القرنبيط واحد من أهم الخضراوات الشتوية، وهو من الحاجات اللي دايمًا مفيش عليها خلاف. يعني هنلاقي ناس بتحبه قوي أو مش بتاكله أبدًا.
النهارده هنقدم مجموعة وصفات جديدة ومبتكرة لمحبي القرنبيط.
ـ شوربة القرنبيط
المقادير:
قرنبيط وشوربة ومكعب مرقة دجاج، وملح وفلفل اسود، وكريمة طبخ وجبنة بارميزان مبشورة.
الطريقة:
هنسلق القرنبيط في الشوربة ومعاه مكعب المرقة، لحد ما القرنبيط يبقى طري تمامًا وبعدين نضربه في الخلاط لحد ما يبقى ناعم تمامًا، وبعدين نرجعه الحلة تاني ونضيف له الكريمة ونظبط التوابل.
نقدمه سخن ونرش على الوش الجبنة البارميزان.
ـ طاجن المكرونة بالقرنبيط
المقادير:
مكرونة كبيرة وقرنبيط ولحمة معصجة، وبيضتان وكوب كريمة، وملح وفلفل اسود وزبدة، وتشكيلة أجبان مبشورة (بارميزان ورومي وموتزاريلا وشيدر).
الطريقة:
هنسلق المكرونة ونسلق القرنبيط، وبعد ما نسلق القرنبيط نقطعه وردات صغيرة ونقلبه مع المكرونة واللحمة المتعصجة، ونجيب صينية أو طاجن بايركس وندهنه زبدة ونحط فيه خليط القرنبيط والمكرونة واللحمة المتعصجة. نقلّب البيض مع الكريمة في طبق جانبي ونتبلهم بالملح والفلفل ونضيفهم لطاجن المكرونة، ونغطي وش الطاجن بخليط الأجبان المبشورة وندخله الفرن لمدة نص ساعة.
ـ القرنبيط المطبوخ بصلصة الطماطم
المقادير:
قرنبيط وعصير طماطم وبصل، ومعلقة سمن وتوابل وكوبايتين شوربة.
الطريقة:
هنقطع البصل قطع صغيرة ونقلبه في معلقة السمن لحد ما يتحمر، ونضيف له عصير الطماطم ونتبله. نسيب الطماطم على النار لحد ما تتسبك وبعدين نضيف الشوربة والقرنبيط، ونسيبه على النار لحد ما يستوي والشوربة تقل خالص.
ـ طاجن القرنبيط بالبشاميل
المقادير:
قرنبيط وزبدة وملح وفلفل اسود، ولحمة متعصجة وصلصة باشميل، وجبنة شيدر مبشورة.
الطريقة:
هنقطع القرنبيط وردات ونقلّبه مع الزبدة على النار، لحد ما يبقى لونه دهبي، وبعدين نتبله بالملح والفلفل الاسود.
ندهن الطاجن بالزبدة ونحط معلقة باشميل في قعر الطاجن، وبعدين نضيف القرنبيط واللحمة المتعصجة ونغطي الطاجن بصلصة الباشميل، ونحط على الوش الجبنة الشيدر المبشورة، ويدخل الفرن لحد ما الوش يبقى دهبي.
