مستمتعتش بالمدرسة ولا حبيتها ولا قبلتها ولا اتحمستلها، وكنت بتلكك عشان أغيب، مرة أعمل بطني واجعاني ومرة أعيط وأقول حاسس إن ضغطي واطي (مش عارف إزاي في سن 10 سنين!)، ومرة أتسحّب وأطفي المنبه عشان بابا ميصحاش ويصحيني (وبرضو كان بيصحي ويصحيني)، ومرة أتلكّع في الطريق عشان أوصل ألاقي الباب مقفول فأتلكك وأرجع البيت.
مش هكدب ومش هحاول أجيب أي أسباب تخليكي وتخليك تحمّس الأطفال للمدرسة، ومعرفش بتتعمل إزاي الحاجات دي.
لكن على اعتبار إن فيه بعض القراء من المدرسات، فعايز أقول لحضرتك إزاي تساهمي في إنك تكفّري أطفال أكتر من المدرسة وتخليهم معقدين زيّي.
1- احرميهم من حصة الألعاب
مش عارف لما مدرس بياخد حصة زيادة بيتحسبله فلوس زيادة ولا إيه؟! بس دايمًا حصة الألعاب بتنتهك وبياخدها دايمًا مدرس العلوم أو مدرسة الرياضة، أو كليهما معًا إمعانًا في إذلالنا، وده سبب كافي إن الطفل يكره المدرسة ويكره العلوم والرياضة طول عمره.
فخدوا حصص الألعاب منهم وكمان المكتبة والموسيقى. احرموهم من أي متنفس عشان العيال تتعلم الأدب وتكره المدرسة أكتر.
2- إنت مش نجيب محفوظ
كنت دايمًا باخد 7 من 8 أو 7 ونص من 8 في التعبير، ولما كنت بسأل ليه نص الدرجة ده ناقص كانوا يقولولي “عشان إنت مش نجيب محفوظ”.
بس الحمد لله مكرهتش نجيب محفوظ، وبناقص النص درجة اللي يخليني أزعل من نجيب محفوظ، أنا مسامح فيه بس مش مسامحهم.
3- واجب يوم الخميس
طبعًا واجب يوم الخميس بيبقى بمقام يومين.. ليه؟ عشان عندكم أجازة، طب وهي الأجازة معمولة ليه؟ أكيد عشان العيال تقعد تذاكر زيادة. واضحة أهو يا جماعة مش محتاجة ذكاء، ليه العيل يشم نَفَسه؟ ليه يستمتع؟ ليه ينبسط؟ ليه يحس بتغيير؟ ليه يحس إنه حُر؟ ليه يستمتع؟ دي حتى البلد في حالة حرب ومصر مش مستحملة. اديله واجبات يديك إنجازات، وأكيد طبعًا هيحب المادة وهيحب المدرس وهيحب المدرسة.. مش كدة ولا إيه؟!
4- هقعدك وسط بنتين
مصطفى كان شقي، فكانت المـُدرّسة بتحب تعاقبه، ولما منفعتش أساليب التعذيب -التي لا تسمح بها الوزارة علنًا وتستخدمها ضمنًا- واللي ابتدت بالضرب بسن العصاية على ضهر الإيد وحتى لزق اللبانة في الشعر عشان يضطر يحلقه، اختارت الـُمدرّسة عقاب نفسي صارم ميتركش علامات بدنية على جسد مصطفى، عشان لما النيابة تيجي تعاين متلاقيش آثار عنف (تحس يا جدع إنه كورس بياخدوه المدرسين وظباط الداخلية)، المهم نجحت المـُدرّسة في قمع مصطفى بإنها كانت بتعاقبه إنه يقعد وسط بنتين.
وأنا مش هستغرب لو مصطفى لحد دلوقتي عنده مشاكل مع الأنثى وبيكرهها وبيأذي مراته ووالدته وباقي البنات في الشارع بدنيًا ونفسيًا.
وكل سنة وإنتم طيبين.. مصر وأولاد مصر أمانة في إيديكم.. بس أمانة عليكم لو فيكم مدرس ألعاب بيقرا لو العيال فلتوا من مدرسين الرياضة والعلوم ونزلوا حصة ألعاب، أمانة عليك يا شيخ خليهم يلعبوا، متذلهمش أكتر، سيبهم يلعبوا، مش لازم طوابير وتمارين وتزنيبة في الشمس ع الفاضي.. سيبهم يلعبوا عشان يحبوك ويدعولك.
