لاحظت في برامج التليفزيون إن لما برنامج بينجح بتلاقي نسخ كتيرة جدًا منه ملت القنوات، فقط مع اختلاف اسم البرنامج واللي بيقدمه. خدوا عندكم مثلاً برامج رمضان اللي كتير جدًا منها بيقوم على استضافة ممثل/ مطرب (ومؤخرًا سياسيين) وتوجيه أسئلة لهم، برامج المسابقات، برامج الطبخ… إلخ.
كتير من البرامج بحس إنها بتفتقر للإبداع، وقليل منها اللي بحس فعلاً إنه مميز ومتجدد في طريقة تقديمه أو في موضوعه، مع إن لو القائمين على الإعلام فكروا شوية هيلاقوا أفكار والله!
مرة مثلاً كنت بقرأ في كتاب وكان المؤلف كاتب عن برنامج فكرته إنه بيجمع الناس المتخاصمين وبيحاول يصلح بينهم، بإنه بيشجعهم يطلعوا اللي جواهم ويسمعوا ويفهموا بعض، وبرنامج تاني قايم على الجمع بين الناس اللي فرقت بينهم الأقدار ومش عارفين يلاقوا بعض، عن طريق جمع المعلومات وعمل التحريات اللازمة من قِبَل فريق الإعداد.
والحقيقة فقر الإبداع ده مش في الإعلام بس، لكن في حاجات كتير أوي، يمكن منها حياتنا الشخصية. وبغض النظر عن الأسباب اللي يمكن تحتاج كتاب لوحدها، هو كلنا مبدعين، ولا الإبداع ده له ناسه؟
فضلت لحد بعد ما اتخرجت من الجامعة عندي اعتقاد إني مش مبتكرة، لحد ما حضرت دورة اكتشفت فيها إن عندي قدرات إبداعية، وكانت مفاجأة سارّة جدًا بالنسبة لي! وبعدين في يوم اكتشفت إن ماما ما زالت محتفظة بأجندة عمرها حوالي 25 سنة، لإنها بتحتوي على قصتين ألفتهم وأنا عندي 6 سنين تقريبا..
ففي رأيي إن القدرة على الإبداع أصيلة جوة كل واحد فينا، كلنا عندنا قدرة على الإبداع لكن في مجالات مختلفة وبدرجات متفاوتة، فمثلاً حد مبدع في الطبيخ، وحد في الكتابة، وحد في الرسم، وحد في العلاقات الاجتماعية… إلخ.
والإبداع مش لازم يكون البدء من الصفر، ساعات بيكون إدخال تعديل بسيط على حاجة قائمة بالفعل كافي جدًا إذا كان التعديل ده فعلاً بيفرق. فالإبداع قيمة مضافة لأي شيء، بمعنى إنه بيضيف قيمة لأي حاجة بيدخل عليها لإنه بيخلي صاحبه مميز عن غيره، إلى جانب إنه بيدي انطباع عنه إنه مهتم، وبيفكر وعقله شغال ومش بيستسهل.
أفتكر من كذا سنة إن أحمد مكي كان عاوز يقول للناس إنه معندهوش حساب على Facebook، فقال لهم ده إزاي؟ مطلّعش تصريح صحفي مثلاً ولا طلع في برنامج تليفزيوني، لكن عمل أغنية اسمها “فيسبوكي” ومن ساعتها وأنا عمري ما أنسى إن أحمد مكي معندوش حساب على Facebook.
طيب الإبداع موجود جوة كل واحد فينا، وزيه زي أي مهارة، يا إما يُنمّى يا إما يتخنق.. تعالوا نحاول نكتشف قدراتنا الإبداعية وننميها.. وعمر الوقت أبدًا ما كان متأخر.. إزاي نعمل كده؟ الفيديو ده ممكن يلهمكم بشوية أفكار:
http://www.youtube.com/watch?v=-mlSrKo16D0
