الحب كلمة حلوة جدًا

بقلم/ كاتي عياد

الحب مش أصله الاهتمام، بس الاهتمام بيبقى نتيجه حب.

الاهتمام بس، ده سلوك إنساني بنعمله ناحية بعض عشان نحافظ على آدميتنا وإنسانيتنا.

الاهتمام بشكل عام وسيلة راقية للتعامل في دواير تخصنا عن قرب. مقصدش الاهتمام المرضي بتاع أكلتي.. شربتي.. خرجتي.. نمتي.. صحيتي، وإنه لو معملتش كده يبقى أنا مش بحبك، وإني لو رفضت منك ده واتخنقت من الأوفر يبقى رافضاك.

بس إني أحبك ده معناه ههتم بيك.. بأفكارك وطموحك وشخصك وإزاي أبقى سند ومعين ليك. ههتم على قد ما أقدر وبالمساحة اللي متقيدكش، بس لو حصل يوم لأي سبب تعبت أو اتضغطت أو… أو… أو… ده مش معناه إني بطلت أحب الطرف الآخر، لأ، ده معناه إني هعبر عن حبي في الفترة دي بوسيلة تانية غير الاهتمام.

الحب مش هو المشاعر، بس المشاعر وسيلة للتعبير عن الحب.

المشاعر متغيرة ومودية وبتتغير نتيجة قناعات عقلية. إنت نفسك في اللحظة دي دلوقتي غير إنت

خالص زي الوقت ده السنة اللي فاتت واللي جاية.

المشاعر مبنية على فكرة هات وخد، يعني هتديلي فأنا هديلك. لو اتغيرت معايا هتغير معاك.

وده بيحول مشاعري ناحية الآخر إلى رد فعل لأفعاله.. بستنى آخد منك عشان أحس إنك تستاهل تاخد

مني.

الحب مش هو إن دنيتنا متظبطة وراكبة على بعض فإحنا نحب بعض ونبقى لبعض.

لا ده إنك تكون مصدق فيّ ومصدقة فيك. يعنى مؤمن بيّ وبشخصي، يعني عندك ثقة إنك تقدر تتعرى ذهنيًا ونفسيًا وعقليًا قدامي وأفضل عند تصديقي فيك إنك الشخص المناسب بكل اللي فيك.

الحب مش إني أشوفك أحسن حد في الدنيا فأحبك وإنك تشوفني أحلى بنت في الدنيا فتحبني.

الحب إنك تشوفني مش كاملة ولا مثالية بس قابل تحبني وتكملني وإني أعرف إنك مش أفضل حد في

الدنيا بس أبقى على يقين إنك الجوهرة اللي بدور عليها.

أو إن صلبك ومعدنك من جوة أصلي وتلائمني.

الحب ثقة أعرف أحطها فيك وتسمحلي أدخلك العالم بتاعي وأنا متأكدة إني هفضل في نظرك في نفس

مكانتي مهما كان شكل العالم بتاعي من جوة إيه.

إني أبقى حرة وأنا معاك ومحسش أي قيود أو رقابة عليّ.

الحب هو إني أفرّق بين “إنت” وما يصدر عنك.

إنك لو أسأت التصرف أو زعلتني أو غضبت أو اتعصبت أو عملت أي سلوك مش معتاد إني حتى لو

محبتش التصرف ده فالأكيد إني هفضل حباك إنت.

الحب روح.

زي الأم ما بتحب جنينها وهو في بطنها بمجرد ما اتوجد روح.

هو إني أحب روحك زي ما هي.

الحب ثابت.

يعنى وثقت فيك وقررت أصدق فيك، ومقابل ده منحتك حاجات كتير عن اقتناع، يبقى مينفعش مع الخناقات والمشاكل لما تحصل أقول اتغيرت.. مش هكمل.. مش هينفع.

لأن من البداية اتحط جوايا يقين بشخصك، وده يخليني أعدّي أي حاجة معاك.

When u love me don’t say

I love u

But say

I believe in u

طبعًا كل ده محتاج قرار ومجهود من الطرفين.

قد تتفق قد تختلف مع الكلام ده بس في الآخر ده رأي شخصي.