إهداء إلى ميس نسرين وميس نسمة (اللي مريم بتقول عليها ميس نسرين) وميس سحر وميس ندى وسهير وعبير (أم حبيبة)، شكرًا.
بنتي من قبل ما تتم سنة، وأنا وديتها حضانة جنب البيت، رغم إني مكنتش بشتغل، بس كنت شايفة وقتها إن القرار ده أحسن لكل الأطراف، وده من القرارات القليلة اللي الحمد لله لحد دلوقتي مندمتش عليها لحظة وبعتبر إن الحضانة هي إيدي اليمين في تربية بنتي. من وقتها لدلوقتي فات تقريبًا سنة ونص، اتعلمت فيها بالتجربة الشخصية إزاي نختار حضانة، عشان كده كلامي الجاي هو محاولة لمد إيد المساعدة لكل أم بتفكر تودي أطفالها الحضانة، وده من خلال تجربتي أنا ومجموعة من الصديقات، دي أهم الاسئلة اللي بتقابل أي أم بتفكر في موضوع الحضانة.
ليه الحضانة؟
السؤال ده أول سؤال هتتسأليه من كل الناس وأولهم نفسك، ليه تحتاجي للحضانة؟ عشان حاجات كتيرة أوي. الأطفال في السن الصغير بيكونوا محتاجين حد من سنهم يلعبوا معاه، غير اللعب هم كمان محتاجين يتعلموا، عشان نفسه أولاً وعشان المدارس أم إنترفيوهات ثانيًا. فيه أمهات قدرت تعمل ده بنفسها في البيت، بس غالبًا بيبقى على حساب صحتها ووقتها لنفسها وطبعًا مستقبلها العملي.
غير كده وجود أطفال كتير مع بعضها بيساعد جدًا في التواصل وفي الكلام، والأطفال اللي أكلهم مش كويس وجود الطفل في الحضانة بيشجعه أكتر على الأكل.
الحضانة من سن كام؟
زي ما قلت أنا وديت بنتي من عمر 11 شهر، بس بالنظر لأصحابي فالسن المثالي هو من سنة لسنتين، العمر ده للطفل بيكون أسهل فيه إنه يبعد عن مامته لعدد ساعات معيّن في اليوم، كل ما كبر في السن كل ما كان الموضوع أصعب.
إزاي أختار الحضانة؟
اختيار الحضانة بيكون على أساس أكتر من نقطة:
- لو إنتي بتشتغلي يبقى من الأفضل إن الحضانة تكون جنب مكان شغلك عشان لو -لا قدر الله- حصل حاجة يبقى من السهل إنك تروحيله، بس دي مش قاعدة، يعني ممكن يكون من الصعب إنك تروحي وترجعي بالمواصلات مع الطفل ومواعيد شغلك مرنة أو بيخلص بدري أو بتشتغلي 3 أيام في الأسبوع، ساعتها الأفضل طبعًا هو اختيار حضانة جنب البيت.
- اسألي على الفيسبوك على الحضانات اللي سمعتها كويسة في المنطقة اللي حواليكي، الفيسبوك دلوقتي بقى مليان مجموعات لكل منطقة في مصر، ادخلي اسألي فيهم، وطبعًا مش هتاخدي إجابة واحدة لأن الحضانة اللي واحدة بتشكر فيها هتلاقي حد تاني بيشتمها، بس على الأقل هتعملي قائمة صغيرة بأسماء الحضانات اللي فيه ناس شكرت فيها.
- اعملي جولة على الحضانات اللي كتبتي اسمها دي، الحاجات اللي تدوري عليها في الحضانة كتير، بس أهمهم 4 حاجات: الارتياح النفسي للحضانة وللمشرفين، مساحة الحضانة ومدى نظافتها، عدد الأطفال الموجودين في المرحلة العمرية بتاعة طفلك، وجود أنشطة وفصول تعليمية للأطفال بجانب الترفيه والتسلية.
تعرفي على: كيفية الاجابة على اسئلة الاطفال المحرجة
منين أعرف إن الحضانة مش بتؤذي ابني؟
بنسمع بطريقة شبه يومية عن حوادث تحرش وإهمال وتعذيب للأطفال في الحضانات لحد ما بقى وسواس في دماغنا، وخاصة لو الطفل رايح الحضانة لسه مش بيعرف يتكلم. هنا بييجي دور الأم في إنها تفحص الطفل يوميًا لو فيه حاجة غريبة في جسمه، وكمان في نفسية الطفل وهو ماشي من الحضانة ووهو رايح، في الأول طبعًا الطفل بيكون رافض التغيير ده وهيعيّط كتير جدًا ويخاصمك في البيت ويزعل ويمسك فيكي وهو داخل الحضانة، ده شيء طبيعي، بس برضو طبيعي إنه ينتهي في فترة بتتراوح بين أسبوعين لشهر، لو في الفترة دي الطفل متحسنش أو لقيتيه بيتدهور في حاجات، ساعتها اوقفي مرواحه للحضانة لأن ده معناه حاجة من الاتنين، يا إما الحضانة فعلاً سيئة، يا إما هو نفسيته مش قادرة تتقبل الحضانة دي.
