عمرك شفتي حد وخلاكي مندهشة ومبهورة؟ مثلاً شفتي بنت وحسيتي إنها أحلى أو أشيك أو أذكى، حسيتي إنك هتبقي مبسوطة أكتر لو بقيتي زيها، حسيتي إنها خاطفة الأنظار في قعدة إنتي كنتي تحبي تبقي ظاهرة فيها؟
أنا معرفش الروشتة اللي تخليكي أجمد واحدة في الدنيا، بس أعرف الروشتة اللي ممكن تخليكي راضية عن أدائك في الحياة، وعمومًا رضاكي عن أدائك مش هيكون موجود طول الوقت، وإلا مكانتش مارلين مونرو انتحرت، ولا كان براد بيت خان أنجلينا جولي.
أول خطوة يا فريدة إنك لازم تقري كتير، كل الحاجات التافهة اللي مبتحبيش تقريها هتفيدك أوقات، وكل الحاجات الصعبة عليكي هتقفي في يوم ما من حياتك وتحسي إنها كانت مش بالصعوبة دي، العالم مكان كبير أوي علينا، إحنا عايشين في بقعة صغيرة جدًا وظروفها صعبة، مفيش حاجة بتهون الحياة غير إنك تتفرجي ع الدنيا.
اقري وشوفي الناس التانيين عايشين إزاي، ده هيسهل حياتك في أوقات كتير، لما تقري رواية -الروايات أسهل حاجة ممكن تقريها- وتتفرجي على حياة حد تاني غيرك هتتعلمي، هيبقى عندك خبرات، ظروف حياتك مكانش فيها فرصة إنك تعيشي الخبرات دي، هيبقى عندك مخزون مبادئ هتنفعك في حياتك، هتتنفسي برة الشوارع اللي بتمشي فيها كل يوم، حتى أحلامك هتتغير. هتصدقيني لو قلتلك إني لما بنام أوقات بحلم بمدينة عمري ما عشت فيها، مبنية جوة دماغي وفيها بيوت وشوارع وأماكن حلوة أوي، أكيد خيالي هو اللي خلقها من الشوارع اللي مشيت فيها في الكتب والناس اللي عرفتهم ع الصفحات، من خلال الحروف الحبر الصغيرة.
تاني حاجة يا فريدة، إنتي لازم تعيشي، عارفة الشخص اللي لما بتشوفيه بتحسي إنك مبهورة ده بقى كده ليه؟ الشخص ده بقى كده علشان هو عاش حياته، جرب حاجات كتير، غالبًا الناس المبهرين دول بيكونوا من نوع البشر اللي مبيقولوش لا للتجارب، حتى لو كانت التجربة دي تتلخص في إنه يخرج مع صحابه في يوم أجازته الوحيد، رغم إنه كان عايز يرتاح من قرف الأسبوع، أكيد في الخروجة دي حصلت حاجة، ولو لقطة واحدة حسسته إنه كان هيفوته حاجة لو مكانش سمع كلام صحابه وخرج.
التجارب شيء مهم، التجارب بتصقل شخصيتك وبتخليكي فريدة فعلاً، إيه الممتع في حياة شبه باقي حيوات الناس التانيين، كده هنبقى نسخ مكررة من بعض، وحياتنا شبه بعض، تقدري تتنبئي إيه اللي هيحصل في العشر سنين اللي جايين طالما مفيش حاجة غير الروتين اليومي، صدقيني التجارب مش هتيجي تصحيكي من النوم، ولا عمرك هتصحي الصبح تلاقي ديناصور تحت سريرك، لو عايزة تشوفي ديناصور روحي سينما بتعرض فيلم عن العصر الجوراسي، أو حتى روحي سيميولتور وعيشي الجو، وصرخي لما الديناصور يقرب عليكي وهو فاتح بقّه علشان هياكلك.. عيشي، الحاجات دي موجودة في الدنيا عشان نجربها.
تالت حاجة يا فريدة إنك تشوفي أفلام، الجمال والسحر اللي في السينما هيغسل روحك، هينبهك لجمال من نوع تاني موجود في الحياة الواقعية، المخرجين الشاطرين هما اللي بياخدوا بالهم من التفاصيل، ممكن أوي تبتدي تحبي تفصيلة من اللي بتشوفيهم كل يوم بعد ما تاخدي بالك من جمالها في فيلم شوفتيه وعجبك. إنتي ممكن تغيري ستايل لبسك علشان شفتي حد بيلبس حلو في فيلم عجبك، ممكن تحبي الطبخ لو شفتي فيلم البطلة فيه حياتها اتغيرت بسبب برنامج طبخ، تتعلمي جملة جديدة هتخليكي مميزة أكتر.
اشتغلي يا فريدة، اعتمدي على نفسك وانزلي كل يوم، اتطحني في المواصلات ودوّبي في وشوش الناس؛ المتعة اللي هتحسي بيها وإنتي بتشتري أي حاجة من فلوسك هتلمع شخصيتك بطريقة إنتي مش متخيلاها، فكرة إنك تقدّري قيمة التعب وتكوني مستقلة ده هيخرجك تمامًا برة فئة الناس اللي متعودة ومتسستمة ودماغهم عليها نفس ملفات النظام مبتتغيرش.
أما بقى أهم حاجة لازم تعمليها، إنك تصدقي إنك فريدة زي ما إنتي، حبي نفسك جدًا ومتخليش حاجة توقفك، إنتي السر. من غير ما تكوني مصدقة ده مش هتعرفي تعملي كل الحاجات اللي قلنا عليها، إنتي زي ما ربنا خلقك مميزة ومدهشة، لو صدقتي إنك مدهشة كل حاجة تانية هتعرفي تعمليها، هتبقى أكسسوارات علشان تبقي أحلى، وعشان تبقي أحلى لازم تكوني في الأصل حلوة.
الدنيا فيها حاجات كتير أوي، وحياتنا قصيرة أوي، مستحيل نجرب كل حاجة إلا لو ركزنا كويس وتعبنا أوي.
علشان تبقي مختلفة ومبهرة لازم تتعبي، وعشان تبقي فريدة لازم متستسلميش لإغراءات العادي والطبيعي والمتعارف عليه. واوعي تفكري إن الروشتة دي مضمونة؛ حطي التاتش بتاعك، وافتكري دايمًا إن الرضا عن أدائك في الحياة وبذل المجهود ده مش لازم طول الوقت ينجح، وارد تتعبي ووارد تكوني مرهقة، وارد مجهودك أوقات تحسي إنه مش كافي. لما تحسي بكده افتكري دايمًا إن أنجلينا جولي اشترت لبراد بيت جزيرة على شكل قلب، وبرضو خانها.
واوعي تبطلي تندهشي.
