بعد فترة من اليأس ووقف الحال عمومًا في البلد، وفي حياة معظم الناس، فكرت بإن قدامي حل من اتنين، إما الإحباط والاكتئاب وعدم تقبل الواقع، وإما قبول الظروف الحالية اللي البلد كلها بتمر بيها، مع محاولات للنجاة. واكتشقت تفاصيل صغيرة ممكن ننجو بيها من وحدة وركود اليوم في الحظر. وده أول سؤال سألته لنفسي: نهرب إزاي من الوحدة وإحنا مفروض ننعزل ونقعد في البيت، عشان نقلل الضرر علينا وعلى أهالينا وجيراننا؟ وبالتالي الانعزال والهروب أصبحوا وجهان لعملة واحدة. وحبيت أشارككم بالخطوات الصغيرة دي، فلو إنتي سينجل، عايشة وحدك، مغتربة أو في نفس بلدك، هتطقي من الوحدة وزهقتي، لو تنتطبق عليكي المواصفات دي فالمقال ده ليكي.
9 خطوات تعمليها لو عايشة وحدك زهقانة من العزل
1. هتروق وتحلى
أول حاجة تصحي كل يوم الصبح وتطمني نفسك إن ده وضع مؤقت، وكل ما نحاول قبوله والسيطرة عليه كل ما احتمالية إنه يخلص هتكون أسرع. واتخيلي بعد ما الوضع يخلص عايزة تعملي إيه وتسافري فين، هتعملي سياحة داخلية مثلاً ولا خارجية؟ ويا حبذا لو كتبتي لنفسك جواب أمنيات. اكتبي نفسك تبقى فين زي الوقت ده من السنة؟ تكوني لابسة إيه وبتاكلي إيه وبتقضي وقتك الحلو مع مين، يعني احلمي واتمني، الأحلام مفيش عليها فلوس.
2. عصفورين بحجر
شكل وتقسيمة اليوم هيتغيروا على حسب بتبدئيه الساعة كام لغاية ما بيخلص، لأنك لو زي حالاتي بتشتغلي شغل حر (فري لانس) ممكن جدًا تصحي الظهر وتنامي الفجر، وده طبعًا بيأثر على المود العام، خصوصًا برضو لو زي حالاتي وعندك اكتئاب وبتتعالجي.
فهل حسيتي إن الوضع أصبح أسوأ؟ الإجابة: إحساسك صح.
لأن ببساطة من الصعب حد اجتماعي مكتئب وسينجل وعايش وحده ينعزل، بس أرجع تاني وأفكر نفسي وأفكرك إنه وضع مؤقت، وكمان أطمنك إن حتى لو تقسيمة اليوم اتغيرت ما زال فيه أمل إنك تنزلي تتمشي الصبح بدري أو بعد الضهر حوالين بيتك، من غير ما تركبي مواصلات أو تتعرضي إنك تقابلي مجموعة قريبة منك، فيكون التواصل الجسدي سهل. ومنها كمان تقدري تشتري طلبات البيت اللي إنتي محتاجاها ويبقى ضربنا عصفورين بحجر.
3. شوية فضفضة
أنا عارفة كويس قوي احتياجك للونس، خصوصًا اليومين دول وإنتي زهقانة من العزل محتاجة تحكي وتفضفضي، تفتحي مواضيع في أي حاجة، بس من مميزات التكنولوجيا بقى إن عندنا “فيديو كول” نقدر نطمن بيه على قرايبنا وأصحابنا، ونفضفض ونقول كل اللي في قلبنا. صحيح مش بننزل كتير لكن بنخلق الونس بطرق تانية. ولو أزمت قوي قوي تقدري تاخدي بعضك وتروحي يومين لحد من قرايبك تغيري جو، وتحسي بدفا العيلة، وممكن تقابلي حد من أصحابك وتتمشوا في الأماكن العامة، وتكونوا واخدين احتياطاتكم.
4. رمضان جانا
صحيح إحنا السنة دي مش حاسين بزهوة رمضان زي كل سنة، من نزول وسحور وزينة في الشوارع، لكن خلينا نفكر في السباق الدرامي اللي بيتعمل كل سنة في رمضان، ودي تبقى فرضة كويسة جدًا إنك تعملي جدول بمواعيد المسلسلات، فدي حاجة تساعدنا على إننا نعمل روتين لليوم. الكلمة اللي أغلبنا فقدها وقدر قيمتها فعلاً الوقت اللي فات. فنقضيها بين المشاهدة والمناقشات حوالين الأحداث، مع شوية مواعين يتغسلوا وترتيب بعض الهدوم، ومكالمتين تلاتة للاطمئنان على الأهل، هتلاقي فعلاً اليوم خُلُص. (بصوت عم حزومبول).
