إلى سلمى صلاح، إلهة الجمال في مصر الحديثة.
امتى أول مرة حسيتي إنك جميلة؟ على ما تفكري في إجابة السؤال ده، خليني أحكيتجربتي عن إمتى حسيت إني جميلة. أنا عندي حساب على الفيسبوك من قبل 2009، بس عمري ما حطيت صورة شخصية ليّ عليه غير في 2011، بعد ما اتخطبت، ده مش لأي سبب غير إني كنت لأول مرة أحس إن أنا مش وحشة كده، وإن شخص ما على الكرة الأرضية شافني حلوة، ساعتها بس جاتلي الجرأة إني أحط صورتي الشخصية.
منين جالي الإحساس ده؟ من صغري كنت الطفلة السمرا التخينة أم مناخير كبيرة، لدرجة إن صديقة مرة قالت نكتة بايخة جدًا على مناخيري، والنكتة فضلت معلّقة معايا وعاملالي عقدة كبيرة في حياتي. بعدها بكام سنة كنت في الشارع وتقريبًا كان فيه ولدين بيعاكسوني، مسمعتهمش قالوا إيه، بس سمعتهم وهمّ بيقولو “ما تردي علينا مانتي مش حلوة أوي كده”، ساعتها قلت في نفسي أنا عارفة إن أنا مش حلوة، طيب عايز مني إيه!
فكرة إن أنا مش حلوة كانت مترسّخة جوايا بشكل كبير، كل حاجة حواليّ بتأكدها، ولا مرة دخلت في علاقة وولا مرة حد “طبيعي” قالي إنه بيحبني. بدأت أتعامل من المنطلق ده، وده كان مديني أمان كبير في أي كلام بتكلمه مع أي ولد، أنا واثقة إنه مش شايفني حلوة، وبالتالي مفيش حد فينا خطر على التاني.
لحد ما قابلت الولد اللي بقى جوزي دلوقتي، كانت أول مرة أحس إني جميلة، وكانت أول مرة شخص طبيعي يشوفني جميلة، وده بالتالي خلّاني أحس بكده. بعد الجواز رحت الجيم والبيسين في فترة البنات، ولأول مرة أشوف أجسام البنات التانية بنظرة مختلفة. كنت كل مرة بروح فيها البيسين بدّي أحكام زي اللي الناس بتديهاني، دي تخينة ودي رفيعة ودي بطنها كبيرة، بس في المرة دي شفت كل واحدة وثقتها في شكل جسمها مهما كان واعتزازها بيه، وده خلاني أفكر إن أنا كمان لازم أعتز بشكلي. من ساعتها جتلي الجرأة إني أروح البيسين بمايوه مكنتش أتخيل إني أقدر ألبسه في يوم، ومش بس كده، أنا كمان كنت مبسوطة إني لابساه وسعيدة بنفسي، من غير ما أفكر في حجم دراعي وطول المايوة ورأي الناس.
للدرجة دي حالتي كانت بائسة! وللدرجة دي –للأسف- كلام الناس علينا ونظرتهم لينا بيكونوا سبب ومحرّك رئيسي في نظرتنا لنفسنا. وأنا صغيرة حكولي عن بنت مش بتنزل من بيتها بنفس الطقم مرتين لو متعاكستش بيه أول مرة، أنا معرفش البنت دي، بس بشفق عليها جدًا لو كانت لسه عايشة بشخصيتها دي.
بعد ما حكيت حكايتي، افتكرتي أول مرة حسيتي فيها إنك جميلة؟ طيب إنتي بتحسي إنك جميلة دلوقتي؟ لو لسه بتعتمدي على رأي الناس فيكي ورؤيتهم لشكلك، يبقى إنتي محتاجة تغيري حاجات كتير، أولهم طريقة رؤيتك لنفسك، إنتي جميلة، خدي الكلمة دي كحقيقة مطلقة. كل بنت هي في الأصل جميلة، وجمالها بيزيد كل ما كانت روحها أحلى، مش لازم اللي حواليكي يشوفوا الجمال ده، بس غالبًا برضو مش هيقدروا يحسوا بيه غير لما إنتي شخصيًا تقتنعي بكده، صدقيني، ساعتها جمالك هيفرض نفسه ع اللي حواليكي.
