في إحدى مغامراتي الفيسبوكية عملت حساب وهمي على فيسبوك ودخلت جروب اعترافات رجالي؛ حبيت أعرف إيه نوعية المشاكل الزوجية اللي ممكن الرجال يتشاركوها سوا.
أغرب ملاحظة إن محدش بيعرض أي مشكلة باسمه، كل المشكلات بتتبعت رسالة على الصفحة والأدمن يعرضها.
لكن أكتر ما لفت نظري مشاكل الأزواج الجُدد. شفت فيها إن معظم شكاوى الرجالة وهمية، حلها بيكون في معلومة، الزوجة مكسوفة تقولها أو ممكن تكون الزوجة كمان جاهلة بالمعلومة.
وبما إني انكشفت وانطردت من الجروب في نفس اليوم، وملحقتش أحِل ولا مشكلة، فقلت أعرض بعض المشاعر والأفكار الخاصة بالنساء، أو على الأقل معظم النساء، اللي ممكن تفيد كل راجل يطلع عليها قبل الإقرار بإن علاقته الحميمة فاشلة، أو إن شريكته محتاجة علاج.
– كل ما أقربلها تتوجع
جسم المرأة بقاله 20 سنة على أقل أقل تقدير معتاد على حركات محدودة، فجأة مطلوب منها تبقى راقصة باليه تؤدي حركات بهلوانية بمرونة فائقة مع ابتسامة عريضة وسعادة حقيقية، كل ده مع غشاء بكارة لم يُفض معظمه، محاطة بهالة من الخجل والهلع والخرافات المترسخة.
بالضرورة الجسم بيتشد ويرفض، والأعصاب بتنقبض وكل حاجة تنكمش على نفسها. لو مفيش رغي وهزار ثم مداعبة جنسية، مع راحة نفسية وبساطة في استقبال الإحساس ده، هيفضل التوتر هو السائد.
تعرفي على: المزلق الحميمي: ما فوائد المزلق وأضراره وطريقة استخدامه
– البريودوما أدراك ما البريود!
عارف إنت فيه كام علاقة حول العالم انتهت في يومين البريود؟ رغم إن بعد يوم أو يوم ونص من بدء البريود ولما وجعها بيقل الرغبة الجنسية بتعلى عند النساء، لكن التوتر ولخبطة الهرمونات اللي بيسبقوها بيبوظوا حاجات كتير.. خليك داعم في الفترة دي. إشباع الاحتياج النفسي للمرأة والاحتواء هيسهل تعبيرها عن رغبتها وتفاعلها الجنسي معاك، وحاول تحفظ معاد البريود عشان ده أهم ما تفتكر عيد جوازكم.
– الوصم والتحرش وكل القضايا القومية
العقل طول عمره متغذي إن الأفعال دي غلط وعيب.. البنت المؤدبة متعملش كده. لحد ما بتترسخ الحقيقة دي في العقل الباطن وترتبط المتعة بقلة الحياء بغض النظر عن السياق.
ستات كتير في شهورهم الأولى من الجواز بيبكوا بعد شعورهم بالنشوة، أو بينفصلوا عن الشريك أثناء العلاقة وجسمهم بيرفض الاستمرار.
كمان انتشار التحرش والتحرش اللفظي جعل الجنس مرتبط في ذهن النساء بالانتهاك، وده بيخلي الغزل بالتلامس والـsex talk مرتبط دايمًا بالانتهاك والغصب.
ده بياخد وقته وينتهي مع التكرار ورسم صورة مغايرة في العقل الباطن بعيدة عن الانتهاك والتعدي، وربط الغزل بالحب.. يعني الموضوع شوية وقت وحبة تلميحات بإني بعاكسك بس عشان إنتي حلوة وتتحبي.
– أنا مالي ومال الحمل والرضاعة؟!
الحمل بالذات في الأشهر الأولى اللي هي شهور الوحم بيسبب زهد ونفور من أي تلامس وأي روايح نفاذة، يعني ريحة اسبراي العرق اللي كانت بتحبه عليك ممكن جدًا تسببلها نفور، ده غير حالة العصبية المستمرة. وبما إن غالبًا أول شهر ويمكن أكتر الأم مبتكونش على علم بالحمل فهي نفسها مش بتقدر تفهم المشكلة فين.
كمان الرضاعة بتقلل هرمون الاستروجين وقد توقف عملية الإباضة، وده بيسبب ضعف الرغبة الجنسية وبيتطلب مداعبة أكتر وقت العلاقة، وبيتطلب كمان حياة عاطفية أثرى عمومًا.
مصدر: بيبي سنتر آربيا
https://arabia.babycenter.com/x25003207/%D9%87%D9%84-%D8%B3%D8%AA%D8%A4%D8%AB%D8%B1-%D8%A7%D9%84%D8%B1%D8%B6%D8%A7%D8%B9%D8%A9-%D8%A7%D9%84%D8%B7%D8%A8%D9%8A%D8%B9%D9%8A%D8%A9-%D8%B9%D9%84%D9%89-%D8%B1%D8%BA%D8%A8%D8%AA%D9%8A-%D9%81%D9%8A-%D8%A7%D9%84%D8%AC%D9%85%D8%A7%D8%B9
– اتعلمت البوس فين؟!
في مجتمع شرقي متشكك دايمًا، الستات كتير بتخاف يتاخد عنها صورة سيئة، وأحيانًا بتصطنع الجهل عشان جوزها يحترمها.
