بقلم/ إيفا نبيل
بقالي كتير مكتبتش، يمكن عشان مفيش حاجة لمستني أو شدتني للكتابة، لحد ما بالصدفة اتعزمت على ندوة في مكان ديني. المسؤولين عن الاجتماع الديني جايبين دكتورة نفسية أو إخصائية تجاوب على أسئلة الحاضرات عن الزواج والتربية، وبغض النظر عن إن في نهاية المحاضرة اتضحلي إن الأم هي المسؤولة الوحيدة عن كل عيوب شخصية الطفل، فكل الأسئلة اللي تخص العلاقة الزوجية، طلعت هي كمان مسؤولية الزوجة.. الزوجة هي اللي أكلت الجبنة.
فمثلاً لو الزوج عينه زاغت واتصاحب على واحدة تانية، فالعيب على الزوجة اللي مش مالية عينه وعلى طول مبهدلة في البيت وبرة البيت مظبطة نفسها.
لو الزوج اتصاحب على واحدة على الإنترنت أو في مكان العمل.. فلان زوجته مش مصاحباه، مش بتتكلم معاه أو مش بتتديله اهتمام، يا حرام واخدة بالها من العيال عشان مفيش حد غيرها.
لو الزوج طفش من البيت.. فلان الزوجة قلبت البيت مدرسة (ظروفها كده)، أو هي والعيال على طول برة البيت من درس لتمرين… إلخ.
لو الزوج عصبي.. هي تبقي هادية وتمتص غضبه. لو قالها كلمة وحشة من نوعية إنتي مال شكلك وحش النهارده، فترد بكل هدوء ومحبة، بس إنت شكلك جميل النهارده.
لازم الزوجة تدي للراجل كل المسؤوليات وتسيبه ياخد كل القرارات حتى لو عارفة إنها غلط، بس برضو تسيبه عشان نفسيته وكبرياءه.
مع احترامي لرأيها.. فين دور الزوج في العلاقة؟ العلاقة عشان تبقى علاقة لازم يكون فيه ٢. كل اللي سمعته من الإخصائية بيقول إن الزوجة هي المسؤولة عن كل حاجة، ما إحنا قلنا هي اللي أكلت الجبنة.
طيب لو عكسنا الأمور؟ لو الزوجة عينها زاغت أو صاحبت على جوزها؟ تبقي خاينة ومتستاهلش النعمة اللي عايشة فيها. مش كفاية إنها لاقت واحد يتجوزها في الزمن ده؟
لو الزوج تخن وبقى بكرش وقاعد في البيت بالفالنة؟ مش مهم، الراجل مش بشكله، الراجل بجيبه.
لو الزوج مش مهتم بالزوجة كست؟ معلش أصله مشغول في الشغل ومش فاضي.
لو الزوجة متبهدلة في البيت ومع العيال ومن مكان لمكان؟ مش مهم. المهم إنها في آخر الليل تبقى مستعدة لطلبات سي السيد.
مش مهم هي عايزة إيه، احتياجاتها إيه، مبسوطة ولا إيه، مش مهم، هي خلاص أكلت الجبنة.
للأسف، طول ما فيه عقليات زي دي، طول ما الزوجة المصرية هتفضل متبهدلة.
المساواة بين الراجل والست تكون في الحقوق والواجبات. العلاقة الزوجية علاقة مشتركة بين اتنين، مش طرف عليه كل الواجبات وطرف له كل الحقوق.
الجواز شركة، كل طرف له وعليه.
والسلام عليكم.
