هل خطر على بالك إنك تعرف إيه أسباب الإصابة بالاكتئاب الجسيم؟
أولًا مش أي حد ينفع يشخص نفسه إنه مصاب باكتئاب جسيم، لازم دكتور أو أخصائي نفسي اللي يشخصه.
ليه بعض الناس عندهم اكتئاب وبعضهم لأ؟
مبدئيًا وزي ما التريند بيقول “زهقنا نقول بديهيات“: الاكتئاب مش بُعد عن ربنا، ده له أسباب كتيرة، وهو مرض معقد جدًا، بلاش تواجهه بسطحية.
https://www.buzzfeed.com/adamdavis/you-dont-say?utm_term=.ctajPBvea#.rc0Lp0EoN
إيه أهم أسباب الإصابة بالاكتئاب؟
فيه حاجات ممكن ترفع احتمالية الإصابة بيه، زي التالي:
1- إساءة المعاملة:
زي التعرّض للضرب والإهانة وإنت صغير، أو التعرض للإهانة الجنسية أو النفسية في أي مرحلة من العمر، ده بيزوّد من مخاطر التعرض للاكتئاب السريري بعد كده في حياة الشخص.
2- أدوية معيّنة:
زي بعض الأدوية اللي بتعالج حبوب الشباب، أو الإنترفيرون المستخدم لعلاج الالتهاب الكبدي، أو غيرها، ممكن يصيبوك بالاكتئاب. بس ضروري جدًا نقرا نشرة الدوا الأول ونستشير الطبيب في إيه ممكن يتعمل لو لازم ناخدها.
3- الصراعات الشخصية:
لو حد عنده استعداد بيولوجي للإصابة بالاكتئاب، واتعرَّض لصراعات مستمرة، شخصية أو مع العائلة أو مع الأصدقاء، احتمال كبير يكتئب.
4- وفاة شخص عزيز:
ممكن الحزن والألم الشديد الناتج عن وفاة شخص عزيز يؤدي لاكتئاب بعد كده. لاحظ كمان إن العلماء بيساووا بين الوفاة وفقدان الشخص ده، سواء بالهجر أو النبذ أو قطع علاقته بيك. أيوة لو حبيبتك سابتك بلا سبب واضح ده تأثيره مشابه للوفاة.
5- الجينات:
لو فيه تاريخ عائلي للإصابة بالاكتئاب، ممكن ده يزوّد احتمالية إصابتك بيه. الجينات المسؤولة عن الإصابة كتيرة، مش جين واحد بس، وللأسف مش سهل التوصل إليها كلها ومنعها من التأثير. يمكن في المستقبل ده يحصل مع التقدم العلمي، مين عارف!
6- الأحداث الضخمة:
حتى لو كان حدث كويس، زي إنك تبتدي شغل جديد أو تتخرج أو يجيلك مولود جديد.. كل ده ممكن يؤدي للاكتئاب.. مش عشان إنت نِكدي ومبتعرفش تفرح، لأ، لأنها بتشكّل ضغط ولازم تتعامل معاه. تمامًا زي التقاعد أو الطلاق أو إنك تفقد عملك. ومع ذلك، فإن الاكتئاب الجسيم عمره ما كان رد فعل طبيعي على الأحداث الحياتية الضاغطة.
7- الأمراض الخطيرة:
في بعض الأحيان، تتزامن الإصابة بالاكتئاب مع الإصابة بمرض كبير تاني.
8- إساءة استخدام الأدوية:
ده مصطلح يعني إن فيه دوا عادي، قد يستخدم لعلاج شيء ما، لكن التلاعب في الجرعة ممكن يبقى مؤذي جدًا. تشير الدراسات إلى إن 30% من اللي بيسيئوا استخدام الأدوية بيجيلهم اكتئاب جسيم.
هو يعني إيه اكتئاب من ناحية البيولوجيا “عِلم الأحياء”؟
https://www.grandparents.com/food-and-leisure/did-you-know/your-creative-brain-shelley-carson
فيه باحثين لاحظوا وجود اختلافات في الدماغ، بين المصابين بالاكتئاب واللي مش مصابين. زي مثلاً إن عند المكتئبين، المنطقة المسمّاة بالحُصين “hippocampus”، وهي المنطقة المهمة جدًا لتخزين الذكريات، بتبقى أصغر عند المكتئبين، مقارنة باللي مش عندهم اكتئاب.
صغر حجم الحُصين معناه إن فيه مستقبلات أقل للسيروتونين.
إيه بقا السيروتونين ده؟ ده عبارة عن ناقل عصبي، وهو اللي بيخلي التواصل بين مناطق المخ ممكن، بما في ذلك التحكم في المشاعر والانفعالات.
بس العلماء مش عارفين لحد دلوقتي ليه الحُصين بيبقى أصغر عند المكتئبين، وإن كان بعض الباحثين لقوا إن الكورتيزول، اللي هو هرمون الضغط العصبي، بيزيد إفرازه عند المكتئبين، والعلماء بيعتقدوا إن له تأثير سام بيقلّص نمو منطقة الحُصين.
بغض النظر عن ده كله، مفيش منطقة واحدة في المخ مسؤولة عن الإصابة بالاكتئاب.
وبينما العلماء بيحاولوا يفهموا الموضوع أكتر، ويعرفوا إيه هي أسباب الاكتئاب، فإن الدكاترة النفسيين والأخصائيين لما يقعدوا مع المرضى، بيقدروا يفهموا منهم مشاعرهم أكتر، وبالتالي يقدروا يوصفوا خطط علاجية أفضل، تناسب ظروف كل واحد فيهم.