أوقات بنسمع سؤال مفروض إنه مزحة “اتعلمتي البوس فين؟” بس الحقيقة إن البوس مبيتعلمش، أول بوسة زي عاشر بوسة، اللي تحب تقرب من شريكها هتقدر تمنحه قبلة من القلب كاملة الإحساس.
“بإمكان المرأة أن تمنحك قبلتها الأولى فتشعر أنك لم تُقبَّل من قبل”.. مثل فرنسي أنا اللي مألفاه.
– وسائل منع الحمل
لما بتكون الزوجة مقررة تأجيل الحمل، فكل تلامس بيسبب هاجس إن الحمل حصل، حتى لو أخدت كل الاحتياطات بيكون فيه نسبة خطأ، وكل ست معتقدة إن هي الواحد في المية اللي هتحمل بالواقي الذكري، وده بيسبب تشتت أثناء العلاقة وانفصال سريع عن الحالة. ده غير كمان الوسائل اللي بتأثر على الهرمونات واللي بتزود الوزن إلى آخر كل المنغصات اللي بتخلي المرأة في ضغط عصبي طول الوقت.
الأفضل في الحالة دي المتابعة المستمرة مع طبيب وتنظيم مواعيد الدورة الشهرية عشان تكون دايمًا مطمئنة إن الحمل محصلش.
– أصلها متختنة
بما إن التجارب أثبتت إن الختان مش مرتبط بالرغبة الجنسية، لكن بيظل مسبب حاجز نفسي جوة البنات وكمان جوة شركائهم إنه هيقلل الإحساس، وده بيخليهم ميبحثوش عن طرق السعادة اللي تناسبهم والاستسلام إن الختان أفسد حياتهم خلاص.
بس الحقيقة إن الرغبة بتبدأ من المخ مش من أي منطقة حساسة، أما الوصول للنشوة بيختلف من ست لأخرى في طريقته ومدته وكل تفاصيله، يعني أي ست هتدخل علاقة لازم تجرب طرق كتير عشان تستكشف جسمها هي وشريكها.
مصدر: كل يوم معلومة طبية
https://www.dailymedicalinfo.com/view-article/%D8%AE%D8%AA%D8%A7%D9%86-%D8%A7%D9%84%D8%A5%D9%86%D8%A7%D8%AB-%D9%88%D8%A7%D9%84%D8%B5%D8%AD%D8%A9-%D8%A7%D9%84%D8%AC%D9%86%D8%B3%D9%8A%D8%A9-%D9%84%D9%84%D8%A3%D9%86%D8%AB%D9%89-%D9%87%D9%84/
– هي ليه تايهة؟!
فاكر إن كده خلاص؟ لأ.. ده فيه كتير من الاستطلاعات بتتكلم عن هواجس العلاقة اللي بتشتت الستات وتقلل من تفاعلهم، منها مثلاً إنها خايفة تخرج ريح، إن ضغط الرحم أثناء العلاقة بيحسسها باحتياجها للتبول، إن الحركة الكتير تخليها تعرق فتكون مقززة، إن جسمها مش زي الموديلز وسكسي… قايمة طويلة من الهواجس غير المبررة واللي مفيش حاجة بتعالجها غير الثقة بالنفس اللي بتحصل مع تكرار التجربة وتأكيدها.
– إيه علاقة خناقة السوبر ماركت بالسرير؟!
“النفس قبل الجسد”.. خلي الجملة دي قدامك إذا كانت شريكتك عاطفية زي غالبية النساء، لأن الشخصية دي معظم مشاكلها الجنسية نفسية مش جسدية، يعني الألم من العلاقة ممكن يكون فطريات لكن ممكن برضو يكون شعور بعدم التقدير.. زي ما ضعف الرغبة ممكن يكون لخبطة هرمونات ممكن يكون خصام وزعل.. وطبعًا عدم المبادرة ممكن تكون بسبب قرب البريود لكن الأغلب إنها غضب.
الشخصية العاطفية اللي بتتمتع بيها أغلب الستات، مدخلها دايمًا الحب والتراضي.. الحب الصادق يوصل لجنس ممتع، مش العكس.
– إشمعنى أنا اللي بيحصلي كده؟!
الرجال أما بتقعد تحكي عن علاقاتها الجنسية بتحكي البطولات وبس، مفيش راجل بيحكي لصاحبه مشاكله الجنسية تصورًا منه إن ده عيب فيه وفي رجولته، فأصبح كل راجل بيواجه مشكلة بيتخيل إن هو الوحيد، بالتالي بيعتبرها تهمة ويدور إزاي يرميها على شماعة غيره، وطبعًا أقرب شماعة هي شريكته.. أصلها باردة، أصلها مُختنة، أصلها مش عاجبها حاجة.. والحقيقة إن دي مشاكل أغلب الناس بتواجهها في بدايات تجربتها الجنسية، لكن لا الرجالة قالوا لبعض، ولا الستات قالوا للرجالة.
الجنس عند الستات -في الأغلب- هو امتداد للحب، وطبيعي في الشهور الأولى من الزواج الحب موصلش لذروته، فالعادي إن العلاقة تكون لسة في بداياتها، ولسة في مرحلة الاستكشاف والاختبار، وعلى عكس تصورات الرجال، شهر العسل مش أعظم فترة ولا حاجة.. أعظم فترة هي اللي هيترفع فيها الخجل تمامًا وكل طرف في العلاقة هيقدر يعبر عن نفسه وهيفهم وسائل إسعاد الطرف الآخر.. بالتأكيد ده مش هيحصل من ليلة الدخلة.. فالصبر مفتاح الفرج يعني.
مغامرة في جروب اعترافات الرجالة