5. هل قرأتِ اليوم؟
العزلة والوحدة ممكن يبقوا فرصة كويسة قوي لو استغليناها صح من ناحية القراية، لو زهقانة من العزل أهو فرصة تقري الكُتب اللي استلفتيها أو اشتريتيها من آخر معرض للكتاب روحتيه، ومركونة على الرف، ويا سلام لو فيه منها قصص قصيرة لقتل الملل، أو روايات نعيش مع أبطالها مشاكلهم وصراعهم وقصص حبهم، وننسى همومنا ولو شويه، فالقليل من أحلام اليقظة ميضرش.
6. جه وقتِك
اسألي نفسك كام مرة كان نفسك تعملي أكلة حلوة تكون فيها لمساتك إنتي، أو تخترعي صنف في الحلو وكنتي مشغولة، جه وقتك تقفي في المطبخ وتكتشفي هواياتك في الطبخ، وتعملي أصناف جديدة ممكن تبقى من روتين أكلك بعد كده. وعلى رأي جداتنا زمان، البيت اللي بيكون فيه ريحة الخبيز بيكون فيه حياة، مش بس كده، في مرحلة “العجن” تقدري تطلعي جزء من الضغط العصبي اللي بتمري بيه خلال اليوم، وإنتي بتعجني العجينة وبتلفيها وتضعطي عليها، فجربي ولخبطي ودوقي، ومتزعليش نفسك لو باظت أو اتحرقت، ارمي وعيدي من تاني، دي فرصة كويسة لينا كسناجل ناخد خبرة.
7. أخبار الحصالة إيه؟
الوقت ده فرصة حلوة قوي لمشاريعنا الخاصة، اللي بناكل منها عيش وبنجيب منها ماسكات وجوانتيات، فرصة تفكري في طرق جديدة لتسويق مشروعك، أو تضيفي تقنية جديدة للمنتجات اللي بتقدميها للناس، أو تتعلمي حاجة جديدة كانت محتاجة وقت مكنتيش لاحقة تتعلميها في الرتم السريع. كمان مع قلة النزولات وطلبات الأكل من برة فرصة كويسة إننا نبدأ نحوش.
8. دلعي نفسك
ممكن تستغلي القعدة في البيت إنك تدلعي نفسك، تهتمي ببشرتك، تعملي الماسكات اللي مكنتيش بتلحقي تعمليها في زحمة اليوم، وتولعي شموع حواليكي عشان تحققي جو هادي، وفيه ماسكات كتير تقدري تعمليها بمنتجات البيت اللي عندنا كلنا، مش لازم يعني نجيب بـ18 ألف جنيه ماسكات للعناية للبشرة.
أنا عن نفسي بعمل ماسك ينفع لكل أنواع البشرة، بأسهل طريقة ممكنة، مكون من معلقتين قهوة وزلال البيض، اخلطيهم مع بعض وافرديهم على بشرتك واستني ينشف، واغسلي وشك بعدها وهتلاقي أحلى نتيجة.. وطبعًا مش عايزين ننسى الكريمات عشان إيدينا اللي نشفت من الكلور والكحول.
9. أفلام لمقاومة الأرق
أنا واحدة من الناس بعاني من الأرق ومش بعرف أنام بسهولة، لازم عينيا تقفل زي تاندة المحلات لما بتقفل بالظبط. بس من كام سنة كده وقت فقدان والدي مكنتش بعرف أنام خالص من كتر التفكير، برغم إني واخدة الدوا وعاملة اللي عليَّ، فجربت فكرة السهر على الأفلام لغاية ما أنعس، ولقيتها فكرة جيدة بصراحة، لأنها بتخليني مفكرش وأدخل جوة الأحداث وأركز في تفاصيل الأماكن واللبس، ولقيت نفسي واحدة واحدة برفع عيني كمان من على شريط الترجمة، وبركز إني أسمع وأتفرج على الصورة بكامل طاقتي، وطبعًا لقيتها فرصة إن اللغة الإنجليزية تتحسن ولو شوية عندي. وإليكِ سيدتي بعض أسماء الأفلام وكلها من تصنيف الكوميدي الرومانسي:
- He is just not that into you
- Valentine’s day
- The holiday
- 50 First date
- 13 going on 30
- The proposal
- The wedding planner
- No strings attached
- Crazy stupid love
- Ghotos of girlfriends past
ولو بتقري المقال ده بالليل فأتمنى ليكي ليلة هادية سعيدة وأحلام جميلة من غير كوابيس، أما لو بتقريه الصبح فأحب أفكرك بطرق المقاومة وإننا ممكن جدًا مننجحش من أول مرة، لكن بعد كل واقعة نقدر نقوم وننفض هدومنا، وناخد استراحة ونعيط شوية وبعدها نكمل معافرة.
اقرأ أيضًا: الحظر هدنة نرى بها قيمة الحياة
