لو عاوزة تعيشي حياة سعيدة ويكون عندك سلام داخلي، احذري الـ11 حاجة دول لأنهم ممكن يسرقوا البهجة والسلام من حياتك، ويدمروها:
1- عدم احترام نفسك: عدم تقدير نفسك والتقليل من قيمتها بيعرضك للاستغلال من الآخرين، وبيدفعهم لانتهاك حقوقك، وده هيخليكي في الآخر تعيشي حياة مش حياتك، وشخصية غير اللي عاوزة تكونيها، هيخليكي بعيدة عن نفسك وكارهاها.
2- عدم احترام الآخرين: عن طريق السخرية منهم أو عدم تقبل اختلافهم عنك، عدم التماس العذر ليهم وتوقع إنهم لازم يقابلوا توقعاتك منهم طول الوقت، والتقليل من قدراتهم، والتسفيه من آرائهم.. كل دي صور لعدم احترام الآخرين، واللي هيدفعهم للابتعاد عنك وهيمنعك من تكوين أي علاقات عميقة وصحية.
3- لوم الماضي على وضعك الحالي: ماضينا بيؤثر على حاضرنا من غير شك، لكن مينفعش نفضل مسجونين فيه، تربيتنا صنعت شخصياتنا لكن طالما إننا أصبحنا راشدين أصبحنا مسؤولين عن نفسنا وعن تغيير اللي مش عاجبنا في أوضاعنا وشخصياتنا. لو عاوزة تتحركي لقدام بطلي تفكري إنك ضحية ماضيكي، وفكري في الخطوات اللي ممكن تدفعك للأمام، ولو لزم الأمر استعيني بحد متخصص ياخد بإيدك في سكة التعافي من آلام الماضي.
4- مش عايشة اللحظة: بتتمني لو كنتي في مكان تاني، بتعملي حاجة تانية، مع ناس تانيين، بتحنّي للماضي أو ناقمة عليه، خايفة من المستقبل. مفيش مشكلة في كل المشاعر دي. المهم إننا دايمًا نفكر إيه اللي ممكن نعمله هنا ودلوقت وفي إطار ظروفنا الحالية، عشان نتعامل مع مشاعرنا وننتقل لوضع أحسن. المهم إننا نخطط لمستقبلنا، نتعلم من ماصينا، ونركز على الحلو في حاضرنا واللي نقدر نعمله فيه.
5- الهروب من مشكلاتك ومخاوفك: بالشغل، بالنت، بالتسوق، بالعلاقات غير الصحية، بالمخدرات… إلخ. يمكن ده بيحققلنا راحة لحظية لكنه على المدى الطويل بيعقد المشاكل وبيكبر المخاوف جوانا، ومع الوقت بيزداد إحساسنا بالعجز وفقدان السيطرة على حياتنا.
6- أنا ومن بعدي الطوفان: الأنانية أو إنك تفكري في مصلحتك وبس، أو إن ميبقاش عندك ولاء وشكر للآخرين هيبوّظ جدًا صورتك قدام نفسك، وهيمتص شعورك بالأمان وهيطرد الناس من حواليكي.
7- الغضب والغِلّ: كلنا اتعرّضنا في حياتنا وبنتعرّض لإساءات، لو فضلنا شايلين من بعض أو ماسكين لبعض على الواحدة حياتنا هتبقى جحيم واحنا أول من هيتحرق بيها. اختاري معاركك صح، يعني فيه حاجات ممكن تتغاضي عنها وتعديها، فيه ناس تكبّري دماغك منهم أصلاً، فيه حاجات تاخدي فيها موقف، فيه حاجات خلاص حصلت وانتهت ومش هتقدري تغيريها فمحتاجة تتعافي منها عشان تقدري تسامحي.
8- محاولة السيطرة على كل شيء: الناس بيخذلونا أو بيكون لهم أولويات وترتيبات مختلفة عننا، والخطط بتبوظ، وتأتي رياح الحياة أحيانًا بما لا تشتهي سفن أحلامنا. لو متقبلناش ده هنعيش حياتنا بنحارب طواحين الهوا وهنتجنن، فعشان كده لازم نفتكر إننا مش محور الكون، وإن طبيعي خططنا تبوظ وتوقعاتنا تخيب أحيانًا عشان نحتفظ بصحتنا النفسية والعقلية.
9- إهمال العلاقات المهمة: الناس اللي بيحبوكي، وبيقبلوكي من غير شروط وفي أوقات ضعفك واحتياجك، وبيسندوكي.. دول كنز ونعمة كبيرة، والعلاقات اللي من النوعية دي تستحق منك كل وقت وجهد عشان تحميها وتنمّيها. الناس دول مش مضطرين يعملوا كده، والناس دول هم أكتر ناس يستحقوا اهتمامك وحبك، فاوعي تاخديهم كشيء مُسلّم بيه وتهمليهم.
10- الناس السلبيين: اللي بيستغلوكي نفسيًا أو ماديًا أو جنسيًا، بيحبطوكي، بيحاولوا يدمروا ثقتك قي نفسك.. ابعدي عنهم قدر المستطاع، لأنهم بيستنزفوا طاقتك وبيضيعوا حياتك.
11- المكوث بدائرة الراحة والأمان: إنك متعمليش حاجة جديدة أو مش متعودة عليها، مستسلمة لمخاوفك، خايفة تغلطي، وعاوزة كل حاحة تعمليها صح وعلى أكمل وجه.. الأسلوب ده هيخليكي تعيشي حياة فقيرة وضيقة. اتحدي خوفك، خاطري، اعملي حاجات جديدة، اغلطي واتعلمي، عيشي…
المصدر: أضعط هنا
