورة عاوزة تاكل.
15- إحنا بنربيك بالعافية وعلى مضض، مش ناقصين بقى قطط وكلاب وعصافير وضفادع وكمان بيبيههم.
كلمة في الآخر إن شاء الله أبوك يحج يا أخي.. متقوليييييييييش يا طنط!