أعرف منين إن الحضانة مناسبة؟
لو الحمد لله توصلتي لحضانة وطفلك استريح فيها، لازم كمان تتابعي مستوى الطفل في كل الأنشطة، يعني لازم إدراكه وحواسه وكلامه يتحسنوا بمرور الوقت. كمان أكيد فيه ساعات هتضطري تشتكي من حاجات لإدارة الحضانة، بس هل لما تروحي وتشتكي للمشرفين، بينكروا ويقولوا ملناش دعوة ولا بيعترفوا ويعتذروا ويوعدوا إن ده مش هيتكرر تاني؟ على أساس رد فعلهم تقدري تعرفي دي حضانة محترمة تستأمني عليها طفلك ولا لأ.
الحضانة الكويسة بتاخد كام في الشهر؟
السؤال ده بتختلف إجابته بين كل منطقة والتانية، كل منطقة بيبقى فيه حدود معينة بيتحرك فيها كل مستوى من الحضانات، فمينفعش تحكمي على الحضانة من الفلوس اللي هتاخدها وتقارنيها بمنطقة تانية. نقطة كمان وهي إن الحضانة مش كل ما كانت أغلى كل ما كانت أحلى، ده مفهوم مش صحيح، ومش هنسى حكاية الولد اللي مرة نسيوا يحطوله بامبرز في الشنطة فمغيّرش طول اليوم، ومرة نسيوا يحطوله مية فمشربش طول اليوم والحضانة كانت غالية جدًا، فمش بالفلوس أبدًا، هي بتبقى بالخبرة والتجربة.
فيه حاجة تانية المفروض أعرفها؟
فيه كام نقطة بسيطة من المهم إنك تعرفيها:
- فيه حضانات بتعمل الحفلات بفلوس، حفلة العيد بفلوس وحفلة الهالوين بفلوس، ساعتها مش لازم تشتركي في كل الحفلات لأنها كده بتبقى ميزانية فوق الميزانية، والأفضل إنك تشوفي إيه هي الاحتفالات المهمة بالنسبالك وخليه يحضرها، وبلاش تحسي بالذنب إنك هتعملي كده، الذنب وفريه لرحلات المدرسة.
- اعرفي إن الوقوع والحوادث هتحصل في الحضانة، أي تجمع فيه مجموعة كبيرة من الأطفال غالبًا هيضربوا بعض ويتكعبلوا في نفسهم، ده شيء مش بيدعو للقلق إلا في حالتين، إن الحادثة تبقى بسبب إهمال من المشرفين في الحضانة، أو إن الحادثة تتكرر بشكل دوري (زي إنه يتضرب من نفس الولد أو إنه بيتضرب من الأطفال التانيين عامة). ساعتها يبقى الموضوع مش طبيعي، فتشتكي للإدارة اللي لو مستريحتيش لرد فعلها خرّجي ابنك من الحضانة دي فورًا.
- أغلب الحضانات دلوقتي لها مجموعة نشطة ع الفيسبوك أو الواتس آب، من المهم جدًا إنك تشتركي فيها حتى لو مش هتتواصلي، من هناك بتقدري تعرفي لو فيه مشكلة ما حاصلة مع طفل تاني وبتوصّلك بباقي أولياء الأمور. كمان لو فيه حاجة مهمة أو تنبيه على أولياء الأمور بتتقال هناك، لو فيه صور بتنزل على الجروب ده، ده غير الدعم اللي المجموعة غالبًا هتقدمهولك لو احتجتي حاجة، فمن المهم الاشتراك في المجموعة دي.
- آخر حاجة اعرفي من جواكي إن خطوة الحضانة هي خطوة مهمة مش دلع ولا رفاهية ولا إنتي رامية عيالك، هم بجد هيستفيدوا منها، وإنتي كمان هتستفيدي منها. في الأول ممكن الموضوع يبقى صعب عليكو إنتو الاتنين، بس مع الوقت لو الحضانة كويسة، الموضوع هيتطور، هتشتاقي لوجود ابنك في الحضانة، وهو هيحب تواجده فيها.
