أنا عزة.. ربعنت امبارح.
ده التصنيف اللي أنا محطوطة فيه حاليًا.
بكلمك من بين أكوام الحفاضات وكريم الزنك والبيبي أويل، ومن وسط الصريخ والغازات ومواعيد الدكاترة. أنا بختم 2015 وأنا ماما.. لأول مرة.
خدت بنج صحيت لقيت كائن حي جنبي، الناس باركت وصوّرت ومشيوا وسابوني لوحدي معاه، ومن ساعتها وهو لازق فيّ.
للأسف الولادة زي أي قرار مصيري، محدش بيحكيلنا عنها على حقيقتها، ومهما سمعنا من نصايح وقرينا معلومات فالواقع حاجة تانية مبتعرفش توصفها الكتب، فحبيت أخطف ساعة والنونة نايمة، ودي حالة نادرة قلت أستغلها وأعرّفك شوية معلومات.
معلومات يمكن تكون بالنسبة ليكي سلبية أو إيجابية، المهم ضروري تكوني عارفاها وإنتي بتاخدي قرار الولادة، عشان الناس مبتفتكرش تحكيهالك قبل ما تقولك ما تفرحينا بحتة عيل.
1- الولادة متعبة. أسهل ولادة سمعنا عنها برضو كانت متعبة، سواء طبيعي أو قيصري متعبة، بس المسؤوليات اللي بتبقى وراكي بعد كده بتخليكي متفكريش، والفرح اللي بيبتدي يدخل قلبك على استحياء ويتسرسب جواكي واحدة واحدة بينسيكي التعب برضو واحدة واحدة، وأظن ده اللي بيخلي الستات تتجنن وتكررها تاني.
2- الأيام الأولى من الولادة بتكون مرهقة ومستنزِفة والحركة صعبة، وعشان كده من رحمة ربنا البيبي بينام ف الأسبوع الأول فترات طويلة أوي وأقل رضعة بتشبّعه، وبيسيبلك باقي الوقت تتعافي فيه من مجهود الولادة.
3- إنتي كأم مثقفة هتسلّي نفسك بالاطّلاع والقراءة أثناء الحمل، وتتابعي فيديوهات ومقالات عن التربية.. احترسي لأن جزء كبير م الكلام ده كلام فاضي.. كمان نصايح تنظيم النوم وتنظيم الرضعات لازم تاخديها بمرونة ومينفعش تطبق بشكل صارم لأنها ممكن توصل لخلق أزمة ثقة بينك وبين طفلك.
4- أوقات كتير ابنك يكون بيصرخ لسبب مجهول، أخد دوا المغص مفيش سخونية مفيش إسهال مفيش إمساك مغيّر الحفاضة مستحمي سمع حدوتة سمع أغنية مش بردان مش حران مش جعان مش شبعان مش رمضان.. تكتشفي في الآخر مثلاً إنك منيماه على ضهره وهو كان عاوز ينام على جنبه.. ف الحالات دي عليكي تشغلي خيالك شوية وتبتكري.
5- البيبي ممكن يزن ومش راضي ينام وعايز يتشال، وإنتي بتعيطي ونفسك تنيميه ويصعب عليكي نفسك وإنتي بتقوليله والنبي نام، وتبقي عايزاه يفضل نايم لبكرة.. بتخلصي اللي وراكي ويعدي الوقت تلاقيه واحشك وتتلككي عشان تصحيه.. يصحى يبتدي يزن تعيطي وتتحايلي عليه ينام… وهكذا، كل يوم بقى ع الحال ده ومبتتعلميش.
6- بعد ما تفوقي م الربكة وحالة الهلع والخوف اللي بتعقب الولادة، تقدري تهدي وتبتدي تثقي ف إحساسك بطفلك، هتوصلي إنك هتلاقي ابنك بيصرخ بس إنتي متطمنة عشان عارفة إن كل الموضوع حبة غازات تاعبة بطنه. وممكن ف مرة تصحي ف نص الليل من غير سبب تجسّيه عشان عارفة إنك هتلاقيه سخن.. ثقي ف إحساسك لأنك دايمًا صح.
7- فيه حاجات كنا فاكرينها صعبة وعاوزين دكتور يعلمهالنا وأما نجرب بنعملها ببساطة، زي حموم البيبي، مش معضلة خالص حتى لو بتحميه ف الحوض.. وحاجات العكس، بتشوفيها طول الوقت وتظني إنها سهلة وتطلع معقدة، زي اختيار الحفاضة. كل الحفاضات في السوق المصري وحشة.. كل الحفاضات، يا إما بتسرب، يا إما بتسبب التهابات، يا إما مبتتشربش كفاية، يا إما مش متوافر منها مقاسات صغيرة.. إنتي مع الوقت هتحددي الأولوية وتتكيفي مع العيوب.. يعني ممكن مثلاً تقبلي اللي مبتتشربش وتغيري للنونو كل شوية وتعيشي أغلب يومك مع البيبي عادي مقابل إنك تحمي طفلك م الالتهابات.
