#على_قد_الوجع_اتعلّمت
لو هطلِق لقب على السنة دي، فهتكون باختصار هي سنة الوجع.
اتوجعت كتير.. بس اتعلمت أكتر.
#ليس_هناك_أناس_يتغيرون_ولكن_هناك_أقنعة_تسقط
زمان كنت متعودة أفلتر علاقاتي الاجتماعية كل كام سنة، ومع مرور الوقت بقيت بفلترها كل 6 شهور مثلاً، لحد ما وصل المُعدّل كل أسبوعين تقريبًا بتصدم في حد، وكمّ الأقنعة اللي بتسقط خلاني طول الوقت ماشية مبرقة ومش عارفه أنطق.. بنفس إحساس إليسا كده “مصدومة بجد ومش بنطق ولا عارفة أرد”. بس عامةً مع الوقت أحب أطمنكم إن الموضوع بيبقى روتيني جدًا زي ما يكون بتغسل وشك كل يوم الصبح أول ما تصحى.
#متبرريش
وده تقريبًا القرار الأصح اللي أخدته في 2015.
ده الهاش تاج اللي خلاني أعمل أي حاجة عايزاها وبدون ما أبرر لحد سبب تصرفاتي. اللي عايز يتقبّلني فأهلاً ومرحبًا، واللي مش عايز فسلام ثم سلام على هؤلاء الذين ملهومش أي لازمة في الحياة.
#الصوفية_ملاذ
الصوفية كانت الملاذ لروحي التايهة، مش بلاقيني غير في مجلس من مجالسهم أو حفل أو في حضرتهم بصفة عامة.. بعتبرهم المتنفس الوحيد لسلامي الداخلي.
#وحدي_لكن_ونسان
مش بس وحدة فعلية وبُعد عن الناس.. لأ كمان وحيدة في أفكاري ومعتقداتي اللي مش لاقية حد أناقشه فيها. بس زي ما قال آسر ياسين في رسايل البحر “ولما بقيت لوحدي.. بقيت حر”.
#فوبيا_الإنجاب
“إنتي هتبقي أم رائعة” الجملة اللي بسمعها طول الوقت بسبب طريقة تعاملي مع طلابي وشدة تعلقي بيهم وتعلقهم بيّ.. بسمعها في الوقت اللي بحارب فيه نفسي اللي بترعبها فكرة مسؤولية التربية والنشأة والسيطرة على الأفكار والمعتقدات في مجتمع مفتوح.. مهما حاولت تحكمه فهو أكبر من قدراتنا البشرية في إحكامه وتبسيط الدايرة عشان نقدر نسيطرعليها.
بقيت حاسة طول الوقت إن من واجبي عليهم إني مجيبهمش أصلاً في مجتمع زي ده.. إلا لو عندي حلول بديلة لحمايتهم.
#الركود_حياة_مع_وقف_التنفيذ
30 يوم بالظبط، مش فاكرة منهم أي حاجة غير إني كنت ببحلق في السقف، أعد مربعات السجادة أحيانًا، مش بروح الشغل، مش بكلم حد، مش بتعبّد.. مش فاكرة اللي حصل، ولا عايزة أفتكر، والحمد لله إنه كان شهر واحد وفقت بعدها.
لو شوفتم حد دخل مرحلة الركود أو الثبات حاولوا تكونوا جنبه، عشان المرحلة دي مش دايمًا بتعدي على خير، وأخطارها أكبر من أخطار الاكتئاب.
#الصديق_وقت_الضيق_فاكس_أوي
مع انتشار الأمراض النفسية الفترة اللي فاتت، ظهر معاها فكرة الدعم النفسي والمساندة، وكان ليها أثر كبير في التوعية فعلاً.. بس الموضوع تخطّى كونه دراسة وعلم إلى فتي مبالغ فيه.
في الحقيقة مش عارفه مين اللي فهّم الناس إن المساندة عبارة عن تحقيق مفتوح لمعرفة الحادث والكائن، أو الاستماتة في فرض رأي ما مثلاً.
