بقلم/ سارة خيري
في مجتمعاتنا العربية بنعرف معلومات قليلة جدًا عن الجنس، ودايمًا بتكون همسات وإيحاءات أكتر من كونها معلومات ممكن تفيد الأشخاص اللي مقبلين على علاقة جنسية لأول مرة، فما بالكم بمعلومات عن فوبيا الجنس أو الرهاب الجنسي!
شئنا أم أبينا، فالجنس ضرورة من ضرورات الحياة، مش بس لأنه سنة الكون والسبب الوحيد لامتداد السلالات، لكن لأنه ضرورة نفسية وعضوية وشهوة محببة زي الأكل والشرب. فيه ناس كتير بتعاني من الرهاب الجنسي، وده حرفيًا بيحول حياتهم وحياة شركائهم لجحيم.
كلنا بنخاف من أي حاجة منعرفهاش أو مجربنهاش قبل كده وده طبيعي، لكن الفوبيا موضوع أكبر من الخوف العادي، لأنه بيبقى خوف مرضي بيصعُب على المريض إنه يتعايش معاه.
طيب إيه هي فوبيا الجنس؟
– فوبيا الجنس (الإيروتوفوبيا) هو مفهوم عام بيوصف شعور الخوف والفزع من الجنس، والحقيقة إن المفهوم ده بيندرج تحته أنواع مختلفة من الفوبيا، من أول الخوف من الاتصال الجنسي والجماع لحد الخوف من مجرد التفكير في الجنس. وطبعًا هي زي أي فوبيا، بتختلف من شخص للتاني على حسب معتقداته، أفكاره، التربية والمجتمع اللي بيعيش فيه.
تعرفي على: فوبيا الخوف من المجهول ورأي علم النفس فيها
من أهم أنواع فوبيا الجنس:
– الخوف من الجنس الآخر
– الخوف من الجماع
– الخوف من انتقال الأمراض والفيروسات
– الخوف من التعرّي
– الخوف من التلامس أو ملامسة الشخص الآخر في العموم.
– الخوف من فكرة الحمل والولادة.
إيه هي أعراض فوبيا الجنس؟
الأعراض بتختلف من شخص لآخر، حسب طبيعته المرضية وحسب مستوى خوفه من الجنس، لكن في العموم بتكون في شكل زيادة ضربات القلب، نوبات هلع، الغثيان، والدوخة، وصعوبة في التنفس، وخفقان القلب، أوالتعرق ومحاولة للهروب من العلاقة الجنسية.
ليه ممكن حد يبقى عنده فوبيا الجنس؟
لأ خدي عندك أسباب كتيرة جدًا، على سبيل المثال لا الحصر:
1- التعرض للاعتداء الجنسي أو المرور بعلاقة جنسية عنيفة، أو التحرش الجنسي اللي ممكن يترك أثر سلبي لدى المصاب ويخليه يستعيد المشاعر السلبية اللي مر بيها في كل محاولة للاتصال الجنسي بعد كده.
2- الأعراف والتقاليد المجتمعية والدينية اللي ممكن جدًا تكون مغلوطة، زي ارتباط الجنس بالعار والفضيحة، أو إنه شيء غير أخلاقي وميصحش مناقشته أو الكلام عنه بالمرة، وده خطورته بتكمن في إنه بيترك الشخص لخياله، فيتخيل إن الجنس فعل كريه في حد ذاته، وممارسته ممكن تشكل خطر عليه.
3- كراهية شكل الجسم أو الشعور اللي ممكن يصيب بعض الناس وشعورهم بأن جسمهم غير متناسق بالشكل الكافي أو حتى قبيح. الإحساس ده ممكن يوصّل بعض الناس لفوبيا الجنس، لأنهم بيتخيلوا إنهم مش هيقدروا يستمتعوا في العلاقة أو يوفروا متعة لشريكهم، وبالتالي بيصابوا بأعراض الهروب من الجنس كليةً، عشان يتخلصوا من الشعور بالخزي.
4- الخوف من الألم كمان من أهم الأسباب اللي ممكن تسبب فوبيا الجنس.
إيه هو علاج فوبيا الجنس؟!
في البداية لازم نعرف هل الموضوع فعلاً فوبيا، ولا مجرد خوف من المجهول وممكن يتم التعامل معاه. الخوف المرضي أو الفوبيا بيكون مدمّر وتأثيره السلبي على حياة المريض بيوصله أحيانًا إنه ميدخلش في أي علاقة رومانسية من الأساس، عشان يتجنب أي فرصة لعلاقة جنسية محتملة. بل وممكن يؤدي إلى الاكتئاب واعتزال الناس.
د. جيهان التركي (دكتورة نفسية) قالت إنه إذا وصل الموضوع للشكل المرضي اللي ذكرناه ده يبقى ضروري من زيارة متخصص للعلاج، اللي ممكن يكون علاج نفسي أو دوائي أو توعوي، لأن أحيانًا كتيرة الخوف المرضي بيكون ناتج عن فقر في المعلومات الصحيحة أو مفاهيم مغلوطة زي ما ذكرنا قبل كده.
كمان قالت إن من الضروري جدًا مصارحة الشريك خلال فترة العلاج، والكلام عن كل الحاجات اللي ممكن تكون بتسبب القلق، والأفضل هو إنكم تتفقوا على قواعد معينة تتبعوها أثناء ممارسة العلاقة الجنسية تكون مريحة للطرفين.
تقدروا تشوفوا الفيديو من هنا
https://www.facebook.com/ahmad.aboulwafa/videos/10159659733475570/
في النهاية، مهم جدًا إن كلنا نعرف ونصدق إن الجنس ضرورة حياتية وغريزة أصيلة في الإنسان، وإنه مش مخجل ومش عار زي ما ممكن يتخيله بعض الناس. فلو إنتي سينجل، أرجوكي اقري كتير واسألي متخصصين دون خجل، واجمعي أكبر حصيلة معلومات صحيحة عن الجنس. أما إذا كنتي متزوجة وبتواجهي صعوبات في حياتك الجنسية فمفيش داعي للخجل لأنه مش هيحل أي مشكلة، الأفضل إنك تتكلمي مع شريكك عن مخاوفك ومشاكلك، ولو فيه ضرورة يُفضَّل زيارة مختص وخوض رحلة العلاج.
مصدر 1
مصدر 2
