أسماك الزينة من أكتر الحاجات المبهجة والمريحة للأعصاب في أي بيت، وبتعتبر من الكائنات الأليفة اللي ممكن نربيها ونعتني بيها في البيت بدون مجهود أو صعوبة، خصوصًا في أكلها ونضافتها.
قرار إنك تربّي أسماك زينة في بيتك لو بتفكري تشجعي أطفالك على ممارسة نشاط يضيف ليهم بشكل إيجابى خلال فترة الأجازة هيبقى قرار محبب جدًا ليهم، وأكتر حاجة هيحبوا إنهم يشاركوا فيها هي مشاوير شراء الحوض والأسماك ومتعة الاختيار بين أنواعها الكتيرة وألوانها الرائعة، لحد ما نوصل للعناية بالأسماك نفسها والحرص على مواعيد أكلها، وكمان نضافة بيتها الصغير الزجاجي.
أول حاجة هتعمليها لو استقريتي على اقتناء حيوان أو كائن أليف إنك تطرحي عليهم كل الخيارات المناسبة ليكي وليهم وللبيت، وادّيهم حرية التفكير في أكتر حيوان بيحبوه، أهم حاجة إنك توضحيلهم عيوب ومميزات اختياراتك واختياراتهم.
لو وقع اختياركم سوا على أسماك الزينة أول الحاجات اللي هتفكري معاهم فيها هي:
مكان مناسب نحط فيه حوض السمك، وأهم شروطه إنه ميكونش معرّض لتيارات هواء ويكون بعيد عن إضاءة الشمس المباشرة، وأهم حاجة إنه يكون مكان مستقر وله سطح مستوى عشان يكون بعيد عن الصدمات أو الوقوع، ويفضّل إنه يكون قريب من مصدر للمياه عشان يكون سهل عليهم إنهم يساعدوكي تملي الحوض في أي وقت في حالة نقص المياه فيه.
هتشرحيلهم إن أسماك الزينة زيها زي أي حيوان أليف محتاجة اعتناء وحرص على مواعيد أكلها ونضافة الحوض بتاعها، وإن الأكل بيكون بمقدار معين لا ينفع نزود ولا نقلل منه، وإنه ممنوع إننا نرمي أي حاجة في حوض المياه.
لما يختاروا الأسماك بتاعتهم شجعيهم يفكروا في أسامي ليها ويحاولوا يعملوا معاهم رابط مميز، وده بإنك تشرحيلهم إن السمك بياخد على شكل أصحاب البيت بالتعوّد، وإنهم أول ما بيشوفوا حد مقرّب من الحوض بيجروا عليه كلهم في سرب جميل جدًا.
كمان أحيانًا بيطلعوا بجزء من رأسهم برة المياه، ساعتها ممكن تشجعيهم إنهم يلسموا رأس السمك اللي ظاهر.. بس أهم حاجة أكدي عليهم إن إيديهم تكون نضيفة عشان ميجيش أي تلوث للمياه وبالتالي السمك يمرض.
وأهم حاجة عرفيهم إن أسماك الزينة عمرها قليل، وبتموت بسرعة مقارنة بأي حيوان أو كائن أليف.. شجعيهم إنهم يراقبوا السمك باستمرار عشان لو لاحظوا أي فطريات أو بقع بيضا على جسم السمك أو إن حركة السمك بقت بطيئة وتقيلة أو حصل انتفاخ في بطنها.. وإنهم يراقبوا كمان مدى نقاء المياه ودرجة حرارتها أو لو اتكونت طحالب على الزجاج.
بعد كده هتيجى خطوة إنكم تنزلوا تشتروا سمك الزينة، وهتلاقيه عند أغلب محلات بيع الحيوانات والأسماك المشهورة، وكمان فيه محلات لبيع أسماك الزينة في سوق الجمعة.
أسعار أسماك الزينة بتعتمد بشكل أساسي على حجم ونوع السمكة، بس أشهر أنواع سمك الزينة زي “الجولد فيش” و”الأنجل” و”الجوبي” كلها بتتراوح من 5 إلى 30 جنيه بشكل عام.
وأكتر سمكة زينة بيقع الاختيار عليها هي “الجولد فيش” وهي سمكة لطيفة جدًا واجتماعية ولونها ذهبي ميال للبرتقالي وهتفكر أطفالك بـ”نيمو” جدًا.
لما تيجوا تشتروا حوض السمك سوا شوفي همّ هيكونوا عايزينه كبير على شكل مستطيل أو مربع ولا صغير على شكل بولة مدورة، في حالة اختيارهم للبولة الصغيرة مش لازم الاكتفاء بسمكة واحدة بس في الحوض، من الأفضل يكون من سمكتين لتلاتة، لأن حتى السمك بيحب الصحبة، ويفضّل يكون السمك من نوع واحد.
أما في حالة إن وقع اختياركم على الحوض الكبير يبقى ساعتها لازم تحرصوا إن أنواع السمك تكون ملائمة لبعضها، لأن فيه أسماك بتكون شرسة وممكن تاكل الأسماك التانية، وكمان لازم تهتموا إن يكون فيه نباتات طبيعية في الحوض لأنها مهمة جدًا في خلق حياة طبيعية مائية داخل الحوض، وبتدي منظر جمالي هيديكم إحساس إنكم بتشوفوا حتة من البحر.
لما ييجي وقت تنضيف الحوض شجّعي أطفالك إنهم يساعدوكي في العملية دي، وده هيخليهم يرتبطوا أكتر بالأسماك ويحسوا إنهم مهتمين بكائناتهم الأليفة الصغيرة وإنها معتمدة عليهم.
إذا كانت الأسماك كتير يفضل تغيير الماء كل شهر أو شهر ونصف، وإذا كانت الأسماك صغيرة أو قليلة فيكون كل شهرين أو شهرين ونصف.
سيبي أطفالك يخرّجوا الأسماك بالراحة من الحوض بالشبكة ويحطوهم في طبق نضيف كبير مليان مياه وبعد كده يفضّوا الحوض من المياه، وحتى لو وقعوا مياه في الأرض والدنيا اتبهدلت، إنتو سوا هتنضفوا بعدين.
خليهم يغسلوا الحوض بنفسهم بمياه نضيفة وملح ويدعكوا الزجاج بإسفنجة ناعمة، وبلاش صابون عشان هيضر بالسمك لو متغسلش من على الزجاج كويس.
كل الأحجار والحصى اللي بتكون في قاع الحوض أو الألعاب أو الصدف خليهم يدعكوهم بالملح الخشن، وده في حد ذاته هيخلق جو مرح جدًا.
ساعديهم يرجّعوا السمك للمياه تاني بالشبكة المخصصة، بعد ما ترجعوا الحوض مكانه وتملوه بالمياه وتركبوا الفلتر وتظبطوا درجة الحرارة.
وفي الآخر لما سمكة تموت خليهم برضو هما اللي يشيلوها من الحوض ويتخلصوا منها، إما إنهم يدفنوها في أقرب جنينة ليكم أو تتخلصوا منها في قاع التواليت، وسيبيهم يحزنوا على أسماكهم ويفتكروا وقتهم الحلو معاه.. وفرحيهم بعد كده بأسماك جديدة يخلقوا معاها رابط جديد وتقعدوا سوا تبصوا عليهم في جو عائلي دافي، ويقعدوا يتأملوا الكائنات الصغيرة وهي بتعوم بهدوء وانسيابية، ويفكروا إزاي بيتنفسوا تحت المياه