8- إحساس الذنب لسبب وبدون سبب مش هيفارقك وهياكل ف مخك من جوة زي السوس، وغالبًا هتلاقي نفسك عشان تعرفي تواصلي بتتجاهلي الإحساس ده مش بتعالجيه، لأن معظم اللي حواليكي بيقولولك إن فعلاً إنتي السبب ف أي ضرر للطفل. هيقولوا ده بطريقة مباشرة أو غير مباشرة.. بقصد أو بدون. إنتي مش هتبطلي تجهدي نفسك عشان ابنك، والعيال مش هتبطل تتعب، والناس مش هتبطل تِفتي وتشيّلك مسؤولية أي ناموسة قرصته.. وإنتي مش هتبطلي تحسي بالذنب.
9- الرضاعة بتربطك بابنك زي ما بتربطه هو بيكي، لو قعدتي فترة طويلة من غير ما ترضعيه بيوحشك، وممكن صدرك يبتدي يتقل ويوجعك، الإحساس ده جداتنا كانوا بيقولوا عليه “الصدر بيحن”، لكن الرضاعة وظيفة مش سهلة ومتطلباتها كتير، تنظيم المواعيد صعب جدًا، أنا أهو ربعنت ولسه مش عارفة أنظّم مواعيد الرضاعة. كمان مسؤولية إنك لازم طول الوقت واكلة كويس وأكل صحي ومُدِرّ للبن وخالي من البهارات ومسببات الانتفاخ والكافيين و… و… و… كمان محتاجة لبس يساعد على الرضاعة سواء في البيت أو برة البيت، وغالبًا مفيش لبس بيدفي ويكون سهل مع الرضاعة. لكن تظل هي الرابط الأقوى بينك وبين طفلك.
10- جزء كبير من الأمومة شبه صور الإعلانات، مشاعر جميلة ونادرة وميعرفهاش إلا اللي جربها، لكن الصور مبتبينش إنها بتتكرر بشكل ممل ورتيب وأليم ف أوقات مش مناسبة للفرح وبلا طاقة لاستقبال المبهجات.
11- جسمك هيتعبك ولازم تهتمي بصحتك أثناء الحمل والرضاعة، لأنك معظم الوقت شايلة حِمْل على دراعك، ولو بتنامي جنب البيبي بتنامي ف أوضاع خاطئة عشان متئذيهوش، بتتعِب الضهر والكتف، كمان قعدة الرضاعة طويلة ومرهِقة وصعب تلتزمي بقعدة صحيحة ف كل مرة، فلو مبنيتيش جسم قوي يتحمل الكلام ده هتفيّصي ف أول شهر.
12- جسمك هيحصل فيه تغييرات كتير وهيبقى غريب عليكي، مش بس الوزن، كمان لون جسمك بيتغير وريحته بتتغير، وعشان ترجعي تهتمي بنفسك وتظهري بالمظهر اللي يرضيكي حِبي شكلك وجسمك مهما كان، واعرفي إن جسمك معجزة، ربّى جواه نطفة وكبّرها وصَلَب عظامها واتشق وخرّج بني آدم، وكل ذرة أكل بياخدها بيحولها لبن ويشبّع الطفل ده.. جسمك معجزة ربانية، حبيه عشان أما تهتمي بيه يتجاوب معاكي.
13- هتفكري ف المستقبل وتخططي للي جاي.. بس بأفورة شوية، هتفكري إزاي تختاري مدرسة ابنك، وهتفكري ف البطولات الرياضية اللي هتفيده، وبعد شوية هتفكري ف الكاريير بتاعه والشركات الأجنبية اللي يقدر يشتغل فيها لو عمل كذا وكذا، وهتفكري إزاي توفريله فرص سفر كويسة.. عادي احلمي.. مين عارف!
14- علاقتك بجوزك هيتحول جزء كبير منها حوالين البيبي، بتلعبوا معاه، بتكتشفوه، بتحكوا عنه، بتتفسحوا ف أماكن مناسبة لوجوده، بتخصصوا ميزانية له.. ده له متعته، بس لو بتنفذوه بتقبّل وإيمان بجدواه، فلو كنتي مبسوطة ف حياتك ده بيدوّقك متعة جديدة، ولو كنتي غير سعيدة فده يمكن يبتدي يقوّي الروابط بينك وبين جوزك.
15- هتعيطي.. هتعيطي كتير، وهتتعصبي.. كتير، وده كويس، خصوصًا لو حواليكي ناس بتتحملك، لأن بيحصل شِبه اكتئاب بسبب خلل الهرمونات وبسبب التعب المتكرر والخوف من المسؤولية، العياط هيفرّغ جزء كبير م الكلام ده ويساعدك تواصلي.
وف الآخر أحب أقولك الأمومة مش سهلة.. بس لسه مش عارفة إذا كانت مستاهلة.
بس الأكيد إني مهما كنت مترددة ف القرار ومهما عطّلني عن حاجات ومهما حسيت إن الموضوع مستحيل معاه الراحة.. لو الزمن يرجع وخدت فرصة الاختيار من جديد.. برضو هختار بنتي.
لو كنتي أم لأول مرة
