كام مرة حاولتي تحكي مشكلة وتراجعتي، عشان عارفة إن اللي هتحكيلهم هيحكموا عليكي ويسيبوا المشكلة الأساسية، ويفضلوا يحاولوا يقوّموا سلوكك ويفهموكي أد إيه إنتي غلطانة لمجرد إنك وقعتي في المشكلة دي؟
كتير؟
أنا عارفة! وكل الستات عارفين كده، وعشان كده انتشرت مؤخرًا صفحات ع النت ممكن تحكي فيها مشكلتك من غير ما تقولي إنتي مين، وتاخدي آراء الناس اللي ميعرفوش شخصيتك، وبالتالي المشكلة دي مش هتاخد أكتر من الحيز اللي تستحقه، ومن غير وجع قلب كتير.
أنا تابعت كذا صفحة من الصفحات دي لفترة طويلة، خاصة المشاكل اللي بتخص العلاقات العاطفية للستات، المرتبطات والمخطوبات والمتزوجات، الستات اللي عندهم تقل في قلوبهم مش عارفين يعملوا فيه إيه، مش عارفين يتخلصوا منه بالحكي للمقربين عشان خايفين من نظرة الناس ليهم، ومش عارفين يتعاملوا معاه عشان أتقل من إنه يتحل ببساطة.
الستات، كل الستات، عندهم نفس النوع من المشاكل تقريبًا، مشاكل ليها علاقة بالتقبل والاحتواء، ومشاكل ليها علاقة بالرعب، الرعب من حاجات ترعب ومن حاجات تانية مش مرعبة خالص بس من كتر ما هو ممنوع الكلام عنها اتحولت لوحوش بتاكل قلوب الستات.
ستات كتير بيعرضوا مشاكل تخص علاقتهم بالشريك الظالم، بيكونوا لازم يستخبوا وهمّ بيحكوا المشكلة عشان مفيش ست هتقدر تبص في عينيكي وتحكيلك إن شريكها خانها وكدب عليها وصغرها وأهانها، وهي ما زالت محتاجة إنك تقوليلها سامحيه وكملي معاه.
ستات كتير بيعرضوا مشاكل تخص علاقتهم بنفسهم، الجانب المظلم من كل واحدة فينا، ذنوبها اللي بترتكبها في حق البنت اللي بتبصلها من الناحية التانية للمراية، كراهيتها في أحيان كتير لشكلها أو جسمها، واللي غالبًا متحبش تقولها لحد بسبب خوف غريزي من استخدام الحقايق دي ضدها في يوم من الأيام.
ومشاكل تانية كتير، منها البسيط جدًا واللي لما تشوفيه تحسي إنه مش محتاج إنك تستخبي ورا الشاشة وإنتي بتحكيه، بس بالنسبة للي عرضت مشكلتها هي مشكلة كبيرة جدًا ومش قادرة تحكيها لحد، متخيلة كم المشاكل المسكوت عنها جوة ست شايفة إن الحكي عن المشاكل البسيطة مأساة موقفة حياتها؟!
الموضوع أكبر من شوية كلام مرصوص جنب بعضه بيحكي حكاية تعيسة، الموضوع بيحكي عن نص البشرية الصامت، اتفرجي كده على مشكلة ما على صفحة من الصفحات دي وشوفي تعليقات البنات، كل البنات المتعاطفات أو اللي بيقولوا إن عندهم نفس المشكلة أو اللي بينصحوا صاحبة المشكلة عن تجربة شخصية.
الموضوع بيحكي عن نص الدنيا الزعلان، كل البنات اللي عندهم مشكلة محتاجين حد يقولهم إنهم مش لوحدهم الموجوعين، وإن فيه ستات تانيين بيواجهوا نفس الوحش وبيحاول ياكل قلوبهم، ومع ذلك همّ عايشين وبيحكوا، الموضوع بيحكي عن مجموعات دعم خفية وخايفة تصارح بعضها، الموضوع بيحكي عن خوف أصيل من إن الستات اللي بيتفهموا بعض أوي من ورا الشاشات مش هيقبلوا بعض إطلاقًا وجهًا لوجه، الموضوع بيتكلم عن حيوات مزدوجة وستات مش عارفة تتعايش وعندها صعوبة في الحكي وفي الحياة.
الصفحات دي على أد ما هي مفيدة وبتمثل شباك ممكن واحدة تقف فيه وتصوت بعلو حسها ومحدش يشاور عليها ويقول مجنونة، على أد ما هي شيء موجع جدًا إن ميبقاش فيه سبيل للحكي عن المشاكل اللي بتدوس على قلوب الستات دول غير من ورا الشاشات.
بعد شوية وقت من متابعة الصفحات دي بنكتشف إن كل الستات -تقريبًا- مشاكلهم واحدة، الوجع واحد والتفاصيل مختلفة، في النهاية نفس عدد الدمعات بينزل بس على مخدات مختلفة.
بتكلم عن المشاكل اللي بجد، والوجع الحقيقي اللي يستاهل المشاركة، ومش بتكلم عن الاستفزاز الممنهج اللي بيحصل من بعض الحكايات والمشاكل اللي بتحسسنا إننا عايشين ومش عايشين.
بعد شوية وقت من متابعة الصفحات دي، هتكتشف إن الدنيا الحقيقية فيها مشاكل صعبة، لازم نقبل وجودها، ومع شوية متابعة أكتر هتتعلم تحاول تتفهم عمق الوجع حتى لو مش مهتم بالمشكلة نفسها وشايف إنها مش موجعة بالقدر الكافي.
الستات محتاجين ودن كبيرة تسمعهم بس، لو إنتي ست حاولي تتفهمي صاحبتك وتدعميها، اسمعي مشكلتها حتى لو إنتي شايفة إنها مكانش المفروض تقع في المشكلة دي، اجهدي ذهنك في إنك تلاقي حلول حتى لو إنتي متعرفيش إزاي ممكن تتعاملي مع النوع ده من المشاكل، لأنك مش الشخصية اللي بتواجه النوع ده من الحياة.
ولو إنت راجل، ممممممممممممم، معنديش طلب معين ممكن أطلبه منك في الموضوع ده، مش لأنك مش هتعرف تتحمل مسؤولية وجع شريكتك، بالعكس، لكن عشان فيه أوقات بيكون المطلوب لحل المشكلة أو التعامل معاها إن اللي تسمعني واحدة ست، عندها قلب ست وبتفكر بعقل ست وعاشت نفس الميراث الإنساني اللي أنا عشته.
بس احتياطي يعني ممكن أطلب منك إنك تاخد الزبالة معاك وإنت نازل، أو تجيب لبن وفينو معاك وإنت جاي.
