بقلم/ أحمد فراج
سوبر مان شخصية كوميكس اتحولت لفيلم سينمائي، عنده قدرة على الطيران، وبيطلع ليزر من عينيه وقوي جدًا، بس اللي الناس مش فاهمينه هو ليه بيلبس البوكسر فوق الهدوم، وكتير مننا واخدها عيب في هذه الشخصية وبيتريقوا عليه، مع إنه مليء بالمميزات، نسيوها ومسكوا في البوكسر الأحمر اللي فوق الهدوم!
الإنسان البشري العادي جدًا، لا يستطيع الطيران، مبيطلعش ليزر من عينيه وبتتفاوت القوة من شخص لشخص، بس فيه ناس ليهم مميزات كتير، يمكن تكون أكتر من مميزات سوبر مان وعيوب برضو، ممكن تكون إنت سوبر مان في نظر غيرك لما تبقى إنت الإنسان الوحيد اللي عنده القدرة إنه يضحك صحابه وهما في عز زعلهم. تبقى سوبر مان لما تبقي إنت الإنسان الوحيد اللي يُعتمَد عليه في أي مشكلة أو طلب، تبقى سوبر مان لما الدنيا تضيق بحد وتكون إنت أول شخص يحتاجه أو يفكر يلجأله، تبقى سوبر مان لما تبقى أي حاجة تانية حلوة في نظر غيرك.
مش مهم بقى لو حد شايفك لابس البوكسر فوق الهدوم ولا حتى لابسه فوق دماغك، مش هي دي المشكلة، لأن مفيش أي إنسان كامل، كلنا خطائين وبنغلط ولينا عيوب ومميزات، بس للأسف النقطة السودا اللي في الثوب الأبيض هي اللي بتبان وهي دي اللي بيعلقوا عليها الناس.
الفكرة هي إنك تصلح العيب اللي جواك، ولو العيب ده أصلاً مش موجود أو مجرد شماعة بيعلقهالك غيرك عشان مش حابب يشوفك أحسن منه، يبقى سيبك من أي حاجة، ما دام إنت صح خليك في نظر نفسك سوبر مان زي ما إنت في نظر غيرك.
بص لنقط القوة اللي في شخصيتك واستغلها صح، متسمعش النقد الهدام اللي ممكن يشدك لورا، واحرص على إنك تفضل قدام، وكل خطوة تاخدها اوعي ترجعها مهما حصل. مش عيب يكون عندك عيوب، العيب إنك تتجاهل مميزاتك عشان فيه حد مش عاجبه عيوبك.
وزي ما غنَّى الملك محمد منير.. حاول تتغير ومسيرك تقدر وبلاش نستسلم يوم للحزن مدام عايشين.
مش مهم لو لابس البوكسر فوق الهدوم
