بقلم: دينا جمال بدر
إيه معنى الدنيا لو مفيهاش أمان؟
وهو إيه معنى الأمان؟
الأمان هو شعور داخلي بيحس بيه الإنسان في ظروف معينة، الظروف دي ممكن يكون صنعها هو بنفسه وفي الوقت نفسه بيحاول يتحداها ويتفوق عليها.. الضغط بيحط الإنسان في ظروف مخيفة، أسرة مفككة، ظروف مادية أو معنوية مزرية، خرس زوجي ومشاكل من كل شكل ولون، كل مشاكلنا دي في الآخر بتصب في عدم وجود الأمان، إنه شعور مفقود.
الأمثلة دي كتيرة ومنتشرة في مجتمعنا العقيم فممكن نلاقي:
1- الأمان اللي بتدور عليه الزوجة ومضطرة تعيش مع زوجها اللي عيشته صعبة وتكاد تكون مستحيلة، عشان خاطر ولادها، دي لو كانت عارفة حقوقها وطلعت من أسرة سوية، الأمان موجود فيها مكانتش هتختار عيشتها دي.
2- الابن اللي سنه قرب على التلاتين أو عداها، وأهله علموه وربوه بس هو معتمد عليهم في أكتر من كده خطوبة وجواز وأطفال، مع إن ده مشواره هو، وهو اللي لازم يبتديه بنفسه.. طب أنت مستني إيه وأنت في سنك ده عاطل أو شغال بملاليم! فين الأمان اللي بتخلقه لنفسك عشان في المستقبل القريب تكون بيت وأسرة، أنت هتبقى ليهم مصدر الأمان والثقة اللي أنت من دلوقتي مش قادر توفرهم لنفسك.
3- البنت اللي الدنيا في نظرها سودة رغم صغر سنها، عشان اتربت وسط عيلة مفيهاش أمان، اختياراتها غلط من دراسة لجواز أي عريس وخلاص وتبقى جوازة سيئة، عايزة تهرب من عالم سيئ لعالم أسوأ.. وتربي أجيال جديدة مهزوزة من جواها، معندهاش أي صفة تصقل شخصيتها وده جه من منشأ الأم المضطرب.
4- البنت اللي ظروف نشأتها لا تختلف عن سابقتها، وإن اختلفت التفاصيل يعني مثلا بنت عشرينية السن، تتجوز راجل مقارب لسن والدها عشان فلوسه، لأنها تصورت للحظة إنه هيوفر لها الأمان، يمكن تحصل عليه لفترة من الزمن، بس بعد ما الأقنعة بتقع، بتلاقي إن الأمان المنشود واللي ياما دورت عليه ولقته سراب.
دي أمثلة بسيطة تحاكي الواقع المر، وكله بيجي من انعدام الأمان، فلو اتوجد الأمان، اتوجدت كل حاجة حلوة لأن الأمان هنا قاعدة الأساس اللي بيتبنى عليها كل شيء.
بالنسبة لي الأمان هو إني لما أموت ويجي الأجل ماكنش وحيدة، أتمنى ساعتها إن ولادي وأحفادي يكونوا حواليا.