المساندة ممكن تكون في أبسط صورها، تقعد جنب حد تعبان ومحتاج ونس من غير ما تتكلم وتزعجه.. وده اللي افتقدته جدًا بشكل شخصي، مما استدعاني أتخلّى عن الفكرة وأطبطب على نفسي عشان أعرف أكمل.
#النضج_مش_بالعمر
الفرق بين النضج والمرض النفسي شعرة، دايمًا بنقول إن نضج الإنسان مش بعمره لكن بتجاربه، ولما بتكون التجارب -وخاصة القاسية- على فترات زمنية متّزنة ده بيساعد في نضج الإنسان.. لكن لما بتكون التجارب على فترات زمنية متقاربة جدًا بحيث الواحد يفوق من صدمة على صدمة تانية ده اللي بيؤدي للمرض النفسي.
وأنا تجاربي كانت قريبة أوي زمنيًا من بعضها، فتحولت جهودي كلها إني أحافظ على نفسي من المرض، فنضجت.
#الصراحة_مش_وقاحة
الصراحة كانت بشكل كبير السبب في تدمير بعض علاقاتي الاجتماعية، لأننا باختصار عايشين في مجتمع مش بيتقبل الحقيقة وبيفضّل المجاملات.
أبدًا مكانتش وقاحة مني لما زرت فلانة العروسة وسألتني عن رأيي في ألوان شقتها وقولتلها “مش عارفة.. أصل بصراحة ذوقي مختلف”، معرفتش أقولها جميلة وأنا عيني وجعتني من الألوان. ولا كانت وقاحة مني لما فلانة اللي مشفتهاش غير مرتين جت تصرّخ من أول الشارع وبتقولي “وحشتيني” فابتسمتلها وسكت، لأني مش حاسة ناحيتها بأي مشاعر خالص… وهكذا.
عامةً صراحتي أنا بعتبرها أكبر انتصاراتي على نفسي؛ مش ناوية أتخلى عنها لأي سبب.
#مش_هلبس_كعب
تلخص مفهوم الأنوثة عندي لفساتين رايحة وفساتين جاية حتى لو على كوتشي مش جزمة بكعب، وأغلب لبسي بقى فساتين أو جيبات أعرف ألف بيها بيرويتّة، الفساتين بقت مصدر سعادة وبهجة، بلبسها وأمشي في الشارع مبتسمة وجاهزة للتصوير في أي وقت.. ثقة بقى.
#المرض_اختبار
المرض هو مرحلة الاستنزاف الجسدي والنفسي.. بس هو في الآخر اختبار لازم نعدّي منه لو متمسكين بالحياة.
#اختلافنا_فطرة_مش_لازم_نحاسب_بعض_عليها
من أغرب قراراتي اللي أخدتها في 2015 إني انسحبت من كل الدواير المفتوحة اللي كنت بنتمي ليها اجتماعيًا، اكتشفت إنهم مش مؤمنين بأهم شعاراتهم، وهي القبول غير المشروط للإنسان، ساعة الجد مقدروش يتقبلوا حد مختلف عنهم بشكل كبير، اتخليت عنهم قبل ما العلاقات تتحول من مجرد اختلاف لصراع.
بشكل شخصي أنا مؤمنة بفكرة التصنيف، لأنه بيسهّل علينا التعامل مع الناس المختلفة عننا.. بس مقدرتش أكون في دايرة رافعة شعار ومش قادرة تطبقه.. فكان الانسحاب واجب.
#فوضى
بنفس مقدار الفوضى اللي جوايا، كان فيه تيار معاكس للنظام في كل حاجة تانية.. تقريبًا كنت بحاول أخبّي الفوضى اللي جوايا بتنظيم كل حاجة ظاهرة.
#الإيمان_ميزان
ده الميزان اللي كان بيوزن كل الحالات اللي فاتت.. لأني طول الوقت كنت مؤمنة إن أكيد بكرة أحلى.