إزاي الجينات مرتبطة بخطر الإصابة بالاكتئاب؟
ممكن الاكتئاب يبقى في العيلة ومتوارث، وده بيقترح إن فيه جينات مسؤولة عنه، بتنشره بين الأجيال للعيلة الواحدة. ومع ذلك، مفيش جين واحد هو المسؤول عن الإصابة بيه، بل إن عدد من الجينات مسؤولة عن كده لما تتفاعل مع البيئة المحيطة بالبني آدم.
هل من الممكن لبعض الأدوية إنها تصيب الواحد بالاكتئاب؟
أيوة، عند بعض الناس. مثلًا، الأدوية المعتمدة على الباربيت يورات أو البنزو ديازبين أو الأدوية اللي بتعالج حبوب الشباب، بتبقى مرتبطة في بعض الأحيان بالاكتئاب، خصوصًا عند الكبار. وبالمثل، فإن الأدوية المعتمدة على الكورتيزون أو الكودين والمورفين أو مضادات الكولينيات -بتستخدم لتقليل تقلصات المعدة- ممكن تعمل في بعض الأحيان تغييرات حادة في المزاج.
إيه العلاقة بين الاكتئاب والأمراض المزمنة؟
عند بعض الناس، الأمراض المزمنة بتؤدي للإصابة بالاكتئاب.
إيه هو المرض المزمن؟
هو المرض اللي بيستمر لفترة طويلة من الزمن ومش بيخفّ تمامًا.
ومع ذلك، بعض هذه الأمراض يمكن التحكم فيها من خلال النظام الغذائي والتمرينات الرياضية وتغيير نمط الحياة -زي تغيير ساعات العمل مثلاً- والالتزام بالأدوية اللي بيوصفها الطبيب.
بعض هذه الأمراض ممكن يؤدي للاكتئاب، زي السكري أو أمراض القلب أو التهاب المفاصل أو أمراض الكلى أو الإيدز أو التصلّب المتعدد.
والأطباء شايفين إن معالجة الاكتئاب بتحسّن كتير من طريقة تعامل الشخص مع المرض المزمن، وتقبل جسمه للدواء المتعلق بيه.
هل الاكتئاب مرتبط بالألم المزمن؟
الحقيقة آه. لما الألم يستمر لأسابيع أو شهور، ده يبقى مزمن، وده مش بس بيوجعك، لأ ده كمان بيبهدل نظام نومك وقدرتك على ممارسة الرياضة وإنك تقضي مشاويرك، وبيأثر كمان بالسلب على علاقاتك باللي بتحبهم أو أصحاب الشغل، وبيقلل إنتاجيتك كتير.
شفت بقى إزاي المعاناة من ألم مزمن ممكن تؤدي للإحساس بالعزلة والاكتئاب؟
بس ده ممكن التحكم فيه، عن طريق الاشتراك في برنامج متكامل يتكوّن من: الدواء والعلاج النفسي والاشتراك في مجموعات الدعم ومخاطبة الأهل لمساعدتك، كل ده ممكن يحسّن من نوعية الحياة ويقلل من الاكتئاب. مش شرط يكون فيه برنامج موجود بالفعل، إنت ممكن تعمله بنفسك أو تخلي حد يظبطلك المواعيد وياخد بإيدك لحد ما تقدر تظبط الدنيا بنفسك.
هل الاكتئاب دايمًا بييجي مع الحِداد؟
https://i.pinimg.com/736x/62/af/93/62af937b1105aa46240113c4681b7032–expressive-art-art-therapy.jpg
إيه هو الحِداد أصلاً؟
ده رد فعل طبيعي ومنتشر لمواجهة فقدان الأحبة، سواء بالموت أو بالانفصال عنا. وممكن كمان نعاني منه لما نخسر وظيفة كويسة أو لما يموت الحيوان الأليف بتاعنا أو يتوه عننا. وممكن يحصل مع أي تغييرات حياتية قوية زي الطلاق أو التقاعد أو السجن أو الانتقال لبلد آخر إحنا مش حابّينه.
أي حد ممكن يدخل حالة حِداد، بس مش أي حد هيجيله اكتئاب بسببها. الفرق بين الاتنين إن الاكتئاب جواه عدد كبير من الأعراض، زي إنك تحس إن ملكش قيمة وتجيلك أفكار سلبية كتيرة بخصوص المستقبل، أو ممكن تفكر في الانتحار. بينما الحِداد بيجي معاه أحاسيس بالخواء والفقدان والحنين للشخص الغائب ده، لكن فيه مقدرة كويسة على الإحساس بالبهجة تاني. افتكر بس إن كل واحد له طريقة متفرّدة في التأقلم مع المشاعر دي.
في النهاية.. مش عيب الواحد يحس إنه مفيهوش طاقة وحزين جدًا ومش قادر يقوم بشغله. العيب إنه يسيب نفسه كده وميطلبش المساعدة، تحت أي مسمى زي “أنا هقدر أساعد نفسي” أو “كل شيء تحت السيطرة” أو “طلب المساعدة للضعفاء بس” أو غيرها من المسميات اللي مش صحيحة إطلاقًا، وبتؤثر سلبًا على المحيطين بيه وحبايبه وأولاده وشغله.
https://www.webmd.com/depression/guide/causes-depression#1
